ރައީސް ނަޝީދަށް ހަމަލާ ދިން މައްސަލަ މިއަހަރު ނިންމަނީ

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ބޮމުގެ ހަމަލާއެއް ދިން މައްސަލައިގެ ހުކުމް އަންނަ އޮގަސްޓު މަހުގެ 31 ވަނަ ދުވަހު ކުރާ ގޮތަށް، ޝަރީއަތް ކުރިއަށް ގެންދާނެ ގޮތުގެ ތާވަލެއް އަރުވައިފިއެވެ.

ގިނަ ދުވަހު މައްސަލަ ހުއްޓިފައި އޮތުމަށްފަހު ކުރިޔަށް ގެންދަން ފަށާފައިވާ މި މައްސަލައިގެ އިފްތިތާހީ ބަޔާން އިއްވައި މިއަދު ވަނީ ޝަރީއަތް ފަށައިފަ އެވެ.

މިއަދުގެ އަޑުއެހުމުގައި މައްސަލަ ބައްލަވާ ގާޒީ، ސޮފްއަތުވަނީ ކުރިއަށް ހުރި ޝަރީއަތުގެ އަޑުއެހުންތައް ކުރިއަށް ގެންދާނެ ގޮތުގެ ތާވަލު ހިއްސާ ކުރައްވާފައެވެ. އެ ތާވަލާ އެއްގޮތަށް ކުރިއަށްދާނަމަ 31 އޯގަސްޓު 2023 ގައި މައްސަލައިގެ ޙުކުމް ކުރެވޭނެކަމަށް ލަފާ ކުރައްވާ ކަމަށް ގާޒީ ވިދާޅުވިއެވެ.

ނަމަވެސް ދިފާއީ ހެކިންގެ ހެކިބަސް ނަގަން އޮތް ފަހު އަޑުއެހުމާއި ހުލާސާ ބަޔާން އިއްވަން ތާވަލުގައި އޮތް އަޑުއެހުމާ ދެމެދު އެންމެ 16 ދުވަސް އޮތުމުން ހުލާސާ ބަޔާން އިއްވަން އޮތް ތާރީހު ފަސްކޮށްދޭން ބައެއް ދިފާއީ ވަކީލުން އެދިފައިވާތީ އެ ކަމަށް ޝަރީއަތުން ފަހުން ރިއާޔަތްކުރައްވާނެ ކަން ފާހަގަކުރައްވައި ގާޒީ ވިދާޅުވީ އެ ތާރީހު ފަސްކުރާނަމަ، ހުކުމް ކުރަން ތާވަލުގައި މިހާރު އޮތް ތާރީހު ވެސް އެއަށް ވުރެ ފަސްވާނެ ކަމަށެވެ.

ރައީސް ނަޝީދަށް ދިން ހަމަލާއާ ގުޅިގެން ކްރިމިނަލް ކޯޓުގައި 10 މީހެއްގެ ޝަރީއަތް ކުރިއަށްގެންދެއެވެ. އެ މައްސަލާގައި ދައުވާ އުފުލި މީހުންގެ ތެރެއިން މިހާތަނަށް ހުކުމްކޮށްފައި ވަނީ ވ. ތިނަދޫ، ހިޔާ، އަދުހަމް އަޙްމަދު ރަޝީދުގެ މައްޗަށެވެ.

ރައީސް ނަޝީދު އަވަހާރަކޮށްލަން އައިއީޑީ ގޮއްވާލިކަމަށް އިއުތިރާފުވި އަދުހަމަށް އިއްވާފައި ވަނީ 23 އަހަރުގެ ޖަލު ހުކުމެކެވެ.

ދެން މި މައްސަލާގައި ހައްޔަރުކޮށްފައިވާ، ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ. މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށްފަހު އަދުހަމް ފިލުވަން މަސައްކަތް ކުރިކަމަށް ތުހުމަތުކޮށެވެ. އަދި ތަހުމީނުގެ މައްޗަށް ގޮވާތަކެތި އެހެން ތަނަކަށް ގެންދިއުމަށް އެހީތެރިވެދިން ކަމެވެ.