ދެ ފްލެޓެއް ހުސްކުރަން އެންގުމާ އެކު، ކުލި ދައްކަން އެތައް ބަޔަކު ގުޅަން ފަށައިފި

ހުޅުމާލޭގައި ތަރައްގީކޮށްފައިވާ ސޯޝަލް ހައުސިންގ ފްލެޓުތަކުގެ ތެރެއިން ގަވާއިދުން ކުލި ނުދައްކާ ހުރި ދެ އެޕާޓްމަންޓެއްގެ އެއްބަސްވުން ބާތިލުކޮށް ހުސްކުރަން އެންގުމާ އެކު، ކުލި ދެއްކުމަށް އެދި އެތައް ބަޔަކު ގުޅަމުން އަންނަ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.

އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް 'ވޮއިސް' އަށް މައުލޫމާތު ދެއްވަމުން ވިދާޅުވީ، ދެ އެޕާޓްމަންޓެއް ހުސްކުރަން އެންގި ފަހުން ގިނަ އަދަދެއްގެ ފަރާތްތަކުން އެ ކޯޕަރޭޝަނަށް ގުޅައި، ކުލި ދައްކަން ތައްޔާރަށް ތިބި ކަމަށް ބުނަމުން އަންނަ ކަމަށެވެ.

ހަމްދާން ވިދާޅުވިގޮތުގައި، ބަރާބަރަށް ކުލި ނުދައްކާ ހުރި ޔުނިޓުތަކުގެ އަދަދު ހުރީ 500 އިން ދަށުގައި ކަމަށާއި، އޭގެ ތެރޭގައި ހިމެނެނީ ތިން މަސްދުވަހަށް ވުރެ ކުރު މުއްދަތެއްގެ ފައިސާ ނުދެއްކި ހުރި ފަރާތްތައް ކަމަށް އޭނާ ފާހަގަކުރެއްވިއެވެ.

"ވަރަށް ގިނަ ފަރާތްތަކުން ގުޅައި ރެންޓް ދައްކަން ތައްޔާރަށް ތިބި ކަމަށް ބުނަމުން އެބަދޭ،" ހަމްދާން ވިދާޅުވިއެވެ.

ހަމްދާން އިތުރަށް ވިދާޅުވީ، ކުލި ދެއްކުމަށް އެއްބަސްވާ ފަރާތްތަކަށް ލުއި ގޮތްތަކެއް ހަމަޖައްސައިދިނުމުގެ އިންތިޒާމުތައް އެ ކޯޕަރޭޝަނުން ފަހިކޮށްދޭނެ ކަމަށެވެ.

”ކުލި ދައްކަން އެއްބަސްވާނަމަ، ބަހާލައިގެން ދެއްކޭނެ އިންތިޒާމު ހަމަޖައްސައިދޭނެ“ ހަމްދާން ޝަކީލް ވިދާޅުވިއެވެ.

ހުޅުމާލޭގައި އިމާރާތްކޮށްފައިވާ "އަމާން އުދަރެސް" އަދި "އަމާން ދޯދި" ޓަވަރުތަކުން ދޫކޮށްފައިވާ ދެ އެޕާޓްމަންޓެއްގެ އެއްބަސްވުން ބާތިލުކޮށް، ތަން ހުސްކުރަން އެންގިކަން އެފްޑީސީން ހާމަކުރީ މި މަހުގެ 14 ވަނަ ދުވަހުއެވެ. އެ ކޯޕަރޭޝަނުން ބުނެފައިވާ ގޮތުގައި މި ފިޔަވަޅު އަޅާފައިވަނީ 4000 ހައުސިންގ ޔުނިޓު ކުއްޔަށްދިނުމާއި މިލްކުކުރުމުގެ ކުރިން ވެފައިވާ އެއްބަސްވުމުގައި ބަޔާންކޮށްފައިވާ އިޖުރާއާތުތަކާ އެއްގޮތްވާ ގޮތުގެ މަތިންނެވެ.

އެއްބަސްވުން ބާތިލުކުރުމުގެ ކުރިން، ނުދައްކާ ހުރި ފައިސާ ދެއްކުމަށްޓަކައި 135 ދުވަހުގެ ދިގު މުއްދަތެއް އެ ދެ ފަރާތަށް ދީފައިވާ ކަމަށް އެފްޑީސީން ބުނެއެވެ. އެގޮތުން ދެ ފަހަރެއްގެ މަތިން ޕޭމަންޓް ޑިފޯލްޓް ނޯޓިސް ފޮނުވައި، އެއްބަސްވުން ނިމުމަކަށް ގެނައުމުގެ ކުރިން ދޭންޖެހޭ 30 ދުވަހުގެ ނޯޓިސް ވެސް ވަނީ ފޮނުވާފައެވެ. މި ނޯޓިސްތައް ފަހި ޕޯޓަލްގެ އިތުރުން އެސްއެމްއެސް، އީމެއިލް އަދި ލިޔުމުން ވެސް ވަނީ ހަވާލުކޮށްފައެވެ.

ނަމަވެސް، ފައިސާ ދެއްކުމަށް ދިން އެކަށީގެންވާ ފުރުސަތުތައް ފަހަނައަޅައި ދިޔައިރު ވެސް ފައިސާ ދައްކާފައި ނުވާތީ، އެއްބަސްވުން ބާތިލުކޮށް، ނޯޓިސް ލިބޭތާ 15 ދުވަހުގެ ތެރޭގައި ޔުނިޓުތައް ހުސްކޮށް ހަވާލުކުރުމަށް ވަނީ އަންގާފައެވެ. އަދި އެ ފަރާތްތަކުގެ ފަހި ޕޯޓަލް އެކައުންޓް އެކްސެސް ވެސް ވަނީ ކަނޑާލާފައެވެ.

އެފްޑީސީން ބުނީ މި ފިޔަވަޅުތަކަކީ އެންމެހައި ފަރާތްތަކުގެ މައްޗަށް ހަމަހަމަކަމާއި އިންސާފުވެރިކަމާއެކު އުސޫލުތައް ނެގެހެއްޓުމަށާއި، ދެފުށް ފެންނަ ގޮތެއްގައި ކަންކަން ތަންފީޒުކުރުމަށް އެޅި ފިޔަވަޅުތަކެއް ކަމަށެވެ. އަދި ޔުނިޓުތައް ދެމެހެއްޓެނިވި ގޮތެއްގައި ބެލެހެއްޓުމަށާއި ޚިދުމަތުގެ ފެންވަރު ހިފެހެއްޓުމަށްޓަކައި، ގަވާއިދުން ކުއްޔާއި މެއިންޓެނަންސް ފީ ދެއްކުމަށް ހުރިހާ ފަރާތްތަކަށް އެ ކޯޕަރޭޝަނުން ވަނީ އިލްތިމާސްކޮށްފައެވެ.