ކޯލިޝަން ހަަދައިގެން ދައުލަތް ބަހާ އުސޫލު ބަލައެއް ނުގަނެވޭ: ޝިފާ

ކޯލިޝަން ހަދައިގެން ދައުލަތް ބަހާ އުސޫލަކީ ބަލައިގަނެވޭނެ ކަމެއް ނޫން ކަމަށް މާލޭ ސިޓީގެ ކުރީގެ މޭޔަރު ޝިފާ މުހައްމަދު ވިދާޅުވެއްޖެ އެވެ.

ޝިފާ މިފަދައިން ވިދާޅުވެފައިވަނީ އެމްޑީޕީގެ ރިޔާސީ ޓިކެޓު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ރަސްމީކޮށް އެރުވުމާއި ހަމަ ވިދިގެން ކަހަލަ ގޮތަކަށް، ރައީސް ޞާލިހުގެ އަރިސް ދެ ބޭފުޅުން ޖުމްހޫރީ ޕާޓީގެ ލީޑަރާއި ބައްދަލުކުރެއްވުމާއި ގުޅިގެން ކުރެއްވި ޓްވީޓެއްގައެވެ.

ރައީސް ޞާލިހުގެ އަރިސް އެ ދެބޭފުޅުން ޤާސިމާއި ބައްދަލުކުރެއްވުމަށްފަހު ވަނީ އެ ބައްދަލުވުމަކީ އުންމީދީ ބައްދަލުވުމެއްކަމަށް ވިދާޅުވެފަ އެވެ. އަދި ސަރުކާރުގެ މިސްރާބު ހުރީ ކޯލިޝަނާއެކު އިންތިޚާބު އެއްބުރުން ކާމިޔާބުކުރުމަށް ކަމަށް، ޤާސިމްއާއި ބައްދަލުކުރެއްވި މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެފައި ވެއެވެ.

އަލީ ނިޔާޒުގެ އެ ވާހަކަތަކާއި ގުޅިގެން ނުރުހުން ފާޅުކުރައްވާ ޝިފާ ވިދާޅުވީ ބައި އަޅާއިރު ސިޔާސީ ޕާޓީތަކަށް އޮތް ބުރަދަން އެނގޭނީ ބަރުލަމާނީ ނިޒާމަކަށް ގޮސް ސިޔާސީ ޕާޓީތަކަށް ރައްޔިތުން ވޯޓު ދޭ މިންވަރު ދެނެގަނެގެން ކަމަށެވެ.

މިހާރު މި އޮތް ނިޒާމުގައި ކޮންމެ ފަހަރަކު ވެރިކަމަށް އައުމަށް، ކޯލިޝަނެއް ހަދާ، އެ ކޯލީޝަނުގައި ބައިޔަތު ހިފާ ސިޔާސީ ޕާޓީތަކަށް ބައިއަޅާ އުސޫލުން ގައުމު ވިއްކާލުމަކީ އެއްގޮތަކަށްވެސް ބަލައިގަނެވޭ ކަމެއް ނޫންކަމަށް ޝިފާ ވިދާޅުވި އެވެ.

"ކޯލިޝަން ހަދައިގެން ދައުލަތް ބަހާލުން މީ ގަބޫލުކުރެވޭ ކަމެއް ނޫން. ބައި އަޅާއިރު އޮތީ ކޮން ބުރަދަނެއްކަން އެނގޭނީ ބަރުލަމާނީއަށް ގޮސް ޕާޓީތަކަށް ރައްޔިތުން ވޯޓު ދޭ ގޮތުން. ނޫނީ ބޭނުންވާ ގޮތަށް ބައި އަޅައިގެން ގައުމު އެކުގައި ވިއްކާލުމަކީ ގަބޫލު ކުރެވޭ އުސޫލެއް ނޫން"

މާލޭ ސިޓީގެ ކުރީގެ މޭޔަރު ޝިފާ މުހައްމަދު

ކޯލިޝަން ހަދައިގެން ވެރިކަމަށް އައުމާއި ދެކޮޅަށް ޝިފާ ވަކާލާތު ކުރައްވާފައިވާއިރު، 2018 ވަނަ އަހަރު ވެރިކަން ހޯދުމަށް އެމްޑީޕީއިން ކޯލިޝަން ހަދައި، މިހާތަނަށް އެ ކޯލިޝަން ދެމެހެއްޓުމަކީ ކާމިޔާބީއެއްގެ ގޮތުގައި ރައީސް ޞާލިހު ގެންދަވަނީ ފާހަގަކުރައްވަމުން ނެވެ.

އެއްވެސް ސިޔާސީ ޕާޓީއަކަށް ގިނިކަންޏާ ނިކުމެ ރިޔާސީ އިންތިޚާބު ކާމިޔާބުކުރެވިދާނެ ކަމަށް އެމަނިކުފާނު ގަބޫލެއް ނުކުރައްވައެެވެ. އަދި ވެރިކަން ހޯދުމަށް އެމަނިކުފާނު ގެންގުޅުއްވާ "މުޖައްރިބު" ފޯމިއުލާއަކީވެސް ގިނަ ސިޔާސީ ޕާޓީތަކެއް އެކުލެވޭ ކޯލިޝަނެއްގެ ތެރެއިން ވެރިކަން ހޯދުމެވެ.