ވަޒީފާގެ ބިރުދައްކައިގެން ވޯޓަށް ނުފޫޒުފޯރުމަށް ކުރާ ކަންކަން ބަލާނެ ބަޔަކު ނެތް: އިދިކޮޅު

ރިޔާސީ އިންތިޚާބުގެ ދެވަނަ ބުރާއި ދިމާކޮށް ސަރުކާރު އޮފީސްތަކާއި ކުންފުނިތަކުގައި މަސައްކަތް ކުރާ ފަރާތްތަކަށް ވަޒީފާގެ ބިރުދައްވާ ވޯޓަށް ނުފޫޒުފޯރުވުމަށް ސަރުކާރުން އިންތިހާއަށް މަސައްކަތް ކުރަމުން ދިޔަ ނަމަވެސް އެކަންކަން ބަލާލާނެ އެއްވެސް މުއައްސަސާއެއް ނެތްކަން ފާހަގަކޮށް ޕްރޮގްރެސިވް ކޮންގްރެސް ކޯލިޝަނުން ކަންބޮޑުވުން ފާޅުކޮށްފި އެވެ.

ޕީޕީއެމް-ޕީއެންސީ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ކެމްޕޭނު މެނޭޖަރު މުހައްމަދު ޠަލާލް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަނީ ރިޔާސީ އިންތިޚާބާއި ގުޅޭގޮތުން އިދިކޮޅުގެ ހުރި ބައެއް ކަންބޮޑުވުންތަކަށް އަލިއަޅުވާލައްވާފަ އެވެ.

އެގޮތުން ރީ-ރަޖިސްޓްރޭޝަން ޕްރޮސެސްގެ ތެރެއިން ބަޔަކަށް ނޭނގި ވޯޓުލާތަން ނޫން އެހެން ތަންތަނަށް ރަޖިސްޓާކޮށްފައި އޮތް އެތައް މައްސަލައެއް މިހާރު ފެންމަތިވެފައިވާއިރު، އިންތިޚާބަށް އެކި ގޮތްގޮތުން ނުފޫޒު ފޯރުވުމަށް މަސައްކަތް ކުރަމުންދާކަމަށް ޠަލާލު ވަނީ ވިދާޅުވެފަ އެވެ.

ޠަލާލުގެ އިތުރުން މިއަދު ޕްރެސް ކޮންފަރެންސްގައި ވާހަކަދައްކަވަމުން ޑރ މުއިއްޒުގެ އެސިސްޓެންޓު ކެމްޕޭނު މެނޭޖަރު އަދި މަޖިލީހުގެ މަޑަވެލި ދާއިރާގެ ކުރީގެ މެމްބަރު މުއާޒު މުހައްމަދު ރަޝީދު ވިދާޅުވީ ރިޔާސީ އިންތިޚާބުގެ ދެވަނަ ބުރު ބޯމަތިވެފައިވާއިރު، ސަރުކާރު ކުންފުނިތަކުގައި ތިިބި މީހުންނަށް ވަޒީފާގެ ބިރު ދައްކާ، އަދި އިތުރު ވަޒީފާތައް އުފައްދައިގެން ވޯޓަށް ނުފޫޒު ފޯރުވުމަށް ސަރުކާރުން ކެނޑިނޭޅި މަސައްކަތް ކުރަމުންދާ ކަމަށެވެ.

އޭގެ އިތުރުން މިހާރުވެސް ރައީސުލްޖުމްހޫރިއްޔާ ކެމްޕޭނު ކުރައްވަމުން ގެންދަވަނީ ދައުލަތުގެ ވަސީލަތްތަކުގެ ބޭނުން ނަހަމަގޮތުގައި ހިއްޕަވައިގެން ކަމަށާއި، މި މައްސަލަތައް ބަލާނެ އެއްވެސް މުއައްސަސާއެއް ނެތްކަމަށް މުއާޒު ވިދާޅުވި އެވެ. އަދި އެއީ އިދިކޮޅުން އިންތިހާއަށް ކަންބޮޑުވާ ކަމެއްގެ ގޮތުގައި އޭނާ ފާހަގަކުރެއްވި އެވެ.

"ސަރުކާރަށް ބޮޑުތަނުން ނޫނެކޭ ބުނީމަ ސަރުކާރުގެ ވަސީލަތްތައް ބޭނުންކޮށްގެން ވޯޓަށް ނުފޫޒު ފޯރުވުމަށް، ނޫނީ ވޯޓު ލިބިދާނެ ފަދަ ކަންތައްތައް ކުރުމަކީ އެއީ ރަނގަޅު ކަމެއްގެ ގޮތުގައި އެއް ނޫން އަޅުގަނޑުމެން ފާހަގަކުރަނީ. އަދި އެއީ ދިވެހިރައްޔިތުން އެކަން ގަބޫލުކުރާނެ ކަމެއް ނޫން އެއީ"

މުއާޒު މުހައްމަދު ރަޝީދު

ރީ-ރެޖިސްޓްރޭޝަން ޕްރޮސެސްއާއި ގުޅިގެން އިދިކޮޅުގެ ހުރި ކަންބޮޑުވުންތަކާއި އެކު އެ ކޯލިޝަންގެ މުއައްސިސުން އިލެކްޝަންސް ކޮމިޝަންގެ އިސްވެރިންނާއި ބައްދަލުކުރެއްވުމަށް ފަހު ދެއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވެސް ވަނީ އިންތިޚާބަށް ނުފޫޒު ފޯރުވުމަށް ސަރުކާރުން ކުރަމުންދާ ކަންކަން ކަމާއި ގުޅުންހުރި މުއައްސަސާތަކުން ބަލަމުން ނުދާކަން ފާހަގަކުރައްވާފަ އެވެ.

އިދިކޮޅުން ބުނީ އިންތިޚާބަށް ނުފޫޒު ފޯރުވުމަށް ސަރުކާރުން ކުރަމުންދާ ކަންކަން ފާހަގަކޮށް މިހާތަނަށް އޭސީސީއަށް 70 އަށް ވުރެ ގިނަ މައްސަލަ ހުށައަޅާފައިވާ ކަމަށެވެ. އެހެން ނަމަވެސް، މިހާތަނަށް އެއިން އެއްވެސް މައްސަލައެއް ބަލާފައި ނުވާއިރު، މި އިންތިޚާބުގެ ޞައްހަކަން ކަށަވަރުކުރުމަށް މުއައްސަސާތަކުން އެކަށީގެންވާ މަސައްކަތްތަކެއް ކުރަމުން ނުދާކަމީ ހިތާމަކުރާ ކަމެއްކަމަށް އިދިކޮޅުން ވަނީ ބުނެފަ އެވެ.