އާ ސީޕްލޭން ޓާމިނަލް މައްސަލައިގައި އެމްއޭސީއެލުން ސިޓީތަކުގައި ސޮއިކުރި ފަޒީލް ކޮމެޓީއަށް ހާޒިރުކުރަނީ

އެމްއޭސީއެލުން ބޮޑު ހޭދައެއް ކޮށްގެން ވެލާނާ އިންޓަނޭޝަނަލް އެއާޕޯޓުގައި ހަދާފައިވާ އާ ސީޕްލޭން ޓާމިނަލް، ދިގު މުއްދަތަކަށް ކުޑަ އަގެއްގައި ޓީއެމްއޭއަށް ދިނުމާ މެދު އެމްއޭސީއެލުން ޓީއެމްއޭއަށް ފޮނުވި ސިޓީތަކުގައި ސޮއިކުރެއްވި، ހުސެން ފަޒީލް، މާލިއްޔަތު ކޮމިޓީއަށް ހާޒިރުކުރަން ނިންމައިފި އެވެ.

އެމްއޭސީއެލްގެ ކޮމާޝަލް ބައިގެ ޖެނެރަލް މެނޭޖަރުގެ މަގާމުގައި ހުންނެވި ފަޒީލު ހާޒިކުރަން ނިންމާފައިވަނީ މިއަދު ބާއްވާ ކޮމެޓީގެ ބައްދަލުވުމަށެވެ.

ފަޒީލް ހާޒިރުކުރަނީ، އޭނާ ސޮއިކުރައްވައި ފޮނުވި ބައެއް ސިޓީތަކުގައި، ބޯޑުން ނިންމާފައި ނުވާ ކަންކަން ހިމެނޭ ކަމަށް، މާލިއްޔަތު ކޮމިޓީގައި ބޯޑުގެ ބައެއް މެމްބަރުން ވިދާޅުވެފައި ވާތީ އެވެ.

އަދި ޓީއެމްއޭއަށް ލިބުނު އެއް ސިޓީ އާއި އެމްއޭސީއެލްގައި އޮތް ސިޓީގައި ތަފާތުތަކެއް ހުރި ކަން ވެސް ކޮމިޓީ ބައްދަލުވުމުގައި ފާހަގަކުރިއެވެ. އެމައްސަލައިގައި ޖިނާއީ ތަހުގީގެއް ހިންގަން އެމްއޭސީއެލުން ޖާގަ ދޭން ޖެހޭ ކަމަށް، އެމްއޭސީއެލްގެ ގާނޫނީ ވަކީލް މަޒްލާން ރަޝީދު، މާލިއްޔަތު ކޮމެޓީގައި ވާހަކަދައކަވަމުން ވަނީ ވިދާޅުވެފައެވެ.

އޭނާ ސޮއިކުރައްވާފައިވާ ސިޓީތަކަކީ، 55 މިލިއަން ޑޮލަރުގެ ޓާމިނަލް 15 އަހަރަށް ކުއްޔަށް ދޭން އެމްއޭސީއެލުން ވެފައި އޮތް ކޮމިޓްމެންޓެއް ކަމަށް، ޓީއެމްއޭއިން ބުނެފައިވެއެވެ.