ދިރިއުޅޭ ވެށި ފާސިދު ވެއްޖެ ނަމަ، އަހަރެމެންގެ ސިއްހަތުވެސް ފާސިދުވެގެންދާނެ: ޚުތުބާ

ދިރިއުޅޭ ވެއްޓަކީ އަހަރެމެންގެ ހަޔާތުގައި ވަރަށް މުހިންމު ބަހާއެއް ކަަމަށާ، އެ ވެށި ފާސިދު ވެއްޖެ ނަމަ، އަހަރެމެންގެ ސިއްހަތުވެސް ފާސިދުވެގެންދާނެ ކަމަށް މިއަދުގެ ޚުތުބާގައި ބުނެފިއެވެ.

"އިންސާނުންނާއި ވެށީގެ ރައްކާތެރިކަން އޮތީ އިސްލާމްދީނުގައެވެ" މައުލޫއަށް މިއަދު އިއްވި ޚުތުބާގައި ބުނީ، ހަގީގީ މުސްލިމުންނަކީ އެމީހަކު ދިރިއުޅޭ ވެއްޓާއި ސުލްހަވެރި، އެ ވެއްޓަށް ކުރިމަތިވާ ނުރައްކާތަކުން ވެށި ރައްކާތެރިކޮށް ސަލާމަތްކޮށްދޭ މީހާ ކަމަށެވެ. އަދި ދިރިއުޅޭ ވެށި ރައްކައު ކުރުމަކީ، ދީނީ، އިންސާނީ އަދި ވަތަނީ މަސްއޫލިއްޔަތެއް ކަމަށް އޭނާ ކަމަށްވެސް ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ، ދިރިއުޅޭ ވެއްޓަކީ އަހަރެމެންގެ ހަޔާތުގައި ވަރަށް މުހިންމު ބަހާއެއް ކަަމަށާ، އެ ވެށި ފާސިދު ވެއްޖެ ނަމަ، އަހަރެމެންގެ ސިއްހަތުވެސް ފާސިދުވެގެންދާނެ ކަމަށެވެ. އަދި އެ ވެށި ރަނގަޅު ވެއްޖެނަމަ އަހަރެމެންގެ ސިއްހަތުވެސް ދުޅަހެޔޮވެގެންދާނެ ކަމަށާ، އެހެނީ، އަހަރެމެން ކާ ތަކެއްޗާއި، ބޯ ތަކެއްޗާއި ނޭވާލާ އޮކްސިޖަން ވެސް ހުރީ އެ ވެށީގައި ކަމަށް ޚުތުބާގައި ބުނެފައިވެއެވެ.

މީގެ އިތުރުން އަހަރެމެން ދިރިއުޅޭ ވެށި މިހާރު ތަޣައްޔަރު ވެފައިވާ ކަން ފާހަގަކޮށް ޚުތުބާގައި ވަނީ އޭގެ ސަބަބުން، ވަޔާއި ފެން ތަޣައްޔަރުވެ، ފެން، ފަސްގަނޑާއި ކަނޑުގެ ލޮނުގަނޑު ނުސާފުވެ، ތަފާތު އެކި ނުރައްކާތެރި ބަލިތައްވެސް އަހަރެމެންނަށް ޖެހެމުން އަންނަކަން ފާހަގަކޮށްފައެވެ. އަދި މިނޫންވެސް ތިމާވެއްޓަށް ކުރިމަތިވެފައިވާ ގޮންޖެހުންތަކާއި ކުރިމަތިލާން ޖެހިފައިވަނީ އިސްލާމް ދީނުގެ އުސޫލުތަކާއި ޚިލާފް ވުމުން ކަމަށްވެސް ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ މުސްލިމަކީ ދިރޭ އެއްޗަށް ގޯނާކުރާނެ މީހެއްނޫން ކަމަށާ، އަދި ބޭނުންނެތި ގަސްތައް ކަނޑައި، މޭވާތަށް ނައްތާލައިލާނެ މީހެއްނޫން ކަމަށެވެ.

"މުސްލިމަކީ ބިނާކުރަނިވި މީހެކެވެ. އޭނާ ހެވަށް ލޯބިކުރެއެވެ. ނުބަޔަށް ނަފްރަތުވެއެވެ. އޭނާއަކީ އާރާސްތުކުރާ ފަނާ ނުކުރާ މީހެކެވެ. އޭނާއަކީ ހެޔޮބަސް ބުނާ ނުބައި ބަހާއި ދުރުހެލިވާމީހާއެވެ." ޚުތުބާގައި ބުނެފައިވެއެވެ.

އެހެންކަމުން، މުސްލިމުން ވާންޖެހޭނީ، ވެށި ރައްކައުތެރިކުރާ އަހަރެމެންގެ ކައުނު ސަލާމަތްކުރާ މީހަކަށް ކަމަށްވެސް ޚުތުބާގައި ބުނެފައިވެއެވެ.