މާލޭގައި ދިރިއުޅުމުގެ ރައްކާތެރިކަން ބެލެހެއްޓުމަށް އޮނިގަނޑެއް ފަރުމާ ކުރާނަން: އާޒިމާ

މޭޔަރު ކަމަށް އިންތިހާބުވެވަޑައިގެންފިނަމަ މާލޭގައި ދިރިއުޅުމުގެ ރައްކާތެރިކަން ބެލެހެއްޓުމަށް އޮނިގަނޑެއް ފަރުމާ ކުރައްވާނެ ކަމަށް ކުރީގެ ބަންޑާރަ ނައިބު އަދި ޕީޕީއެމް/ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ އާއިޝަތު އާޒިމާ ޝަކޫރު ވިދާޅުވެއްޖެއެވެ.

އާޒިމާ މިފަދައިން ވިދާޅުވީ މިރޭ ސަންގުޓީވީން ސްޓެލްކޯ މާލަމުގައި ކުރިއަށް ގެންދިޔަ މާލޭ މޭޔަރުގެ ބަހުސްގައި ވާހަކަފުޅު ދައްކަވަމުންނެވެ.

ބޯހިޔާވެހިކަމަކީ ދުސްތޫރީ އަދި އަސާސީ ހައްގެއް ކަމަށް ފާހަގަކުރައްވާ އެ ހައްގު ހުރިހާ އެންމެނަށް ހަމަހަމަކަމާއި ތަފާތުކަމެއް ނެތި ސާބިތުކަމާއެކު ފޯރުކޮށްދިނުމަކީ ޕީޕީއެމް/ ޕީއެންސީގެ މައިގަނޑު ސިޔާސަތު ކަމަށް ވެސް އެކަމަނާ ވިދާޅުވިއެވެ.

"އަޅުގަނޑުމެންގެ ސިޔާސަތަކީ ގޯތި ގެދޮރުގެ ދަތިކަމާއިއެކުގައި ޑިއުޓީ ބަހައިގެން ނިދަން ނުޖެހޭނެ ވަރުގެ ބޯހިޔާވެހިކަމެއް ފޯރުކޮށްދިނުން. ހަމައެއާއިއެކު ފުރާވަރަށް އަރަމުން އަންނަ ކުދިންނަށް ގޭން ބޭރަށް ނުނިކުމެ ގޭގެ ދަތިކަމާ އެކު ގެއިން ބޭރަށް ނިކުންނަށް ޖެހޭޖެހުން ބަދަލުކޮށްދިނުން. އަދި ޓިއުޝަނަށްޓަކައި ނުވަތަ އެހެންވެސް ބޭނުންތަކަށްޓަކައި ގޭގެ ސިޓިން ރޫމްގައި މައިންބަފައިންނާއި އެކުގައި މަސައްކަތް ކުރެވޭނެ މާހައުލެއް ގާއިމްކޮށްދިނުން."

އާޒިމާ ވިދާޅުވިއެވެ.

މީގެ އިތުރުންވެސް އާޒިމާ ވިދާޅުވީ ބޯހިޔާވަހިކަމުގެ ސިޔާސަތުގެ ތެރެއިން 20 އަހަރުގެ ޕްލޭނެއް ސަރުކާރުން އިއުލާނު ކުރުމާއިއެކު މާލެ ސިޓީ ކައުންސިލްގެ މާލޭގެ ޗެޕްޓާ އެކަމަނާގެ މޭޔަރު ކަމުގައި ތަންފީޒު ކުރައްވާނެ ކަމަށެވެ. އަދި އެ ޗެޕްޓާ ވެގެންދާނީ ރާއްޖޭގެ ހުރިހާ މައްސަލައަށް ލިބޭނެ ހައްލަކަށް ވެގެންދާނެ ކަމަށްވެސް އާޒިމާ ވިދާޅުވިއެެވެ.

އާޒިމާ ވިދާޅުވީ މާލޭގެ ބޯހިޔާވަހި ކަމުގެ ރައްކާތެރިކަމަކީ ޕީޕީއެމް/ޕީއެންސީގެ ވަރަށް މުހިންމު ސިޔާސަތެއް ކަމަކަމަށް ވާތީ މާލޭގެ ދިރިއުޅުމުގެ ރައްކާތެރިކަމަށްޓަކައި ވަކި މުވައްސަސާއެއް އުފައްދަވައި ދިރިއުމާއި ގެދޮރުގެ ރައްކާތެރިކަން ބެލެހެއްޓުމަށް އޮނިގަނޑެއް ފަރުމާ ކުރައްވާނެ ކަމަށެވެ.