މާލޭގެ މަގެއް ބަންދު ކުރަން ވެސް އެދެން މިޖެހެނީ ބޭރު ސަފީރެއްގެ އަރިހުން: އަބްދުއްރަހީމް

މިއީ ދިވެހިންގެރާއްޖެ އެކޭ ބުނަން ލަދުވެތިވާ ކަމަށާ، މި ގައުމުގެ ވެރިކަންކުރާ ފުރަމާލޭގެ މަގެއް ބަންދު ކޮށްލަންވެސް ހުއްދަ ހޯދަން ޖެހެނީ ބޭރު ގައުމެއްގެ ސަފީރެއްގެ އަރިހުން ކަމަށް އިދިކޮޅުު ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެއެވެ.

ފ. ނިލަންދޫގައި ރޭ ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ ދިވެހިން ބޭނުންވާ ތަރައްގީ ހާސިލް ކުރުމަށްޓަކައި އެންމެ ފުރަތަމަވެސް ކުރަންޖެހޭ އެންމެ މުހިންމު ކަމަކީ، ތަރައްގީ ގެންނަން ބޭނުންވާ ގައުމެއް ހޯދުންކަމަށެވެ. އަދި މިއަދު އެފަދަ ގައުމެއް ނެތް ކަމަށް އަދުރޭ ވިދާޅުވިއެވެ.

އެހެންކަމުން ތަރައްގީގެ ކޮންމެ މަޝްރޫއުއެއް ކުރިއަށް ގެންދަން ބޭނުން ނަމަވެސް އެންމެ ފުރަތަމަ ކުރަން އޮތް ކަމަކީ ދިވެހީންގެ ރާއްޖެ ދިވެހިންނަށް ހޯދައިދިނުން ކަމަށް އަދުރޭ ވިދާޅުވިއެެވެ. އަދި ދިވެހީންގެރާއްޖެ ދިވެހިންނަށް ހޯދައި ދީގެން މެނުވީ ތަރައްގީ ނުގެނެވޭނެ ކަން ފާހަގަކުރައްވައި އަދުރޭ ވިދާޅުވީ، މިއަހަރުގެ ރިޔާސީ އިންތިޚާބުގެ ޝިޔާރެއްގެ ގޮތުގައި އިދިކޮޅު ލީޑަރ ރައީސް ޔާމީން އަބްދުލް ގައްޔޫމް "ދިވެހިންގެ ދިވެހިރާއްޖެ" ޝިޢާރު ކަނޑައެޅުއްވީވެސް އެ ސަބަބަށްޓަކައި ކަމަށެވެ.

މިހާރު އަޅުގަނޑުމެން މިތިބީ ދިވެހިންގެ ރާއްޖޭގައޭ ބުނާކަށް އަޅުގަނޑަކަށް ނުކެރޭނެ. ދިވެހިންގެ ރާއްޖެއޭ ބުނަން އަޅުގަނޑު ލަދުގަނޭ. ނޫނީ އަޅުގަނޑު ބިރުގަނޭ، އަޅުގަނޑު ދެރަވޭ. އެއީ އަޅުގަނޑުމެންނަށް މިފެންނަނީ ދިވެހިރާއްޖޭގެ ފުރަމާލޭގެ މަގެއް ބަންދު ކުރަން ވިޔަސް އެހެން ގައުމެއްގެ ސަފީރަކު އެކަން ކުރަން އަންގާތަން. ދިވެހިރާއްޖޭގެ އިލެކްޝަން ކޮމިޝަނުން ކަންތައް ކުރައްވާ ގޮތްވެސް އެހެން ގައުމެއްގެ ސަފީރު ގޮސް ކިޔައިދޭތަން. ދިވެހިރާއްޖޭގެ ތަރައްގީގެ މަޝްރޫއުއެއް އިއުލާން ކުރިޔަސް، އެކަން ކުރަން އެހެން ގައުމެއްގެ ސަފީރަކު ކުރާތަން. އެހެން ވެއްޖެއްޔާ އަޅުގަނޑަކަށް މިއީ ދިވެހީންގެރާއްޖެ އެކޭ ބުނެވޭކަށް ނެތް

އަބްދުއްރަހީމް އަބްދުالله

އެހެންކަމުން ޑރ. މުހައްމަދު މުއިއްޒު ގެންނަވަން ވައުދުވެވަޑައިގަންނަވާ ވައުދުތައް ފުއްދުމަށް ވެސް ދިވެހިންގެ ރާއްޖެ ހޯދަން ޖެހޭކަން އަދުރޭ ފާހަގަ ކުރެއްވިއެވެ. އަދި ދިވެހިންގެ ގައުމު އަނބުރާ ދިވެހިންނަށް ހޯދައިދޭނެ ކެންޑިޑޭޓަކީ ޑރ. މުއިއްޒުކަމަށްވެސް އަދުރޭ ވިދާޅުވިއެވެ.