އައީޖީއެމްއެޗްގައި ވަސީލަތްތައް ނެތީގެން ޑޮކްޓަރުންނާ ނަރުހުން އެހީއަށް އެދެނީ

ސަރުކާރުގެ މައި ހޮސްޕިޓަލް، އައިޖީއެޗްގައި ބަލި މީހުންނަށް ފަރުވާ ދިނުމަށް ބޭނުންވާ އަސާސީ ބައެއް ވަސީލަތްތައް ނެތިގެން ޑޮކްޓަރުންނާ ނަރުހުން އާއްމުންގެ އެހީއަށް އެދެން ފަށައިފިއެވެ.

އައިޖީއެމްއެޗް ގެ ހޭނައްތާ ޑޮކްޓަރު އިސްމާއީލް ލަތީފު ރައީސް އޮފީހާއި، ހެލްތު މިނިސްޓްރީ އަދި ޑަބްލިޔުއެޗްއޯގެ ރާއްޖޭގެ ޓުވިޓާ އެކައުންޓް ތައް ޓެގް ކުރައްވައި ކުރެއްވި ޓުވީޓެއްގައި ވަނީ އެ ހޮސްޕިޓަލުގެ އައިސީޔޫގައި ބޭނުންކުރާނެ ޔޫއެސްޖީ މެޝިނެއް އެއް އިރަކުވެސް ނުހުންނަ ކަމަށެވެ.

އެހެން ނަމަވެސް އެއީ ވަރަށް ބޮޑަށް ބޭނުންވާ މެޝިނެއް ކަމަށާ، އެ މެޝިން ނެތުމުގެ ސަބަބުން ބަލި މީހުންނަށް ފަރުވާ ދިނުމުގައި ބޮޑެތި ދަތިތަކާއި ކުރިމަތިލާންޖެހޭ ކަމަށް އޭނާ ވިދާޅުވި އެވެ.

އަދި ކޮންމެވެސް ފަރާތަކުން އެ ހޮސްޕިޓަލަށް އެފަދަ މެޝިނެއް ހަދިޔާކޮށްދެއްވުމަށްވެސް ޑޮކްޓަރު އެދިލެއްވި އެވެ.

އައިޖީއެމްއެޗް ގައި މިހާރު ޔޫއެސްޖީ މެޝިނު ހުންނަނީ އޮޕަރޭޝަން ތިއޭޓަރުގެ އިތުރުން ފުއްޕާމޭގެ ބަލިތަކަށް ފަރުވާ ދޭ ޑިޕާޓްމެންޓުގައި އެކަންޏެވެ.

އަދި ބަލި މީހުންނަށް ފަރުވާ ދިނުމަށް އެހެން ހުރިހާ ޑިޕާޓްމެންޓަކަށް ގެންދަނީ ފުއްޕާމޭގެ ބަލިތަކަށް ފަރުވާދޭ ޑިޕާޓްމެންޓުގައި ހުރި މެޝިން ކަަމަށް ވާއިރު، އެފަދައިން ހުރިހާ ތަނަކަށް ދުއްވުމުގެ ސަބަބުން އެ މެޝިން މިހާރު ދަނީ ހަލާކުވަމުންކަމަށް ޑރ. އިސްމާއިލް ވިދާޅުވިއެވެ.

ޑރ. އިސްމާއީލް ގެ ޓުވީޓް ރިޓުވީޓް ކުރައްވައި އައިޖީއެމްއެޗުގައި މަސައްކަތް ކުރާ ނަރުހަކުވެސް ވަނީ ބަލި މީހުން އުފުލުމަށް ބޭނުންކުރާ ޕޭޝަންޓް ލިފްޓާއެއް އެހޮސްޕިޓަލަށް ބޭނުންވާކަމަށް ބުނެ، އެ ނެތުމުން ދަތިތަކާއި ކުރިމަތިވަމުންދާތީ އެކަމާއި ކަންބޮޑުވުން ފާޅުކޮށްފަ އެވެ.

އެ ނަރުސ  އިތުރަށް ބުނީ މިފަދަ ވަސީލަތްތަކަކީ އަމިއްލަ ބޭނުމަށް ހޯދާ ތަކެތި ނޫންކަމަށާއި އެއީ ބަލި މީހުންނަށް ފަރުވާ ދިނުމަށް ބޭނުންތެރި އެއްޗެހި ކަމަށެވެ.

އައިޖީއެމްއެޗްގައި ވަސީލަތްތައް ނެތުމުގެ ސަބަބުން އެ ހޮސްޕިޓަލުން ދޭ ހިދުމަތްތަކުގެ ފެންވަރު ދަށްވެ، މަސައްކަތް ކުރާ މުވައްޒަފުންނަށް ވެސް އުނދަގޫ ތައް ތަހައްމަލް ކުރަންޖެހޭ މައްސަލަތައް ދޭތެރެއިން ފެންމަތިވެ އެވެ.