30 ދުވަސް ތެރޭ ފުށިދިއްގަރު ފަޅު ހިއްކަން ފެށޭނެ: ރައީސް މުޢިއްޒު

30 ދުވަސް ހަމަވުމުގެ ކުރިން ފުށިދިއްގަރުފަޅު ހިއްކުމުގެ އަމަލީ މަސައްކަތް ފެށިގެން ދާނެ ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިފަދައިން ރައީސް ވިދާޅުވީ މިރޭ އޮތް ގަޑިބުރު އިފްތިތާހް ކުރުމުގެ ޖަލްސާއި ވާހަކފުޅު ދައްކަވަމުންނެވެ.

ފުށިދިއްގަރު ފަޅު 8 މަސް ދުވަހުގެ ތެރޭގައި ނހިއްކާ ނިމޭނެ ކަމަށާއި ހިއްކޭ ސަރަހައްދަކީ ހުޅުމާލޭގެ ދެފިޔަވަހި އެއްކޮށްލީމައި ހުންނަ ޖާގައިގެ ތިން ގުނަ ބޮޑު 1200 ހެކްޓަރުގެ ބިމެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

"އެވަރު ބޮޑު ފަޅެއް މިހިއްކަނީ ދިވެހި ރައްޔިތުންނަށް ގެދޮރުވެރިކަން ހައްލު ކޮށްދިނުމަށްޓަކައި. އަޅުގަނޑުމެންގެ ސަރުކާރުގައި އެންމެ މުހިންމު މަޝްރޫއުއެއްގެ ގޮތުގައި ނޫނިއްޔާ ހައްލުކުރަން ބޭނުންވާ އެންމެ ބޮޑު ކަމެއްގެ ގޮތުގައި އަޅުގަނޑަށް ތަކުރާރުކޮށް ކެމްޕެއިންގައި ދައްކަމުން އައި ވާހަކަ އަކީ ގައުމީ މައްސަލަތަކުގެ ނަން ނަގާފައި ގެދޮރުވެރިކަން." އެމަނިކުފާނު ވިދާޅުވިއެވެ.

މީގެ އިތުރުންވެސް ރައީސް ވިދާޅުވީ އެންމެ ބޮޑު މަޝްރޫއު ގްރޭޓާ މާލެ ރީޖަންއަށް ކަނޑައެލީ ސަބަބަކީ އެންމެ ގިނަ ރައްޔޮތުން ދިރިއުޅެނީ މިސަރަހައްދުގައި ކަމަށްވާތީކަމަށެވެ. އަދި މިހާރު ހިނގަމުންދާ ގުޅީފަލާއި ގިރާވަރުގެ މަޝްރޫއު އިތުރަށް ފުޅާކޮށް ގިރާވަރު ފަޅާއ ހަމައަށް އަޅާ ބްރިޖްގެ މަސައްކަތް ވެސް މިހާރު ދާ ސްޕީޑަށް ވުރެ ބާރަށް އެމަޝްރޫއު ކުރިއަށް ގެންދިއުމަށް ހަމަޖެހިފައިވާ ކަމަށްވެސް ރައީސް ޑރ.މުހައްމަދު މުއިއްޒުގެ ވާހަކަފުޅުގައި ފާހަގަ ކުރެއްވިއެވެ.

"އިންތިގާލީ މަރުހަލާގައި ލިބުނު މައުލޫމާތުގެ އަލީގައި މިހާރު ވަޒީރު ކަމާއި ހަވާލުވެވަޑައިގެން ތިއްބެވި ކަމާބެހޭ ހުރިހާ ބޭފުޅުން މަސައްކަތްތައް ފަށައިގަންނާނެ." ރައީސް ވިދާޅުވިއެވެ.

ދައުލަތުގެ ބަޖެޓްގައި ވަނީ ފުށިދިއްގަރު ފަޅު ހިއްކުމަށް 400 މިލިއަން ރުފިޔާ ހިމަނާފައެވެ.