ފަތުރަނީ ދޮގެއް، މަޖިލީހުގެ ނާއިބު ރައީސް ކަމަށް ވާދައެއް ނުކުރަން: ފަލާހް
ރައްޔިތުންގެ މަޖިލީހުގެ ނާއިބު ރައީސް ކަމަށް ވާދަކުރައްވާ ބޭފުޅުންގެ ލިސްޓްގައި އިނގުރައިދޫ ދާއިރާގެ މެންބަރު އިބްރާހިމް ފަލާހް ހިމެނޭ ކަމަށް ދެކެވޭ ވާހަކަތައް އޭނާ ދޮގުކޮށްފި އެވެ.
މަޖިލީހުގެ ނާއިބު ރައީސް ކަމުގެ މަގާމު ހުސްވީ އެ މަގާމުގައި ހުންނެވި ދިއްގަރު ދާއިރާގެ މެންބަރު އަހްމަދު ނާޒިމް މަގާމުން އިސްތިއުފާ ދެއްވުމާއި ގުޅިގެންނެވެ. ނާޒިމް, އިސްތިއުފާ ދެއްވީ އޭނާގެ އިތުބާރު ނެތް ކަމުގެ ވޯޓް ނަގަން ވަގުތު ކުޑަތަންވެފައި ވަނިކޮށެވެ.
ނާޒިމްގެ އިތުބާރު ނެތް މައްސަލަ 73 މެންބަރުންގެ ސޮޔާއެކު ހުށައެޅުމުން މިއަދު ވަނީ އެ ވޯޓް ނަގަން ޖަލްސާއެއް ބާއްވާފަ އެވެ. ނަމަވެސް ވޯޓް ނަގަން ވަގުތު ކުޑަތަންވެފައި ވަނިކޮށް ނާޒިމް ވަނީ ތުހުމަތުތައް ދޮގު ކުރައްވާ މަގާމުން އިސްތިއުފާ ދެއްވާފަ އެވެ.
އެ މަގާމަށް ޕީއެންސީގެ ތެރޭގައި ބޮޑު ވާދައެއް އޮތް ކަމަށް ބައެއް ރިޕޯޓްތައް ބުނެ އެވެ. ހަތަރު ބޭފުޅަކު އެ މަގާމަށް ވަޑައިގަތުމަށް މަސައްކަތް ކުރަމުންދާ ކަމަށް ބުނެ އެވެ. އޭގެ ތެރޭގައި ފަލާހް ވެސް ހިމެނެ އެވެ. ފަލާހް އަކީ ޕީއެންސީގެ ޕީޖީ ގުރޫޕްގެ ލީޑަރެވެ.
ބައެއް ނޫސްތަކުން ވަނީ މަޖިލީހުގެ ނާއިބު ރައީސް ކަމަށް ވަޑައިގަތުމަށް ފަލާހް މަސައްކަތް ކުރަމުންދާ ކަމަށާ ތާއީދު ހޯދުމުގެ މަސައްކަތް ވެސް ފަށާފައިވާ ކަމަށް ބުނެ އެކަން ރިޕޯޓް ކޮށްފަ އެވެ. ނަމަވެސް ފަލާހް ވަނީ އެ ވާހަކަތައް ދޮގު ކޮށްފަ އެވެ.
އެކްސްގައި ކުރެއްވި ޕޯސްޓެއްގައި ފަލާހް ވިދާޅުވީ މަޖިލީހުގެ ނާއިބު ރައީސް ކަމަށް އޭނާ ވާދަ ނުކުރާނެ ކަމަށެވެ.
"އަޅުގަނޑު މަޖިލީހުގެ ނާއިބު ރައީސް ކަމަށް ވާދައެއް ނުކުރަން," ބައެއް ނޫސްތަކުން ފެތުރި ހަބަރު ދޮގުކޮށް ފަލާހް އޭނާގެ އެކްސް އެކައުންޓުން ކުރި ޕޯސްޓެއްގައި ވިދާޅުވެފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
