މެނިފެސްޓޯ އެކުލަވާލެއްވުމުގައި ރައީސް ޑރ. މުޢިއްޒު ދެއްވި އެހީތެރިކަމަށް ޢާޒިމާގެ ޝުކުރު!

ޕީޕީއެމް/ ޕީއެންސީގެ ޓިކެޓްގައި މާކެ ސިޓީ ކައުންސިލްގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރުގެ މެނިފެސްޓޯ އެކުލަވާލެއްވުމުގައި ރައީސުލްޖުމުހޫރިއްޔާ ޑރ މުހައްމަދު މުޢިއްޒު ދެއްވި އެހީތެރިކަމަށް ޝުކުރު އަދާކުރައްވައިފިއެވެ.

މިކަމާއި ގުޅިގެން ޢާޒިމާ މިއަދު އެކްސްގައި ކުރެއްވި ޕޯސްޓެއްގައި ވަނީ، ދިވެހިރާއްޖެއަކީ ދިވެހިން ފަޚުރުވެރިވާ ފަދަ "ދިވެހިންގެ ރާއްޖެ" އަކަށް ހެއްދެވުމަށް ރައީސް މުޢިއްޒު ކުރައްވަމުންދާ މަސައްކަތްޕުޅަށް ތަޢުރީފް ކުރައްވާފައެވެ.

އަދި ޢާޒިމާގެ މޭޔަރު ކަމުގައި، ރައީސް މުޢިއްޒު ފަށްޓަވާފައި އެވާ މަސައްކަތުގެ މާލޭގެ ބައި ތަންފީޒުކުރެއްވުމަށް ގަދަ އަޅައި މަސައްކަތް ކުރައްވާނެ ކަމަށްވެސް ވިދާޅުވި އެވެ.

މީގެ ކުރިންވެސް ޢާޒިމާ ވަނީ އޭނާ މާލެސިޓީ މޭޔަރު ކަމަށް ވާދަކުރައްވަން ނުކުންނެވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒު މާލެ ސިޓީ އަށް ޚާއްސަ ކުރައްވާފައިވާ ސިޔާސަތުތައް ތަންފީޒުކުރައްވަން ކަމަށް ވިދާޅުވެފައެވެ.

އެގޮތުން މޭޔަރ ކަމަށް ވާދަކުރައްވާ ފޯމު ހުށަހެޅުމަށްފަހު ނޫސްވެރިންނާއި ބައްދަލު ކުރައްވާ ވާހަކަ ދައްކަވަމުން ޢާޒިމާ ވަނީ، އޭނާ ހުންނެވީ ރައްޔިތުންނަށް އެންމެ ރަނގަޅަށް ޚިދުމަތްކުރެއްވުމަށް ކަމަށާއި ރައްޔިތުންނަށް ޚިދުމަތް ކުރެއްވުމަށްވުރެ މުހިންމު އެހެން އެއްވެސް ކަމެއް ނޯންނާނެ ކަމަށް ވިދާޅުވެފައެވެ.

"އަޅުގަނޑުމެން ނުކުމެ މި ތިބީ ރައީސް މުޢިއްޒުގެ ވިޝަން ރާއްޖެއަށް ކާމިޔާބު ކުރެއްވުމަށްޓަކައި އޭގެ މާލޭގެ ބައި ހިފައިގެން. އިރާދަކުރެއްވިޔާ އަޅުގަނޑުމެން ވާނެ އިންތިޚާބު ކާމިޔާބު ކޮށްފައި ދިވެހިރާއްޖޭގެ ރައްޔިތުންނަށް އެންމެ އެކަށީގެންވާ ގޮތަށް ޚިދުމަތް ކުރާނެ ބަޔަކަށް. އަޅުގަނޑުމެންނަށް ދިވެހި ރައްޔިތުންނަށް ޚިދުމަތްކުރުމަށްވުރެ މުހިންމު ކަމެއް ނޯންނާނެ. މިއަދު އަޅުގަނޑުމެން ކުރިމަތި މިލަނީ ރައީސް ޑރ. މުހައްމަދު މުޢިއްޒުގެ ވިޝަންގެ ތެރެއިން މާލެ އަށް ޚާއްސަ ކުރެވިފައިވާ ސިޔާސަތުތައް ތަންފީޒު ކުރުމަށްޓަކައި. އަޒުމާއެކު އަޅުގަނޑުމެން މި ތިބީ. އަޅުގަނޑުމެންގެ ޢަޒުމެއް ނުގުޑާނެ." މޭޔަރ ކަމަށް ވާދަކުރެއްވުމަށް ފޯމު އީސީ އަށް ހުށަހެޅުއްވުމަށްފަހު ނޫސްވެރިންނާއި ބައްދަލު ކުރައްވާ ވާހަކަ ދައްކަވަމުން ޢާޒިމާ ވިދާޅުވި އެވެ.