މަޖިލީހުގެ ދައުރު އަނެއްކާވެސް ދަންމާލަނީ!

19 ވަނަ ރައްޔިތުންގެ މަޖިލީހުގެ ހިނގަމުން މިދާ ދައުރު ތިންވަނަ ފަހަރަށް ދަންމާލަން ވޯޓަށް އަހަން ނިންމައި އެކަން އިއުލާން ކުރައްވައިފިއެވެ.

ދައުރު ދަންމާލަން ނިންމާފައި ވަނީ، މިއަދު މަޖިލީހުގެ ޖަލްސާގައި އެޖެންޑާކޮށްފައި އޮތް ކެބިނެޓުގެ ވަޒީރުންނަށް ރުހުން ދިނުމުގެ މައްސަލަ ކުރިއަށް ނުގެންދެވުމުން ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވިއެވެ.

މިއަދުގެ ޖަލްސާ އަކީ 2023 ވަނަ އަހަރު ތިން ވަނަ ދައުރުގެ އެންމެ ފަހު ޖަލްސާ ކަމަށް އަޅުގަނޑުމެން ކަނޑައަޅާފައި އޮންނާނެ މީގެ ކުރިން. އެހެންނަމަވެސް، (ރުހުން ދިނުމުގެ) ރިޕޯޓާއިމެދު ކޮމިޓީން ގޮތެއް ނިންމައި، މިދައުރު ތެރޭގައި މިނިސްޓަރުންނަށް ރުހުން ދިނުމުގެ މައްސަލައަށް ގޮތެއް ނިންމުމަށްޓަކައި އަޅުގަނޑު ގަސްތުކުރަނީ މިއަދު ވޯޓަށް އަހާއިރު ދައުރު ދަންމާލަން ވޯޓަށް އަހަން

މުހައްމަދު އަސްލަމް

މިނިސްޓަރުންނަށް ރުހުން ދިނުމުގެ މައްސަލަ ކުރިއަށް ނުގެންދެވުނީ އެ މައްސަލަ އާއި ގުޅިގެން ކޮމިޓީން އެކުލަވާލި ރިޕޯޓް ފުރިހަމަ ނުވާތީ ކަމަށް އަސްލަމް ވިދާޅުވިއެވެ.

އެކަން މިއަދުގެ ޖަލްސާގައި ފާހަގަ ކުރެއްވީ ތުޅާދޫ ދާއިރާގެ މެންބަރު ހިސާން ހުސައިނެވެ.

އެގޮތުން ހިސާން ވިދާޅުވީ، ސަރުކާރުން އުފައްދަވާ މިނިސްޓްރީ ތަކާއި ކުންފުނި ތަކުގެ މެންޑޭޓަކީ މަޖިލީހުން ދިރާސާކޮށް ފާސް ކުރަންޖެހޭ ކަންކަން ކަމަށާ، އަދި މިހާތަނަށްވެސް ސަރުކާރުގެ މިނިސްޓްރީތަކުގެ މެންޑޭޓް މަޖިލީހަށް ހުށަހެޅި ފާސްކޮށްފައި ނުވާ ކަމަށެވެ.

އަދި މިނިސްޓަރުންނަށް ރުހުން ދިނުމުގައި، އެ މިނިސްޓަރުންގެ މިނިސްޓްރީގެ މެންޑޭޓް ތަކަށް ބަލަންޖެހޭއިރު، މެންޑޭޓް ފާސް ނުކުރާ މިނިސްޓްރީ ތަކެއްގެ މިނިސްޓަރުންނަށް ރުހުން ދެވޭނެ ގޮތެއް ނޯންނާނެ ކަމަށް އޭނާ ވިދާޅުވި އެވެ.

ރުހުން މި ދެނީ އެ ބޭފުޅުން (މިނިސްޓަރުން) ކޮން މަސްޢޫލިއްޔަތު ތަކެއް އަދާ ކުރުމަށް ނުވަތަ ނުކުރުމުގެ ގާބިލިއްޔަތުކަން ހުރެގެން ނުވަތަ ނެތީގެންކަން ރިޕޯޓުން ސާފު ނުވާތީ. އަދި ކޮމިޓީއަށް އެ މަރުހަލާގައި ރިޕޯޓް ފޮނުވާފައި ނެތީމާ، އެއީ ދިރާސާ ކުރެވޭނެ ކަމެއް ވެސް ނޫން

ހިސާން ޙުސައިން

މީގެ އިތުރުން، މަޖިލީހުން ރުހުންދޭ ކޮމިޓީ ރިޕޯޓު ގައި ރައްޔިތުންގެ މަޖިލީހުން ރުހުން ދިނުމަށް، ނުވަތަ ނުދިނުމަށް ބަޔާން ކޮށްފައިވާން ޖެހޭއިރު، އެ ރިޕޯޓްގައި އެފަދައިން ބަޔާންކޮށްފައި ނެތް ކަމަށް ވެސް ހިސާން ވިދާޅުވި އެވެ.