މިނިސްޓަރުންނަށް ރުހުން ދިނުމާއި ގުޅޭ ރިޕޯޓް ފުރިހަމަ ނުވާތީ، މަޝްވަރާ ކުރުމަށް މަޖިލިސް މެދުކަނޑާލައިފި!

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ މިނިސްޓަރުންނަށް ރުހުން ދިނުމާއި ގުޅޭ ގޮތުން، މަޖިލީހުގެ ކޮމިޓީން އެކުލަވާލި ރިޕޯޓްގައި ފުރިހަމަ ނުވާ ކަންކަން ހުރި ކަމަށް ބުނުމުން، އެކަމާއި ގުޅޭގޮތުން، މަޝްވަރާ ކުރުމަށް މަޖިލީސް މެދުކަނޑާލައިފިއެވެ.

މަޖިލީހުގެ މިއަދުގެ ޖަލްސާގެ އެޖެންޑާގައި އޮތީ މިނިސްޓަރުންނަށް ރުހުން ދިނުމަށް ވޯޓަށް އެހުމުގެ މައްސަލަ ކަން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް އިއުލާން ކުރެއްވުމާއި އެކު ތުޅާދޫ ދާއިރާގެ މެންބަރު ހިސާން ޙުސައިން ވަނީ ނިޒާމީ ނުކުތާ ނަންގަވައި އެގޮތަށް އެކަން ނުކުރެވޭނެ ކަމަށް ވިދާޅުވެފައެވެ.

މި ރިޕޯޓް (ރުހުން ދިނުމާއި ގުޅޭ ރިޕޯޓް) އެޖެންޑާގައި ހިމެނިފައި މިއޮތީ ރައްޔިތުންގެ މަޖިލީހުގެ ގަވާއިދުގެ 200 ވަނަ މާއްދާގެ ވ، ރ، ކ އަދި އ ގައި ބަޔާންކޮށްފައިވާ ހަމަތަކާއި ޚިލާފަށް ނުވަތަ އެ މާއްދާތަކުގައި ހުރި ކަންކަން ފުރިހަމަ ނުވާ ރިޕޯޓެއް ވީމާ އެއީ މިއަދު ވޯޓަށް އެހޭނެ ރިޕޯޓެއް ކަމަށް އަޅުގަނޑަށް ގަބޫލު ނުކުރެވޭ.

ހިސާން ޙުސައިން

މިކަމުގެ ތަފްސީލަށް ވަޑައިގަންނަވަމުން ހިސާން ވިދާޅުވީ، ސަރުކާރުން އުފައްދަވާ މިނިސްޓްރީ ތަކާއި ކުންފުނި ތަކުގެ މެންޑޭޓަކީ މަޖިލީހުން ދިރާސާކޮށް ފާސް ކުރަންޖެހޭ ކަންކަން ކަމަށާ، އަދި މިހާތަނަށްވެސް ސަރުކާރުގެ މިނިސްޓްރީތަކުގެ މެންޑޭޓް މަޖިލީހަށް ހުށަހެޅި ފާސްކޮށްފައި ނުވާ ކަމަށެވެ.

އަދި މިނިސްޓަރުންނަށް ރުހުން ދިނުމުގައި، އެ މިނިސްޓަރުންގެ މިނިސްޓްރީގެ މެންޑޭޓް ތަކަށް ބަލަންޖެހޭއިރު، މެންޑޭޓް ފާސް ނުކުރާ މިނިސްޓްރީ ތަކެއްގެ މިނިސްޓަރުންނަށް ރުހުން ދެވޭނެ ގޮތެއް ނޯންނާނެ ކަމަށް އޭނާ ވިދާޅުވި އެވެ.

ރުހުން މި ދެނީ އެ ބޭފުޅުން (މިނިސްޓަރުން) ކޮން މަސްޢޫލިއްޔަތު ތަކެއް އަދާ ކުރުމަށް ނުވަތަ ނުކުރުމުގެ ގާބިލިއްޔަތުކަން ހުރެގެން ނުވަތަ ނެތީގެންކަން ރިޕޯޓުން ސާފު ނުވާތީ. އަދި ކޮމިޓީއަށް އެ މަރުހަލާގައި ރިޕޯޓް ފޮނުވާފައި ނެތީމާ، އެއީ ދިރާސާ ކުރެވޭނެ ކަމެއް ވެސް ނޫން

ހިސާން ޙުސައިން

މީގެ އިތުރުން، މަޖިލީހުން ރުހުންދޭ ކޮމިޓީ ރިޕޯޓު ގައި ރައްޔިތުންގެ މަޖިލީހުން ރުހުން ދިނުމަށް، ނުވަތަ ނުދިނުމަށް ބަޔާން ކޮށްފައިވާން ޖެހޭއިރު، އެ ރިޕޯޓްގައި އެފަދައިން ބަޔާންކޮށްފައި ނެތް ކަމަށް ވެސް ހިސާން ވިދާޅުވި އެވެ.

ހިސާންގެ ނިޒާމީ ނުކުތާ ބަލައިގަނެ، އަސްލަމް ވަނީ، މަޖިލީހުގެ މެޖޯރިޓީ ލީޑަރ އަދި މައިނޯރިޓީ ލީޑަރާއި މަޝްވަރާ ކުރެއްވުމަށްފަހު އެކަމާއި ގުޅޭގޮތުން ކުރިއަށް ދާނެ ގޮތެއް ނިންމަވާނެ ކަމަށް ވިދާޅުވެ، މަޝްވަރާ ކުރެއްވުމަށް ޖަލްސާ މެދުކަނޑާލައްވާފައެވެ.