ވާދަވެރިޔާ އަށް ރައްދު ދިނުމުގެ ގޮތުން އެ ފަރާތުން ވެއްޓުނު ދަރަޖަ އަށް ވެއްޓިގެން ނުވާނެ: މުޢިއްޒު

ވާދަވެރި ކެންޑިޑޭޓަށް ރައްދު ދިނުމުގެ ގޮތުން، އެ ފަރާތުން ވެއްޓުނު ދަރަޖައަށް ނުދިޔުމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު އިލްތިމާސްކުރައްވަައިފިއެވެ.

ށ. ފުނަދޫގައި ރޭ ބޭއްވި ކެމްޕެއިން ޖަލްސާގައި ވާހަކަދައްކަވަމުން މުޢިއްޒު ވިދާޅުވީ ސިޔާސީ ބައެއް ފަރާތްތަކުން ކަންކަން ކުރައްވަމުންދާ ގޮތުން، މުޖުތަމަޢު ގައި އެކަކު އަނެކަކަށް ކުރަންޖެހޭ އިހްތިރާމް މިހާރު ގެއްލިފައިވާ ކަމަށެވެ. އެހެންކަމުން ކުރިން އެކަކު އަނެކަކަށް ކުރަމުން އައި އިހްތިރާމް އަލުން އަނބުރާ ގެންނަން ޖެހޭ ކަމަށާ، ހަމަޖެހުމުގެ ނޭވާއެއް ލެވޭނީ އޭރުން ކަމަށް މުޢިއްޒު ވިދާޅުވިއެެވެ.

މިއާއެކު މުޢިއްޒު ވިދާޅުވީ ސިޔާސީ ކަންކަމުގައި އުޅޭއިރު ހިތްހަމަނުޖެހޭ ކަންކަން ކުރާ ފަރާތްތަކާއި ބައެއް ފަހަރު ދިމާވާނެ ކަމަށާއި އެފަދަ ކަމެއް ދިމާވިޔަސް، ދަށު ދަރަޖަ އަށް ވެއްޓި ރައްދު ދީގެން ނުވާނެ ކަމަށެވެ.

"އަޅުގަނޑުމެން ވާން ވާނީ، ހިތްހަމަނުޖެހޭ ކަންކަން ކުރާ މީހުން އެ ވެއްޓޭ ދަށު ދަރަޖައަކަށް، ނުވެއްޓޭ ބަޔަކަށް. ވާން ޖެހޭނެ އަމަލާއި ބަހުން ރީތި މިސާލު ދައްކާ ބަޔަކަށް. އެއްގޮތަކަށްވެސް އަޅުގަނޑުމެންގެ ސިޔާސީ ވާދަވެރިޔާ، އަޅުގަނޑުމެންނާ ދިމާއަށް އެއްޗެއް ބުނީ، ނޫނީ ރުޅި އަންނަ ކަމެއް ކުރިޔަސް އަޅުގަނޑުމެން ވެގެން ނުވާނެ އެއަށް ރައްދު ދިނުމުގެ ގޮތުން އެ ފަރާތުން ހުރި ފެންވަރަށް އަޅުގަނޑުމެން ވެއްޓޭކަށް، އެއަށްވުރެ ރީތި ގޮތުގައި އަޅުގަނޑުމެންގެ ފަރާތުން މިސާލު ދައްކަން ޖެހޭނީ. މި އާދަ އަޅުގަނޑުމެން ޖެހޭ އަށަގަންނުވަން ފަށަން"

ޑރ. މުހައްމަދު މުޢިއްޒު

މުޢިއްޒު މިފަދައިން ވިދާޅުވެފައި މިވަނީ، މ އިއްޔެ ހަވީރުގެ ވަގުތެއްގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އަނބިކަނބަލުން ފަޒުނާ އަހުމަދު ހިޔާ ފްލެޓު ސަރަހައްދަށް ދިޔުމުން, ފަޒުނާއާއި ދިމާލަށް "ބާޣީ" އޭ ގޮވައި އެ ސަރަހައްދުގައި ބަޔަކު އަޑުގަދަ ކޮށްފައިވާ ދަނޑިވަޅެއްގައެވެ.

އިދިކޮޅު ބައެއް މީހުން އެފަދައިން ކަން ކޮށްފައިވާއިރު، އެމްޑީޕީގެ ކެންޕެއިންގެ ތެރެއިން މުޢިއްޒުގެ އަނބިކަނބަލުން ސާޖިދާ މުހައްމަދާއި، އޭނާގެ ޢާއިލާއަށް ނިސްބަތްކުރައްވައި ދޮގު ވާހަކަތައް ފަތުރައި ވަރަށް ހުތުރުކޮށް އެމްޑީޕީން އަންނަނީ އެންޓީ ކެންޕެއިން ކުރަމުންނެވެ. ޚާއްސަކޮށް ރައީސް ޞާލިހު ގެ ކެންޕެއިން ތަރުޖަމާނު މާރިޔާ އަހުމަދު ދީދީ ގެ ނޫސްވެރިންގެ ބައްދަލުވުންތަކުގައި ސާޖިދާ އާއި އާއިލާއަށް ފާޑުވިދާޅުވަމުންދާތީ ގިނަ ބައެއްގެ ފާޑުކިޔުންތައް މާރިޔާ އަށްވެސް ވަނީ އަމާޒުވެފައެވެ.