ޖަޒުބާތުތައް އެއްފަރާތް ނުކޮށް ގައުމެއް ނުހިންގޭނެ: ރައީސް ޞާހިލު

ގައުމު ހަމަމަގަށް ހިންގޭނީ އުސޫލުތަކާއި ހަރުދަނާ ޕްލޭނެއްގެ ތެރެއިން ކަމަށާއި، އެ ކަމަށްޓަކައި ވަރަށް ގިނަ ޖަޒުބާތުތަކާއި އިހުސާސްތައް އެއްފަރާތްކުރަން ޖެހޭކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާހިލު ވިދާޅުވެއްޖެ އެވެ.

ހަނިމާދޫ އިންޓާނޭޝަނަލް އެއަރޕޯޓު ތަރައްގީ ކުރުމުގެ މަޝްރޫއު ފައްޓަވާދެއްވުމަށް ބޭއްވި ޚާއްސަ ޖަލްސާގައި ވާހަކަދައްކަވަމުން ރައީސް ޞާހިލު ވިދާޅުވީ އެމަނިކުފާނު ވެރިކަމަށް ވަޑައިގަތުމަށްފަހު، ސަރުކާރުގެ ހުރިހާ ކަމެއްވެސް ހިންގަވަމުން ގެންދަވަނީ ވަކި އުސޫލުތަކެއްގެ ތެރެއިން ވަކި ވައްޓަފާޅިއަކަށް ކަންކަން ބައްޓަންކުރައްވައިގެން ކަމަށެވެ.

އެމަނިކުފާނު ވިދާޅުވީ އެ އުސޫލުތަކުގެ މަތިން މުޅި ރާއްޖެއަށް ގެންނަ ތަރައްގީގެ ބަދަލު މިސަރުކާރުން އެންމެ ފުރަތަމަ ފަށަނީ ގަލަމު ތުނޑުން ރަނގަޅަށް ދިރާސާ ކުރައްވައި، ހިސާބު ކިތާބުން ނަތީޖާ ހޯއްދެވުމަށް ކަމަށެވެ. އަދި އެއިން ނިކުންނަ ނަތީޖާތަކުގެ މައްޗަށް ޕްލޭނެއް އެކުލަވާލައިގެން މެނުވީ އެއްވެސް މަޝްރޫއުއެއް ނުފައްޓަވާކަމަށް ރައީސް ވިދާޅުވި އެވެ.

ޕްލޭނެއްގެ ތެރެއިން ނޫނީ ތަރައްގީގެ އެއްވެސް މަޝްރޫއެއް ދެމެހެއްޓެނިވި ގޮތެއްގައި ކުރިއަށް ނުގެންދެނޭވެކަމަށް ރައީސް ޞާހިލު ވަނީ ވިދާޅުވެފައެވެ.

"ވިސްނުމާ ފިކުރާ ޙިކުމަތާ ކެތްތެރިކަމާ ނުލާ، ދެމެހެއްޓެނިވި ތަރައްގީއެއް ނުލިބޭނެ. ހަނިމާދޫ ބައިނަލް އަގްވާމީ އެއާޕޯޓު ގެ މަސައްކަތް މިއަދު މިފެށީ އަޅުގަނޑުމެންގެ ގޮތަށް. ހުއްޓިއޮވެ، ފަހަތަށް ގޮސް، ގެއްލި ހުސްނުވާ ގޮތަށް. މިފެށިގޮތަށް ފެށީމާ މާތްﷲ ގެ އިރާދަޔާއިއެކު ދެން މިކަމެއް ނުހުއްޓޭނެ. ފަހަތަކަށްވެސް ނުދާނެ"

ރައީސް އިބްރާހިމް މުހައްމަދު ޞާލިހު

ހަނިމާދޫ އިންޓަނޭޝަނަލް އެއާޕޯޓް މަތީ ފެންވަރުގެ އެއާޕޯޓަކަށް ބަދަލު ކުރަނީ އިންޑިއާއިން ރާއްޖެއަށް ދީފައިވާ 800 މިލިއަން ޑޮލަރުގެ ކްރެޓިޓް ލައިންގެ ދަށުން، އިންޑިއަން އެގްޒިމް ބޭންކް މެދުވެރިކޮށް 136 މިލިއަން ޑޮލަރުގެ ލޯނަކުންނެވެ.

ރައީސް ޞާލިހު ވިދާޅުވީ، ބޮޑު ތިލަދުންމަތީގެ ރައްޔިތުންގެ އުންމީދުތަކާއި އެ ސަރަހައްދުގެ ތަރައްގީއާއި ގުޅިފައިވާ އެ މަޝްރޫއު ސަރުކާރުން ފެށީ ފުރިހަމަ ދިރާސާއަކަށްފަހު ކަމަށެވެ. ދެން އެ މަޝްރޫއު ނުހުއްޓި ބާރު ސްޕީޑުގައި ކުރިއަށް ދާނެކަމުގެ ޔަގީންކަން އެމަނިކުފާނު ވަނީ ދެއްވާފަ އެވެ.