ސީޕްލޭން ޓާމިނަލް ހިންގާނީ އެމްއޭސީއެލްއިން: އަމީރު

ވެލާނާ އިންޓަރނޭޝަނަލް އެއާޕޯޓުގައި ގާއިމްކުރި އާ ސީޕްލޭން ޓާމިނަލް އެމްއޭސީއެލް އިން ހިންގަން ނިންމައިފިއެވެ

މިކަން ހާމަކޮށްފައިވަނީ ރައީސުލްޖުމްހޫރިއްޔާާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

މި ބައްދަލުުވުމުގައި ވާހަކަދައްކަވަމުން ފިނޭންސް މިނިސްޓަރ އިބްރާާހިމް އަމީރު ވިދާޅުވީ މި ސަރުކާރުން ވެރިކަމަށް އައިއިރު، ޓީއެމްއޭއިން ދިޔައީ އެކުންފުނިން މިހާރުގެ ޓާމިނަލް ހިންގުމަށް އެމްއޭސީއެލްއަށް ދައްކަމުންދާ ކުލީގައި އާ ސީޕްލޭން ޓާމިނަލް ހިންގުމާއި މެދު ވާާހަކަދައްކަމުން ކަމަށެވެ. ނަމަވެސް އެކަން ކުރިއަށް ނުގެންދިއުމަށް މިދިޔަ އަހަރުގެ ފެބްރުއަރީ މަހުގެ ތެރޭގައި އަންގާފައިވާނެކަމަށް އަމީރު ވިދާޅުވިއެވެ.

އެބޭފުޅާ ވިދާޅުވީ ސީޕްލޭން އޮޕަރޭޓަރުންނަކީ ފަތުރުވެރިކަމުގެ އިންޑަސްޓްރީ ތަރައްޤީކޮށް ދެމެހެއްޓުމުގައި މުހިންމު ރޯލެއް އަދާކުރާ ފަރާތްތަކަކަށްވުމުން، އެފަރާތްތައް ބޭނުންވާާ އިންފްރާސްޓްރަކްޗަރ ސަރުކާާރުން ތަރައްގީކޮށް ހިންގުމަކީ މުހިންމު ކަމެއްކަމަށެވެ.

އަމީރު ވިދާޅުވީ އާ ސީޕްލޭން ޓާމިނަލް އެމްއޭސީއެލުން ހިންގި ނަމަވެސް ޓީއެމްއޭއިން މިހާރު ބޭނުންކުރަމުންދާ ޖާގައާއި އެއްވަރުގެ 6400 އަކަފޫޓުގެ ޖާގައެއް ކުއްޔަށް ދޫކުރާނެކަމަށެވެ. އަކަފޫޓަކަށް މަހަކު 10.35 ޑޮލަރު ދައްކަން ޖެހޭގޮތަށް މި ޖާގަ ކުއްޔަށް ދޫކުރާނީ ދެއަހަރު ދުވަހުގެ މުއްދަތަކަށްކަމަށް އެބޭފުޅާ ފާހަގަކުރެއްވިއެވެ.

މީގެ އިތުރުން މަންޓާ އެއާއަށްވެސް ހަމަ މި ރޭޓުން ލައުންޖް ޖާގަ ދޫކުރާނެކަމަށް އަމީރު ވަނީ ވިދާޅުވެފައެވެ. އަދި ބާކީވާ ޖާގަ ޓެންޑާ އުސޫލުން ދޫކުރުމަށް ނިންމާފައިވާކަމަށް އެބޭފުޅާ ވިދާޅުވިއެވެ.

މި އުސޫލުގެ ދަށުން ޗެކިން ކުރާނެ ޖާގައާއި އޮފީސް ޖާގަވެސް ދެ އަހަރުގެ މުއްދަތަށް ދިނުމަށް ވަނީ ނިންމާފައެވެ.