"ދައުލަތުން ރައްޔިތުންނަށް ދޭންޖެހޭ ފައިސާ ނުދިނީމާ ދައުލަތްވެސް ޖޫރިމަނާ ކުރާ ގާނޫނެއް ހަދަންޖެހޭ"

ދައުލަތުން ރައްޔިތުން ލައްވާ މަސައްކަތް ކުރުވާފައި، އެ ފައިސާ ނުދިނުމުން، ދައުލަތް ޖޫރިމަނާ ވާގޮތަށް ގާނޫނެއް ހެދުމަށް ކުޑަހުވަދޫ ދާއިރާގެ މެންބަރު އަހުމަދު އާމިރު ގޮވާލައްވައިފިއެވެ.

އާމިރު މިފަދައިން ގޮވާލެއްވީ، މަޑުއްވަރި ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ، ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސްކުރުމަށާއި ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި ދަރަނިތައް އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލައި ހުށަހަޅާ ޤަރާރަށް ބަހުސް ކުރައްވަމުންނެވެ.

އެގޮތުން އާމިރު ވިދާޅުވީ، އެކިއެކި ބޭނުމަށް ފެނަކައަށް ވަޑައިގަންނަވާއިރު، ފެނަކައިން ފައިސާ ދޭންޖެހޭ ފަރާތްތައް އެ ފައިސާ ނުދީގެން އެތަނުގެ ކައުންޓަރު ކުރިމަތީގައި ތިބޭތަން ފެންނަމުންދާ ކަމަށެވެ.

އަދި އައު ސަރުކާރެއް ފެށެން އުޅޭ އިރު އެކަންކަމަކީ ބަލަންޖެހޭ ކަންކަމަށް ވާއިރު، ފެނަކައަކީ ނަގައި ކޮޅަށް ޖަހަންޖެހޭ ކުންފުންޏެއް ކަމަށް އޭނާ ވިދާޅުވި އެވެ. އެހެނީ އެއީ އަސާސީ ޚިދުމަތެއް ފޯރުކޮށްދެމުންދާ ތަނެއް ކަމަށާ، އެހެންކަމުން އެތަން ރަނގަޅަށް އޮތުމަކީ ކޮންމެހެން ބޭނުން ކަމެއް ކަމަށް އާމިރު ވިދާޅުވި އެވެ.

އެހެންވީމާ އަޅުގަނޑު ދަންނަވާނީ ކޮންމެ ތަނަކުން ލޯނު ނަގައިގެން ވިޔަސް، އަދި ދައުލަތުގެ އެހެން ތަނަކުން ފައިސާ ފޯރުކޮށްދީގެން ނަމަވެސް އެންމެ ފުރަތަމަ ކުރަންވީ ކަމަކީ އެތަނުން(ފެނަކައިން) އާއްމު ފަރާތްތަކަށް ދޭންޖެހޭ ފައިސާތައް ދިނުން. ގާތްގަނޑަކަށް ދެތިން ހަތަރު މިލިއަން ރުފިޔާ އިންވެސްޓް ކޮށްގެން އުޅޭ ފަރާތްތަކަށް ދޭންޖެހޭ ފައިސާގެ ގޮތުގައި މިލިއަނުން މިލިއަނުން ފައިސާ ދޭންޖެހިފައި އޮތީމާ، އެ ވިޔަފާރި ކިހިނެއްތޯ ގެންދާނީ.

އަހުމަދު އާމިރު

މިއާއެކު އާމިރު ވިދާޅުވީ ފެނަކައިން ދަރާފައިވާ ކުދި ވިޔަފާރިތަކުން، އެމީހުންގެ ފައިސާ ނުލިބިގެން އެކަމުގެ ޝަކުވާތައް ކުރަމުން އަންނަ ކަމަށާ އެހެން ކަމުން އެ މައްސަލަ ހައްލު ކުރަންޖެހޭ ކަމަށެވެ.

އެހެންވީމާ އަޅުގަނޑުމެންނަށް ގާނޫނަކުން ލާޒިމް ކުރަން އެބަޖެހޭ، ދައުލަތުން ދޭންޖެހޭ ފައިސާ ނުދިނީމާ ދައުލަތްވެސް ޖޫރިމަނާ ކުރެވެން ޖެހޭނެ ކަމަށް. ހަމައެކަނި އަމިއްލަ ފަރާތްތަކުންނެއް ނޫން ދައުލަތުން ޖޫރިމަނާ ކުރަންޖެހޭނީ. ދައުލަތުގެ މަސައްކަތެއް ކޮށްފައި، އޭގެ ބިލު ހުށަހެޅީމާ، ދައުލަތުން ފައިސާ ނުދެއްކީމާ ދައުލަތްވެސް ޖޫރިމަނާ ކުރަންޖެހޭ. އެއީ، މަތިން ބާއްވާލައްވާފައި އޮތް ތަނެއް ނޫން.

އަހުމަދު އާމިރު

އާމިރު ވިދާޅުވީ، އިންސާފުވެރިކޮށް ކަންކަން ކުރާނަމަ ދައުލަތްވެސް ޖޫރިމަނާ ކުރެވެންޖެހޭނެ ކަމަށެވެ.