ދޮގު ޚަބަރު ފަތުރަނީ ޕީޕީއެމް ބައިކުރަން، އަޑީގައި އޮތީ ސަރުކާރު: އަބްދުއްރަހީމް
ޕީޕީއެމްގެ ރިޔާސީ ކެންޑިޑޭޓާއި ގުޅިގެން ޕާޓީގެ ލީޑަަޝިޕްގައި ޚިޔާލު ތަފާތުވުންތަކެއް އުޅޭކަމަށް ބުނެ މީޑިއާތަކުގައި ޚަބަރުތައް ފަތުރަމުންދަނީ ޕީޕީއެމް ބައިބައި ކުރުމަށް ކަމަށާއި، އެކަމުގެ ފަހަތުގައި އޮތީ ސަރުކާރު ކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައިވަނީ ޕީޕީއެމްގެ ރިޔާސީ ޓިކެޓާއި މެދު ޕާޓީގެ ލީޑަޝިޕްގެ މެދުގައި ޚިޔާލު ތަފާތުވުންތައް އޮތްކަމަށް ބައެއް މީޑިއާތަކުން ފަތުރަމުންދާ ޚަބަރު ދޮގުކުރައްވާ ޗެނަލް-13 އަށް ދެއްވި އިންޓަވިއުއެއްގަ އެވެ.
އަބްދުއްރަހީމް ވިދާޅުވީ ޕީޕީއެމްގެ ރިޔާސީ ޓިކެޓު ރައީސް ޔާމިނާއި ހަވާލުކުރުމަށް އެންމެ ފުރަތަމަ ނިންމީ ލީޑޝިޕުން ކަމަށެވެ. އެފަހުން އެ ނިންމުން ސެނެޓަށް ގެންގޮސް ސެނަޓުގެ އިއްތިފާގުން ވަނީ ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓުކަމަށް ފާސްކޮށްފައި ކަމަށެވެ.
2023 ވަނަ އަހަރުގެ ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމީންކަމާމެދު ޕާޓީގެ ލީޑަޝިޕްގައި އެއްވެސް ކަހަލަ ޚިޔާލު ތަފާތުވުމެއް ނެތް ކަމަށާއި، އެމަނިކުފާނަށް ވާދަނުކުރެވޭނެ ހާލަތަކާއި ދޭތެރޭގައި ވިސްނުން ނުގެންގުޅުއްވާކަމަށް އަބްދުއްރަހީމް ވިދާޅުވި އެވެ.
އޭނާ ވިދާޅުވީ ޕީޕީއެމްގެ ތެރޭގައި ބައިބައިވުން އުފެއްދުމަށް މީޑިއާތައް މެދުވެރިކޮށް މަސައްކަތް ކުރަމުންދަނީ ސަރުކާރު އަޑީގައި އޮވެގެން ކަމަށެވެ. މަޤްޞަދަކީ ޕީޕީއެމް ބައިބައިކޮށް ބަލިކަށިކޮށްލުން ކަމަށް އޭނާ ވިދާޅުވި އެވެ.
"މިއަދު ޕީޕީއެމް-ޕީއެންސީ ބައިބައިކޮށްލުމަށްޓަކައި ހުރިހާ ފަރާތްތަކުން ވަރަށް ވަރުގަދައަށް ފާޅުކަން ބޮޑު ގޮތެއްގައި އެ ގެންދަނީ މަސައްކަތް ކުރަމުންނޭ. އެހެންވީމަ ޕީޕީއެމް ލީޑަޝިޕް ބަދުނާމުކޮށްވެސް ވާހަކަ ދައްކާނެ. އަދި ރައީސް ޔާމިނަށް ހުތުރުވާގޮތަށްވެސް ވާހަކަދައްކާނެ. ޕީޕީއެމްގެ ތެރޭގައި މައްސަލަ އޮތްކަމަށް ދައްކަންވެސް ބޭނުންވާނެ. އެ ހުރިހާކަމަކީ ޕީޕީއެމް ރައީސް ޔާމީން ފަހަތްޕުޅުގައި ވޭތުވެދިޔަ ތާގައި ސާބިތުވެ އޮތްލެއް ވަރުގަދަވީމަ އެހެންމީހުންނަށް އުނދަގޫވަނީ. އެހެންވީމަ މިކަން ކުރަން ބޭނުންވެގެން މި އުޅެނީ. މީގެ އެންމެ އަޑީގައި އޮންނާނީ ދިވެހި ސަރުކާރު"
ޕީއެންސީގެ ރައީސް އަބްދުއްރަހީމް އަބްދުﷲ
އަބްދުއްރަހީމް ވަނީ ޕީޕީއެމްގެ ތެރޭގައި މައްސަލަ އުފެއްދުމަށް މީޑިއާތަކުން ފަތުރަމުންދާ ޚަބަރުތަކަށް ސަމާލުވުމަށް ޕީޕީއެމްގެ އާންމު މެމްބަރުންނާއި ރައީސް ޔާމީންގެ ސަޕޯޓަރުންނަށް އިލްތިމާސް ކުރައްވާފަ އެވެ.
އޭގެ އިތުރުން ޕީޕީއެމްގެ ލީޑަޝިޕުން އަދި ޕާޓީގެ ހުރިހާ ގުނަވަންތަކުން ވެސް މަސައްކަތް ކުރަމުންދަނީ ރައީސް ޔާމީން އަނބުރާ ވެރިކަމަށް ގެނައުމަށްކަމަށް އަބްދުއްރަހީމް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
