ރައީސް ޔާމީނު ޖަލުގައި އޮތް އިރު މެޑަމް ފާތުން އެންމެ މުޒާހަރާއަކަށް ވަޑައިނުގަތީ ކީއްވެގެންތޯ: އަބްދުއްރަހީމް

ކޮރަޕްޝަން ކުށް ސާބިތުވެ ކުރީގެ ރައީސް އަބްދުالله ޔާމީން އަބްދުލްޤައްޔޫމް ޖަލުގައި އޮންނެވިއިރު، ޕީޕީއެމާއި ޕީއެންސީން ކުރިއަށް ގެންދިޔަ އެންމެ މުޒާހަރާއަކަށް ވެސް ރައީސް ޔާމީން ގެ އަނބިކަބަލުން  މެޑަމް ފާތުން ވަޑައިނުގަތީ ކީއްވެތޯ، ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.

ޕީޕީއެމް/ޕީއެންސީން ބޭއްވި ޕެނަލް ޑިސްކަޝަންގައި އަބްދުއްރަހީމް ވިދާޅުވީ، ޕީޕީއެމް/ޕީއެންސީގެ ލީޑަރޝިޕްގައި ތިއްބެވި ބޭފުޅުންނަކީ  ރައީސް ޔާމީނަށް އިހުލާސްތެރި ބޭފުޅުން ކަމަށާއި، މީގެ ކުރިން ވެސް ސިޔާސީ ބޭފުޅުން ހައްޔަރު ކުރުމުން އެބޭބޭފުޅުންގެ އަނބިކަބަލުން ނުކުތްކަމަށެވެ.

"އަޅުގަނޑުމެން ދުށިން މައުމޫން ޖަލަށްލީމައި، ނަސްރީނާ ނިކުތް ތަން. ގާސިމް ހައްޔަރު ކުރުމުން ނަހުލާ ވެސް ނިކުތް ތަން. ނާޒިމާއި އަބްދުالله ރިޔާޒް، މަހުލޫފް ޖަލަށް ލީމައި ވެސް އެބޭފުޅުންގެ އަނބިކަނބަލުން ނިކުތްތަން. އިމްރާން ހައްޔަރު ކުރީމަ އޭނާގެ އަނބިކަނބަލުން ނިކުމެވަޑައިގެންނެވި. އެހެންވެ، އަޅުގަނޑު ސުވާލު އުފައްދަން، ރައީސް ޔާމީން އެހާ ދުވަހު ޖަލުގައި އޮންނެވި އިރު މެޑަމް ފާތުމް ވަޑައިނުގެންނެވީ ކީއްވެގެން ތޯ. ޒޭން ވަޑައިނުގެންނެވީ ކީއްވެގެން ތޯ."

އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ، މިބޭބޭފުޅުން މުޒާހަރާތަކަށް ވަޑައިނުގަތްއިރު، ޕީޕީއެމް/ޕީއެންސީގެ ލީޑަރޝިޕް ގައި ތިބި ފަރާތްތަކަށް ކިޔޭނެ ފާޑެއް ނޯންނާނެ ކަމަށެވެ.

މީގެ އިތުރުންވެސް އަބްދުއްރަހީމް ވިދާޅުވީ، އިތުބާރު ނުހިފޭ މީހުން ދައްކާ ވާހަަކައިގެ މައްޗަށް ބުރަވެ، ކަން ކުރީމަ އޭގެ ހުރިހާ ގެއްލުމެއް އަންނާނީ ގައުމާއި ރައްޔިތުންނަށް ކަމަށާއު މަޖިލީހުގެ އިންތިހާބު މިހާ ގާތްވެފައި އޮތްއިރު، 2023ގައި ނިންމި ނިންމުން ދަމަހައްޓަން ރައްޔިތުން ފުންކޮށް ވިސްނުމަކީ ގައުމަށް އެންމެ ރަނގަޅު ގޮތް ކަމަށެވެ.