ކޯޓުގައި ހެކި ބަސް ދޭން ދެކޮޅު ހަދައިފި ނަމަ ތިން މަސް ދުވަހަށް ޖަލަށް!
ޖިނާއީ މައްސަލަތަކުގައި ހެކިބަސް ދޭން ދެކޮޅު ހަދާ މީހުން ގިނަވެގެން ތިން މަހަށް ޖަލަށްލުން ނުވަތަ ގޭ ބަންދުކުރަން ވަގުތުން ހުކުމް ކުރެވޭ ގޮތަށް ގަވާއިދު އެކުލަވާލައި އަމަލުކުރަން ފަށައިފި އެވެ.
މިއީ ހެކި ބަސް ދިނުމަށް ދެކޮޅު ހަދާ މީހަކަށް މިފަދަ ފިޔަވަޅެއް އެޅުމުގެ ބާރު ކޯޓަކަށް ލިބިދޭގޮތަށް ގަވައިދެއް އެކުލަވައިލި ފުރަތަމަ ފަހަރެވެ.
މި ގަވާއިދަށް ސުޕްރީމް ކޯޓުން އިއްޔެ އަމަލުކުރަން ފަށާފައިވާއިރު އޭގައި ވާގޮތުން، ހެކިބަސް ދިނުމަށް މީހަކު ކޯޓަށް ހާޒިރުވާން ދެކޮޅު ހަދާނަމަ، އެފަރާތެއް ބަންދުގައި ބަހައްޓައިގެން ކޯޓަށް ހާޒިރު ކުރެވޭނެ އެވެ.
އަދި ކޯޓަށް ހާޒިރުވެ ހެކި ބަސް ދޭ މީހާ، ނުވަތަ ބަންދުގައި ހުރެ ހެކި ބަސް ދޭން ކޯޓަށް ހާޒިރު ކުރާ މީހާ ދާއިރާގެ ތެރެއިން ކުރާ ސުވާލުތަކަށް ޖަވާބުދޭން ދެކޮޅު ހަދައި އިންކާރު ކުރާނަމަ، ނުވަތަ އެއްވެސް ޖަވާބެއް ނުދީފި ނަމަ ސުވާލަށް ޖަވާބުދޭން އެންގުމުގެ އިހުތިޔާރު ކޯޓަށް ލިބިގެންވެ އެވެ.
“މި މާއްދާގެ (ވ) ގައި ވާގޮތުގެ މަތިން ކޯޓުން އަންގާ އެންގުމަށް ހެކި ބަސް ދޭ މީހާ އަމަލުނުކޮށްފި ނަމަ އެ މީހަކު ޝަރީއަތުގެ ނިޒާމާއި ހިލާފުވާފަދަ އަމަލެއް ކުރީކަމަށް ބަލައި ވަގުތުން އަދަބު ކަނޑައެޅުމުގެ އިހުތިޔާރު މައްސަލަ ބަލާ ފަނޑިޔާރަށް ލިބިގެންވެ އެވެ” ގަވާއިދުގައި ވެއެވެ.
އެގޮތުން ޖިނާއި މައްސަލައެއްގައި ހެކިބަސް ދޭން ދެކޮޅު ހަދައިފިނަމަ، ގާނޫނުގެ ދަށުން ތިން މަހަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ ގޭގައި ބަންދު ކުރުން ނުވަތަ ގިނަވެގެން 10،000ރ. އިން ޖޫރިމަނާ ކުރަން ވަގުތުން ހުކުމް ކުރަން ޖެހޭނެ ކަމަށް އެ ގަވާއިދުގައިވެ އެވެ.
ގަވާއިދުގައި ވާގޮތުން އާއިލީ ގުޅުމެއް އޮތުމުގެ ސަބަބުން ހެއްކާބެހޭ ގާނޫނުގެ ދަށުން ހެކިބަސް ދޭން ދެކޮޅު ހެދުމުގެ ބާރު އޮންނަ މީހުންނާއި އެ ގާނޫނުގެ ދަށުން ހެކިބަސް ދޭން ލާޒިމް ނުކުރެވޭނެ މީހުން ފިޔަވައި ދެން ތިބި އެންމެންނަށް އެ ގަވާއިދުގެ ދަށުން ފިޔަވަޅު އެޅިދާނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
