މިރޭ ފަށާ އެމްޑީޕީ ކޮންގްރެސްއަށް ރަޖިސްޓްރީވާން އިތުރު ފުރުސަތެއް ދީފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން މިއަދު ފެށުމަށް ހަމަޖެހިފައިވާ އެ ޕާޓީގެ ޚާއްޞަ ކޮންގްރެސްގައި ބައިވެރިވުމަށް ރަޖިސްޓްރީވުމުގެ އިތުރު ފުރުސަތެއް ހުޅުވާލައިފިއެވެ.

އެމްޑީޕީން ކުރި އިއުލާނެއްގައި ބުނީ، މި ހިނގާ އޮކްޓޯބަރު މަހުގެ 1 އިން 3 އަށް ބޭއްވުމަށް ހަމަޖެހިފައިވާ އެ ޕާޓީގެ ކޮންގްރެސްގެ ބައިވެރިން އޮންލައިންކޮށް ރަޖިސްޓަރީ ކުރުމުގެ ސުންގަޑިއަކީ މިދިޔަ ސެޕްޓެމްބަރު މަހުގެ 25 ވަނަ ދުވަސް ކަމަށެވެ.

ނަމަވެސް، ކޮންގްރެސްގައި ބައިވެރިވުމުގެ ޙައްޤު ލިބިފައިވާ ފަރާތްތަކުގެ ތެރެއިން އެ ތާރީޚާ ހަމައަށް ރަޖިސްޓަރީ ނުވެވުމުގެ ސަބަބުން ބައިވެރިވުމުގެ ފުރުސަތު ގެއްލިފައިވާ ފަރާތްތަކަށް އަލުން އެ ފުރުސަތު ދިނުމަށް މިހާރު ވަނީ ނިންމާފައެވެ.

އެ ޕާޓީން ހާމަކުރި ގޮތުގައި، މިގޮތަށް ނިންމީ ކޮންގްރެސްގައި ބައިވެރިވުމުގެ ޙައްޤު ލިބިފައިވާ ވީހާވެސް ގިނަ މެންބަރުންނަށް މަންދޫބުންގެ ގޮތުގައި ބައިވެރިވުމުގެ ފުރުސަތު ފަހިކޮށްދިނުމަކީ ޕާޓީގެ މައިގަނޑު މަޤްޞަދު ކަމަށްވާތީއެވެ.

އެހެންކަމުން، ސުންގަޑި ހަމަވިއިރު ރަޖިސްޓަރީ ނުވެވި ތިބި ފަރާތްތަކަށް 2 އޮކްޓޯބަރު ވާ ހުކުރު ދުވަހުގެ މެންދުރުފަހު 2:30 އިން ފެށިގެން އެރޭގެ 10:00 އާ ހަމައަށް ރަޖިސްޓްރީވުމުގެ އިންތިޒާމު ވަނީ ހަމަޖައްސައިދީފައެވެ.

އެ ފަރާތްތަކުން ރަޖިސްޓަރީވުމަށްޓަކައި މާލެ ސިޓީ ކައުންސިލްގައި އެކަމަށް ޚާއްޞަކޮށްފައިވާ މޭޒަށް ވަޑައިގަތުމުން ރަޖިސްޓްރީ ކޮށްދިނުމުގެ އިންތިޒާމް ހަމަޖެހިފައިވާނެ ކަމަށް އެމްޑީޕީގެ އިއުލާނުގައި ވަނީ ބަޔާންކޮށްފައެވެ.

މީގެ ކުރިން އެމްޑީޕީން ބުނެފައިވާގޮތުން އެ ޕާޓީގައި ކޮންގްރެސްގައި 900 އަށްވުރެ ފަރާތްތަކުން ވަނީ ރެޖިސްޓާވެފައެވެ.

މި ކޮންގްރެސް ފެށުމުގެ ޖަލްސާ އޮންނާނީ މިރޭގައެވެ. އެއަށްފަހު މާދަމާ އޮންނާނީ ލޯކަލް ކައުންސިލްތަކުން ހިންގާ މަޝްރޫއުތަކަށް އިންވެސްޓްކުރާނެ އިންވެސްޓަރުން ހޯދަން ބާއްވާ އިންވެސްޓްމެންޓް ފޯރަމެކެވެ. އަދި ކޮންގްރެސްއިން ނިންމާ މުހިންމު ނިންމުންތައް ނިންމުމުގެ މައި ހަރަކާތް އޮތީ ހޮނިހިރު ދުވަހު އެވެ.