ނިލަންދޫ ތަރައްގީ ކުރާނީ އިޤްތިޞާދީ ހަބަކަށް ހެދުމުގެ ވިސްނުން ބަހައްޓައިގެން: ޑރ މުއިއްޒު

ފ. ނިލަންދޫގައި ހިންގާ ތަރައްގީގެ މަޝްރޫއުތަކަކީ ސަރަހައްދީ ތަރައްގީއަށް އަދި ފ އަތޮޅާއި ދ އަތޮޅުގެ ރަށްތަކުގެ ތަރައްގީއަށް މުހިންމު މަޝްރޫއުތަކެއްކަން ގަބޫލުފުޅު ކުރައްވާކަމަށާއި، ނިލަންދޫ ތަރައްގީކުރާނީ ސަރަހައްދީ ތަރައްގީއަށް މަގުފަހިވާގޮތަށް، އެ ވިސްނުންފުޅުގައި ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައިވަނީ ފ އަތޮޅު ނިލަންދޫގައި ބޭއްވި އެމަނިކުފާނުގެ ކެމްޕޭނު ޖަލްސާގައި ވާހަކަދައްކަވަމުން ނެވެ.

ޑރ މުއިއްޒު ވިދާޅުވީ ނިލަންދޫއަކީ ތަރައްގީގެ ގިނަ ކަންތައްތަކެއް ހިންގިދާނެ، އަދި ރައްޔިތުން ތަރައްގީގެ ގިނަ މަޝްރޫއުތަކެއް އެ ރަށުގެ ހިންގުމަށް އެދޭ ރަށެއް ކަމަށެވެ. އަދި ނިލަންދޫ ތަރައްގީ ކުރުމަކީ ފ އަތޮޅާއި ދ އަތޮޅުގެ ރައްޔިތުންނަށް ވެސް ވަރަށް ބޮޑެތި ކުރިއެރުންތަކެއް ލިބިގެންދާނެ ކަމެއް ކަމަށެވެ.

"ނޫޑަލް ޑިވެލޮޕްމަންޓުގެ ވިސްނުމުން ވިސްނާއިރުގައި މި ސަރަހައްދުގައި ތަރައްގީގެ އެންމެ މުހިންމު މަޝްރޫއުތައް ހިނގަންޖެހޭނީ، މި މުޅި ސަރަހައްދަށް، ފ އަތޮޅާއި ދ އަތޮޅަށް، މި ސަރަހައްދަށް އެންމެ ގިނަ ނަފާވާނީ މި ރަށަށް (ފ ނިލަންދޫ) އަށް އިސްކަން ދީގެން މި ރަށުގައި ގިނަ މަޝްރޫއުތަކެއް ކުރިއަށް ގެންދެވިގެން ކަމަށް އަޅުގަނޑު ޤަބޫލުކުރަން"

ޑރ މުހައްމަދު މުއިއްޒު

ސަރަހައްދޫ ތަރައްގީއަށް މުހިންމު ހަބެއްގެ ގޮތުގއި ނިލަންދޫ ތަރައްގީކުރުމަށް ޑރ މުއިއްޒު ގެންގުޅުއްވާ ވިސްނުންފުޅުގެ ތެރެއިން ނިލަންދޫގައި ކުރިއަށް ގެންދާނެ ބައެއް މުހިންމު މަޝްރޫއުތަކަށް ވެސް އެމަނިކުފާނުގެ ވާހަކައިގައި ވަނީ އަލިއަޅުވާލައްވާފަ އެވެ.

ފ ނިލަންދޫގައި ކުރިއަށް ގެންދިއުމަށް ނިންމާފައިވާ މަޝްރޫއުތައް

1. ބަނދަރުގެ ހެނދުމުގެ ބޮޑު މަޝްރޫއެއް ކުރިއަށް ގެންދާނަން

2. ނިލަންދޫގެ މަގުތައް ތާރުއަޅެމާ ތަރައްގީކުރާނަން

3. ސިއްހީ ޚިދުމަތް ފުޅާކޮށް މިހާރު ލިބެން ނެތް ޚިދުމަތްތައް ތައާރަފުކޮށް ސިއްހީ ނިޒާމު ވަރުގަދަކުރުން

4. ރޯ ހައުސް ނުވަތަ ފްލެޓު ހަދައިގެން ގެދޮރުވެރިކަމުގެ މަޝްރޫއު ކުރިއަށް ގެންދިއުން

ޑރ މުއިއްޒު ވިދާޅުވީ މި ރަށުގެ ރައްޔިތުން އެންމެ އެދޭ ތަރައްގީގެ މަޝްރޫއުތައް ކުރިއަށް ގެންގޮސްދެއްވާނެ ކަމުގެ ޔަގީންކަން ދެއްވާކަމަށެވެ. އަދި ރައްޔިތުންގެ ފަރާތުން ހުށައެޅި މަޝްރޫއުތަކާއި، ޚިޔާލުތަކަށް އިޖާބަދެއްވާނެ ކަމުގެ ޔަގީންކަން ވެސް ދެއްވާ ކަމަށެވެ.

ޑރ މުއިއްޒުގެ ވާހަކައިގައި ވަނީ ފ އަތޮޅުގެ އެހެން ރަށްތަކުގައި ވެސް ކުރިއަށް ގެންދިއުމަށް ނިންމާފައިވާ މަޝްރޫއުތަކަށް އަލިއަޅުވާލައްވާފަ އެވެ.

ފ މަގޫދޫގައި ކުރިއަށް ގެންދިއުމަށް ނިންމާފައިވާ މަޝްރޫއުތައް

1. ސުލޫލުގައި މަލްޓިޕާޕަސް ހޯލު އެޅުން

2. ބަނދަރު ބޮޑުކުރުން

3.ފަޅު ހިއްކައިގެން 3 ރިސޮޓު ތަރައްގީކުރުން (މީ މުޅި އަތޮޅަށް ފައިދާ ލިބޭނެ ތަންތަންކަމުގައި ހެދުން)

ފ ފީއަލީގައި ކުރިއަށް ގެންދިއުމަށް ނިންމާފައިވާ މަޝްރޫއުތައް

1. ރަނގަޅު ފެންވަރަކަށް ފީއަލީ މަގު ހެދުން

2. ފީއަލީ ބަނދަރު ބޮޑުކުރުން

3. ކަނޑު ޖެޓީ ތަރައްގީ ކުރުން

4. ރަނގަޅު ފެންވަރެއްގެ ބަށި ކޯޓާއި ފުޓުބޯޅަ ދަނޑު ހަދައިދިނުން

5. ސުކޫލަށް މަލްޓި ޕާޕަސް ހޯލެއް އެޅުން

6. ފީއަލީގައި މިސްކިތެއް އެޅުން

ބިލެއްދޫގައި ކުރިއަށް ގެންދިއުމަށް ނިންމާފައިވާ މަޝްރޫއުތައް

1. ބިލެއްދޫގެ ބަނދަރުގެ މައްސަލަ ޙައްލުކޮށްދިނުން

2. ރަނގަޅު ފެންވަރެއްގެ ފުޓުބޯޅަ ދަނޑެއް ހެދުން

3. ބިލެއްދޫގެ މަގުތައް ހެދުން

4. ފެނާއި ނަރުދަމާގެ މަސައްކަތް ނިންމުން

5. އިންޑޯ ވޮލީ ކޯޓާއި ޖިމް އަދި ޔޫތު ސެންޓަރެއް ޤާއިމްކުރުން

ދަރަބޫދޫގައި ކުރިއަށް ގެންދިއުމަށް ނިންމާފައިވަ މަޝްރޫއުތައް

1. ފުޓުބޯޅަ ދަނޑާއި، ވޮލީ ކޯޓު އަދި ޔޫތު ސެންޓަރު އެޅުން

2. ސުކޫލު އިމާރާތުގެ ދަތިކަން ހައްލުކޮށް މަލްޓި ޕާޕަސް ހޯލު އެޅުން

3. ސިއްހީ މަރުކަޒުގެ ފެންވަރު ރަނގަޅުކުރުން

ޑރ މުއިއްޒު ވިދާޅުވީ މިހާރު ފ އަތޮޅުގައި ފަށާފައިވާ އެއްވެސް މަޝްރޫއަކީ، އޭގެން ރައްޔިތުންނަށް ގެއްލުން ނުވާނަމަ، ހުއްޓުވާނެ މަޝްރޫއުތަކެއް ނޫން ކަމަށެވެ. އަދި އެމަނިކުފާނު ވައުދުވެވަޑައިގެންނެވި ގޮތަށް އެ އަތޮޅަށް ބޭނުންވެފައިވާ ގިނަ ކަންތައްތަކެއް ކޮށްދެއްވާނެ ކަމުގެ ޔަގީންކަން ދެއްވާކަމަށެވެ.

ޑރ މުއިއްޒު މެދުރާއްޖެތެެރެއަށް ކުރައްވާ ކެމްޕޭނު ދަތުރުފުޅުގައި، ފ އަތޮޅަށް ވަޑައިގަތުމުން، އެ އަތޮޅުގެ ވެރިކަން ކުރާ ރަށް ނިލަންދޫއިން ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ.

ފ އަތޮޅުގެ ރަށްތަކުން ގިނަ ބަޔަކު ނިލަންދޫއަށް ގޮސް ޑރ މުއިއްޒުއަށް މަރުހަބާ ދަންނަވާފައި ވާއިރު، އެމަނިކުފާނު ވަނީ ވަކި ވަކިން އެކި ރަށްތަކުގެ ރައްޔިތުންނާއި ބައްދަލުކުރައްވާ ރައްޔިތުންގެ ޚިޔާލާއި ކަންބޮޑުވުންތަކުގެ ވާހަކަ އައްސަވާފަ އެވެ.

ފ އަތޮޅުގެ ދަތުރު ނިންމަވާދެއްލުމަށް ފަހު މ އަދި ވ އަތޮޅުގެ ރަށްތަކަށް ވެސް ޑރ މުއިއްޒު ވަޑައިގަތުމަށް އޮތީ ހަމަޖެހިފަ އެވެ.