ހުޅުމާލޭގައި އާއްމުން ދިރިއުޅޭގެތައް 10 ފަންގިފިލާއަށް އިމާރާތް ކުރެވޭ ގޮތަށް ބަދަލުކޮށްފި

ހުޅުމާލޭ ގައި އާންމުން ދިރިއުޅޭގެ ތައް 10 ފަންގިފިލާއަށް އިމާރާތް ކުރެވޭ ގޮތަށް ބަދަލު ގެނެސް އެކަން ހުޅުމާލޭގެ ބެލެނިވެރިކަން އޮތް އާބަންކޯ އިން އިއުލާނު ކޮށްފި އެވެ.

މިކަމާއި ގުޅިގެން އާބަންކޯއިން ނެރުނު ނޫސްބަޔާނެއްގައި ބުނީ ހުޅުމާލެއިން ގެދޮރުވެރިކަމަށް ކަނޑައަޅާފައިވާ ރެޒިޑެންޝަލް ޕްލޮޓްތަކުގައި ކުރިން ޓެރަސް އާއި އެކު 7 ފަންގިފިލާ އަށް އިމާރާތްކުރެވޭ ގޮތަށް އޮތް އޮތުން ބަދަލުކޮށް، 10 ފަންގިފިލާ އަށް އިމާރާތްކުރެވޭ ގޮތަށް މިހާރު ބަދަލުކޮށްފައިވާ ކަމަށެވެ.

މިގޮތުން 31 މީޓަރަށް މިހާރު ރެޒިޑެންޝަލް ޕޮލޮޓުތައް ހިއްލޭނެ ކަމަށްވެސް ބުނެފައިވެއެވެ.

މީގެ އިތުރުން، އާބަންކޯއިން ބުނީ ޕާކިންގެ އައު ޝަރުތުތައް އިތުރުކޮށް، އިމާރާތުގެ އިމުގެ ތެރޭގައި ޕާކިންގ ހެދުމަށް ކަނޑައަޅާފައިވާ ކަމަށެވެ.

މިގޮތުން، މަދުވެގެން 2 ސައިކަލު ޕާކް ކުރާނެ ޖާގަ ކޮންމެ 2 ކޮޓަރީގެ އެޕާޓްމަންޓަކަށް ކަނޑައަޅަން ޖެހޭނެ ކަމަށް ބުނެފައި ވެއެވެ. އަދި ކޮންމެ 1 ކޮޓަރީގެ އެޕާޓްމަންޓް އަކަށް 1 ސައިކަލު ޕާކް ކުރާނެ ޖާގަ ކަނޑައަޅަން ޖެހޭނެ ކަމަށާ، ސައިކަލު ޕާކިންގެ ސައިޒެއްގެ ގޮތުގައި ކަނޑައަޅާފައި ވަނީ މަދުވެގެން 0.8 × 2 މީޓަރު ކަމަށްވެސް ބުނެފައިވެއެވެ. އަދި ކާރު ޕާކިންގެ ގޮތުގައި ކަނޑައަޅާފައި ވަނީ މަދުވެގެން 2.5 × 4.8 މީޓަރުކަންވެސް ވަނީ ކަނޑައަޅާފަ އެވެ.

ހުޅުމާލޭ ގައި އާންމުން ދިރިއުޅޭގެ ތައް 10 ފަންގިފިލާއަށް އިމާރާތް ކުރެވޭ ގޮތަށް ހަމަޖައްސާފައިވާއިރު ސަރުކާރުން މިހާރު ދަނީ ހުޅުމާލެ ދެ ފިޔަވަހީން މާލެ ރައްޔިތުންނަށް ގޯތި ދެމުންނެވެ.