"ބްރިޖުގެ ތަނބުން ފެށިގެން ހުއްޓޭގަޑިއެއްގެ ބެޓެރި ބަދަލުކޮއްލުމާއި ހަމަޔަށް ފެންނަނީ ސަރުކާރުގެ 'ސްލޯކަން'"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މިސަރުކާރުން ހިންގާ މަޝްރޫއުތަކާއި، ދެމުންދާ ޚިދުމަތްތަކުގެ ލަސް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު އަދި ޕީއެންސީގެ ނާއިބު ރައީސް މުހައްމަދު ސަޢީދު ފާޑުވިދާޅުވެއްޖެއެވެ.

ސައީދު ސަރުކާރަށް ފާޑުވިދާޅުވެފައި މިވަނީ، އިސްލާމީ މަރުކަޒުގައި ހުންނަ ގަޑި ހުއްޓިފައި ހުންނަތާ އެތައް ދުވަހެއް ވެގެން ގޮސްފައިވާއިރުވެސް ގަޑީގެ ބެޓެރީ ބަދަލު ނުކޮށް ހުރުމުންނެވެ.

އެގޮތުން އިސްލާމީ މަރުކަޒުގެ ހުއްޓިފައިވާ ގަޑީގެ ފޮޓޯ އަކާއި އެކު ސައީދު ކުރެއްވި ޓްވީޓެއްގައި ވިދާޅުވީ، އިސްލާމީމަރުކަޒުގެ އެގަޑި 5:09ގައި ހުއްޓި އަދި އެ ގަޑި ކައިރީގައި ހަރުކޮށްފައި ހުރި ސްޕީކަރު އެއްބައި ނެއްޓި އޮރި އަކަށް އޮއްނަތާ 2 މަސް ދުވަސް ވެފައިވާ ކަމަށެވެ.

ސައީދު ވިދާޅުވީ މިސަރުކާރުގެ “ސްލޯ” ކަމާއި “ކަންފަސޭހަ” “ގޮތެއްފޮތެއްނެތް” ސިޔާސަތު މިއަދުވމ މުޅިދައުލަތަށް ވެރިވެފައިވާ ކަމަށެވެ. އަދި އެކަން ބަލާލި ކޮންމެ ދިމާއަކުންވެސް ފެންނަ ކަމަށާ، އެގޮތުން 500 މިލިއަން ޑޮލަރުގެ ލޯނުނަގައިގެން ޖަހަންއުޅުނު ބްރިޖުތަނބުން ފެށިގެން ހުއްޓޭ ގަޑިއެއްގެ ބެޓެރި ބަދަލުކޮއްލުމާއި ހަމަޔަށްވެސް ފެންނަނީ ސަރުކާރުގެ 'ސްލޯ' ކަން ކަމަށް އޭނާ ވިދާޅުވި އެވެ.

"ތެދުފުޅެއް، ރައީސުލްޖުމްހޫރިއްޔާ އަކަށް ހުރިހާކަމެއްނޭނގިދާނެ، ނަމަވެސް މިސަރުކާރުގެ “ސްލޯ” “ކަންފަސޭހަ” “ގޮތެއްފޮތެއްނެތް” ސިޔާސަތު މިއަދުވަނީ މުޅިދައުލަތަށް ވެރިވެފަ! މިކަން މިފެންނަނީ ބަލާލިވކޮންމެ ދިމާލަކުން. 500މ ޑޮލަރުގެ ލޯނުނަގައިގެން ޖަހަންއުޅުނު ބްރިޖުތަނބުން ފެށިގެން ހުއްޓޭ ގަޑިއެއްގެ ބެޓެރި ބަދަލުކޮއްލުމާއި ހަމަޔަށް."

ކަން މިހެން ހުރި އިރު އަނެއްކާވެސް މިފަދަ އިތުރު ފަސް އަހަރު ބޭނުންވޭތޯ ސައީދު ވަނީ ސުވާލު ކުރައްވާފައެވެ.