އާ ރައީސަށް މަރުހަބާ ދަންނަވާ އިމްރާނު އެދިލެއްވީ މެންޑޭޓު ތަންފީޒުކުރެއްވުމަށް!
ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމުގެ ޤާނޫނީ ހުވާކުރެއްވުމާއި ގުޅިގެން ނިމިދިޔަ ސަރުކާރުގެ ހޯމް މިނިސްޓަރު އިމްރާނު އަބްދުﷲ މަރުޙަބާ ދަންނަވައިފި އެވެ.
ރައީސް ޑރ މުއިއްޒަށް މަރުހަބާ ދަންނަވާ އިމްރާނު އެކްސްގައި ލިޔުއްވި ޕޯސްޓެއްގައި ވިދާޅުވީ ރައީސް ޑރ މުއިއްޒަށާއި، އެމަނިކުފާނުގެ ނައިބު ހުސެއިން މުހައްމަދު ލަތީފުގެ އިތުރުން، އާ ސަރުކާރުގެ ކެބިނެޓު ވަޒީރުންނާއި އިސް މަޤާމުތައް ފުރުއްވާ ބޭފުޅުންނަށް މަރުހަބާ ދަންނަވާ ކަމަށެވެ.
ނިމިދިޔަ ރިޔާސީ އިންތިޚާބުގައި ރައީސް ޑރ މުއިއްޒު އިންތިޚާބު ކުރައްވާ އާ ސަރުކާރާއި ރައްޔިތުން ހަވާލުކުރި މެންޑޭޓާއި އެއްގޮތަށް ކުރިއަށް އޮތް ފަސް އަހަރު ދިވެހި ޤައުމުގެ ލާބަޔާއި މަންފާއަށް އާ ސަރުކާރުން މަސައްކަތްކުރައްވާނެކަމަށް އުންމީދު ކުރައްވާކަމަށް އިމްރާނު ވިދާޅުވި އެވެ.
އެއާއެކު އިމްރާނު ވަނީ ޑރ މުއިއްޒަށް ހެޔޮ ވެރިކަމެއް ކުރުމުގެ ތައުފީޤު މިންވަރުކޮށްދެއްވުމަށް އެދި ދުޢާ ދަންނަވާފައެވެ.
"ދިވެހި ލޮބުވެތި ރައްޔިތުން ތިޔަބޭފުޅުންނަށް ދެއްވި މޭންޑޭޓާ އެއްގޮތަށް، ކުރިއަށް މި އޮތް 5 އަހަރަކީ ދިވެހި ޤައުމަށް ލާބަޔާ މަންފާ ލިބިގެންދާނެ 5 އަހަރު ކަމުގައި އުންމީދުކުރަމެވެ. ހެޔޮ ވެރިކަމެއް ކުރުމުގެ ތައުފީޤު ތިޔަބޭފުޅުންނަށް މިންވަރު ކޮށްދެއްވުން އެދި ދުޢާކުރަން"
ކުރީގެ ހޯމް މިނިސްޓަރު އިމްރާން އަބްދުﷲ
ނިމިގެން ދިޔަ ސަރުކާރުގެ ހޯމް މިނިސްޓަރު އިމްރާނު އާ ސަރުކާރަށް މަރުހަބާ ދަންނަވާފައިވާއިރު، ދެން ހޯމް މިނިސްޓްރީ އާއި ހަވާލުވެވަޑައިގަންނަވާނީ ސިފައިންގެއަށް ގިނަދުވަހު ޚިދުމަތްކުރައްވާފައިވާ، އަދި ސެކިއުރިޓީގެ ރޮގުން މަތީ ތައުލީމު ހާސިލްކުރައްވާފައިވާ ސިފައިންގޭގެ ކުރީގެ ކެޕްޓަން އަލީ އިހުސާނެވެ.
މިނިސްޓަރު އިހުސާން ވަނީ ހޯމް މިނިސްޓްރީގެ ޒިންމާތައް އަދާކޮށް، ގައުމުގެ އަމަން އަމާންކަމާއި ސުލްހަވެރިކަން ޤާއިމްކުރުމަށް މުހިންމު މަސައްކަތްޕުޅުތަކެއް ކުރައްވާނެކަމުގެ ޔަގީންކަން ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
