މިއަހަރުގެ މިހާތަނަށް ކޮވިޑްގެ 100 އަށް ވުރެ ގިނަ ކޭސް ރިޕޯޓްކޮށްފި

މިއަހަރުގެ މިހާތަނަށް ކޮވިޑް-19 ގެ 100 އަށްވުރެ ގިނަ ކޭސް ރިޕޯޓްކޮށްފައިވާ ކަމަށް ސިއްޙީ ވުޒާރާއިން ހާމަކޮށްފިއެވެ.

އެ ވުޒާރާއިން ހާމަކޮށްފައިވާ ގޮތުން މިއަހަރުގެ މިހާތަނަށް ކޮވިޑްގެ 107 ކޭސް ވަނީ ރިޕޯޓް ކޮށްފައެވެ. މީގެ އިތުރުން 128 އިންފްލުއެންޒާގެ ވޭދަނަ ރިޕޯޓްކޮށްފައިވާއިރު، އަރިދަފުސް ރޯގާ ރިޕޯޓްކުރި މިންވަރުވެސް ވަނީ ވަރަށްބޮޑަށް އިތުރުވެފައެވެ.

އެ ވުޒާރާއިން ހާމަކޮށްފައިވާ ގޮތުގައި މި ދުވަސްވަރު އަރިދަފުސް ރޯގާ ޖެހިގެން ރިޕޯޓްކުރާ އަދަދު މިދިޔަ އަހަރުގެ މި ދުވަސްވަރާ އަޅާބަލާއިރު ވަނީ އިތުރުވެފައެވެ. މިދިޔަ އަހަރުގެ މި މުއްދަތުގެ ތެރޭގަައި އަރިދަފުސްރޯގާގެ 4،794 ކޭސް ރިޕޯޓްކޮށްފައިވާއިރު މި އަހަރުވަނީ އެއަދަދު ދެގުނަވެފައެވެ. މިއަހަރު އަރިދަފުސްރޯގާގެ 8،157 ކޭސް ވަނީ ރިޕޯޓްކޮށަފައެވެ.

މިހާރު ފެތުރެމުންދާ އަރިދަފުސް ރޯގާގެ ތެރެއިން އެންމެ ގިނައިން ރިޕޯޓް ކުރަމުންދަނީ އިންފްލުއެއްޒާ އާއި ކޮވިޑްގެ ކޭސްތައް ކަމަށާއި އަދި އެންމެ ގިނައިން ބަލިޖެހިގެން ރިޕޯޓްކޮށްފައިވަނީ މާލެ ސަރަހައްދުންކަމަށް ވެސް އެ ވުޒާރާއިން ވަނީ ބުނެފައެވެ.

ޑެންގީ ހުން ޖެހިގެން މިއަހަރުގެ ތެރޭގައި ރިޕޯޓްކުރި އަދަދު ވަނީ މިދިޔަ އަހަރާ އަޅާބަލާއިރު ވަރަށް ބޮޑަށް ދަށްވެފައެވެ. އެގޮތުން ހުސްވިއަހަރުގެ މިދުވަސްވަރުގައި ޑެންގޫގެ 675 ކޭސް ރިޕޯޓްކޮށްފައިވާއިރު، މިދިޔަމަހު ރިޕޯޓްކޮށްފައިވަނީ އެންމެ 116 ކޭސްކަން ފާހަގަކޮށްލަން ޖެހެއެވެ.

މިދުަވަސްވަރު ރޯގާޖެހޭ މީހުންގެ އަަދަދު އިތުރުވަމުންދާއިރު، އެކި ބަލިތަކުން ރައްކާތެރިވުމުގެ ފިޔަވަޅުތައް އަޅަމުން ގެންދިއުމަށް ހާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީން ވަނީ އިލްތިމާސްކޮށްފައެވެ.