ގުރައިދޫ އިންތިޚާބަށް 13 ދުވަހުން 170 މިލިއަން އާސަންދައަށް އެކަނި ޚަރަދުކުރި: ސައީދު

ގުރައިދޫ އިންތިޚާބާއި ދިމާކޮށް ދައުލަތުން 13 ދުވަސްތެރޭ 170 މިލިއަން ރުފިޔާ ޚަރަދުކޮށްފައިވާކަމަށް މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.

ސައީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.

ގުރައިދޫ ދާއިރާގެ ގޮނޑި ހޯދުމަށް ސަރުކާރުން ނުފޫޒު ފޯރުވާފައިވާ މިންވަރަށް އަލިއަޅުވާލައްވާ ސައީދު ވިދާޅުވީ އެ އިންތިޚާބާއި ދިމާކޮށް އެންސްޕާގެ ޑެސްކެއް ދާއިރާގައި ބެހެއްޓި ކަމަށެވެ.

އެ ޑެސްކު ބަހައްޓާފައިވަނީ ގެސްޓު ހައުސްއެއްގެ ތެރޭގައި ކަމަށާއި، އެ އިންތިޚާބާއި ދިމާކޮށް އާސަންދަ މެދުވެރިކޮށްވެސް ބޮޑެތި ޚަރަދުތަކެއް ކުރައްވާފައިވާކަމަށް ސައީދު ވިދާޅުވި އެވެ.

އެގޮތުން ގުރައިދޫ އިންތިޚާބުގައި 13 ދުވަސް ތެރޭ 170 މިލިއަން ދައުލަތުން ޚަރަދުކޮށްފައިވާއިރު ސަރުކާރުގެ ބައެއް ކުންފުނިތަކުގެ ވަސީލަތްތައްވެސް އިންތިޚާބާއި ދިމާކޮށް ބޭނުން ކުރަމުން ދިޔަކަން ސައީދު ފާހަގަކުރެއްވި އެވެ.

އޭގެ ތެރޭގައި ސްޓެލްކޯގެ ލޯންޗުތައް ބޭނުންކޮށް ސްޓެލްކޯގެ ވަޒީފާތައް ދާއިރާގެ މީހުންނަށް އިންތިޚާބުގެ ތެރޭގައި ދީފައިވާކަމަށް ސައީދު ވިދާޅުވި އެވެ.

"މިއަހަރުގެ ފުރަތަމަ 3 މަސްތެރޭ އާސަންދައިގެ 60% ހުސްކޮށްލައިފި. ރައީސް އޮފީސްތެރޭ ޚާއްސަ ޑިޕާޓުމަންޓެއް ހަދައިގެން ރައީސް ޞާލިހަށް ވާގިވެރިވާ ގިނަ އަދަދެއްގެ މަޖިލިސް މެމްބަރުންގެ އެންގުމަށް އާސަންދަ އޮޕަރޭޓު ކުރަނީ. ފިއްކަނޑައިގެންދާ އަދަދެއް މި އޮތީ އަނެއްކާ 13 ދުވަހުން ގުރައިދޫ އިންތިޚާބުގެ އެންމެ 13 ދުވަހުން، ކޮންމެ ދުވަހަކު 13 މިލިއަން އާސަންދައަށް ޖުމްލަ 170 މިލިއަން މި އޮތީ އާސަންދައިގެ ނަމުގައި މި އޮތީ ޚަރަދުކޮށްފައި. އެސްޕާގެ ކައުންޓަރު ހުރީ ގެސްޓު ހައުސްގެ އެތެރޭގައި ބަހައްޓާފަ"

މާވަށު ދާއިރާގެ މެމްބަރު މުޙައްމަދު ސައީދު

މި ސަރުކާރުން އުފައްދަމުންދާ ދަރަންޏާއި ގުޅިގެންވެސް ސައީދުގެ ވާހަކައިގައި ވަނީ ކަންބޮޑުވުން ފާޅުކޮށްފަ އެވެ.

ސައީދު ވިދާޅުވީ މި ސަރުކާރުން އެކަނި 60 ބިލިއަން ރުފިޔާ ދަރަނީގެ ގޮތުގައި އުފައްދާފައިވާ ކަމަށެވެ. އެހެން ނަމަވެސް އެހާ ބޮޑެތި ދަރަނިތައް އުފައްދައިގެން މިހާތަނަށް ސަރުކާރުން އެއްވެސް އެސެޓެއް އުފައްދާފައު ނުވާކަމީ އިޤްތިޞާދީ ނަޒަރަކުން ބަލާއިރު ވަރަށް ބޮޑު ކަންބޮޑުވުމެއް އޮތް ކަމެއް ކަމަށެވެ.

ސަރުކާރުގެ ދަރަނި އިންތިހާއަށް ބޮޑުވެފައިވާ މި ދަނޑިވަޅުގައި ކޮތަޅު ޓެކްސްގެ ގޮތުގައި ކޮންމެ ކޮތަޅަކުން ދެ ރުފިޔާ ނެގުމަށް ނިންމި ނިންމުމަކީވެސް ރައްޔިތުންނަށް އުފުލަން ޖެއްސި ބޮޑު ތަކުލީފެއްގެ ގޮތުގައި ސައީދު ފާހަގަކުރެއްވި އެވެ.