ފުރާނައަށް ނުރައްކާވާފަދަ ހާދިސާއެއް؛ މަތިން ވެއްޓުނު ވެލި ބަސްތާ ބޮލަށް ނުވެއްޓި މީހަކު ސަލާމަތްވީ ކިރިޔާ

މާލޭގައި، ހަދަމުންދާ އިމާރާތެއްގެ މަތިން މަގުމައްޗަށް ވެލި ބަސްތާއެއް ވެއްޓި، ހިނގި ނުރައްކާތެރި ހާދިސާއެއްގައި ސައިކަލެއްގައި ދިޔަ މީހަކު ކިރިޔާ ސަލާމަތްވެއްޖެއެވެ. މި ހާދިސާގައި އެ މީހާގެ ބޮލަށް ބަސްތާ ނުވެއްޓި ސަލާމަތްވީ ސިކުންތު ކޮޅެއްގެ ލަސްވުމަކުންނެވެ.

މި ހާދިސާ ހިނގާފައިވަނީ ޗާންދަނީމަގު، ދަނބުގޯޅި ކަންމަތީގައި ކުރިން ހަބީބް ބޭންކް ހިންގި ބިމުގައި ހަދަމުންދާ އިމާރާތެއްގައެވެ. މި ހާދިސާ ހިނގި މަންޒަރު ފެންނަ ވީޑިއޯއެއް މިހާރު ސޯޝަލް މީޑިއާގައި ދައުރުވަމުންދާއިރު، އެ ވީޑިއޯއިން ފެންނަ ގޮތުގައި އިމާރާތުގެ މަތިން ވެއްޓުނު ބަރު ވެލި ބަސްތާ މަގުމައްޗަށް ޖެހުނުތާ ގާތްގަނޑަކަށް ދެ ސިކުންތު ތެރޭ އެތަނަށް ސައިކަލެއް އާދެއެވެ. ސައިކަލު ދުއްވަން އިން މީހާ އަވަހަށް ސައިކަލު މަޑުކޮށްލުމުގެ ސަބަބުން، ވެލި ބަސްތާ އޭނާގެ ގައިގައި ނުޖެހި ވަނީ ކިރިޔާ ސަލާމަތްވެފައެވެ.

މިކަމާ ގުޅިގެން ފުލުހުންގެ މީޑިއާ އޮފިޝަލް މައުލޫމާތު ދެއްވި ގޮތުގައި، ޗާންދަނީމަގުގައި ހަދަމުންދާ އިމާރާތެއްގެ މަތިން މަގުމައްޗަށް ވެލިބަސްތާއެއް ވެއްޓުނު ހާދިސާއެއް ރިޕޯޓްކޮށްފައިވަނީ ރޭ 20:48 އެހައިކަންހާއިރުއެވެ.

ފުލުހުން އެ ސަރަޙައްދަށް ގޮސް ބެލިބެލުމުން، މި ހާދިސާ ހިނގަން މެދުވެރިވެފައިވަނީ އެ އިމާރާތުގެ 9 ވަނަ ފަންގިފިލާގައި ބަރިއަކަށް ޖަހާފައި ހުރި ބަސްތާތަކަކުން ބަސްތާއެއް ނަގަން އުޅުމުގެ ތެރޭގައި އެ ބަރި އަރިއަޅާލައި، ސޭފްޓީ ދާގަނޑު ފަޅައިގެން ދިއުމުގެ ސަބަބުންކަމަށް އޮފިޝަލް ވިދާޅުވިއެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާ ކަމަށް ފުލުހުން ވިދާޅުވިއެވެ.

ފުލުހުން އިތުރަށް ވިދާޅުވީ، މި ހާދިސާއާ ގުޅިގެން އިތުރަށް ބަލަންޖެހޭ ކަންކަން ކަމާ ގުޅުންހުރި އިދާރާތަކާ ގުޅިގެން މިހާރު ބަލަމުން އަންނަ ކަމަށެވެ.

މާލޭގައި އިމާރާތް ކުރުމުގެ މަސައްކަތް ކުރިއަށްދާއިރު ސަލާމަތީ ފިޔަވަޅުތައް އެންމެ ފުރިހަމައަށް ނޭޅުމުގެ ސަބަބުން މިފަދަ ނުރައްކާތެރި ހާދިސާތައް މީގެ ކުރިންވެސް ހިނގާފައިވެއެވެ.