މަސް ކިލޯއެއްގެ އަގު 20 ރުފިޔާގައި ހިފަހައްޓާނަން: ޑރ މުއިއްޒު
ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި މަސް ކިލޯއެއްގެ އަގު 20 ރުފިޔާއަށް ވުރެ ދަށް ނުވާނެގޮތަށް ހިފަހައްޓަވާނެކަމުގެ ޔަގީން ކަން އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ދެއްވައިފި އެވެ.
ޑރ މުއިއްޒު މިފަދައިން ވިދާޅުވެފައިވަނީ މ ދިއްގަރުގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. އެ ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ މަސްވެރިކަމުގެ ސިނާއަތަކީ ރައީސް ޔާމީން ޚާއްސަ އިސްކަމެއް ދެއްވާ، ކޮޅަށް ޖައްސަވަން މަސައްކަތް ކުރައްވާ ސިޔާސަތެއް ކަމަށެވެ.
ރައީސް ޔާމިނުގެ މެނިފެސްޓޯގައި ވެސް މަސްވެރިކަމަށް ޗެޕްޓަރެއް ޚާއްސަ ކުރައްވާފައިވާ ކަމަށާއި، އޭގައި ހުރި ކަންކަން ތަންފީޒުކުރައްވާނެ ކަމުގެ ޔަގީންކަން ޑރ މުއިއްޒު ވިދާޅުވި އެވެ.
މަސް ކިލޯއެއް މިހާރު ގަންނަމުންދަނީ އެކަށީގެންވާ އަގެއްގައި ނޫންކަން ފާހަގަކުރައްވާ ޑރ މުއިއްޒު ވިދާޅުވީ އެމަނިކުފާނަށް ވެރިކަން ލިބިވަޑައިގެންފި ނަމަ މަސް ކިލޯއެއްގެ އަގު 20 ރުފިޔާގައި ހިފަހައްޓަވާނެ ކަމަށެވެ. އަދި އެ އަގު ވެއްޓުނަ ނުދެއްވާ ބޮޑު ކުރުމަށް މަސައްކަތްޕުޅު ކުރައްވާނެ ކަމަށެވެ.
ޑރ މުއިއްޒުގެ ވާހަކަފުޅުގައި ވަނީ ދިއްގަރުގައި ކޮށްދެއްވާނެ މުހިންމު ކަންކަމަށް އަލިއަޅުވާލައްވާފަ އެވެ. އެގޮތުން މި ރަށުގައި މިހާރު ފަށާފައިވާ ބައެއް މަޝްރޫއުތައް، އޭގެ ތެރޭގައި ބިން ހިއްކުމުގެ މަޝްރޫއު، ރައްޔިތުން ބޭނުންވާ ގޮތަށް ބަދަލުކުރައްވާނެ ކަމަށް ޑރ މުއިއްޒު ވިދާޅުވި އެވެ.
އޭގެ އިތުރުން ސުކޫލަށް ބޭނުންވާ ޓީޗަރުން ހަމަކުރުމާއި ކުނި މެނޭޖުކުރުން ފަދަ އަސާސީ ކަންކަން ކަށަވަރުކުރައްވާނެކަމަށް ޑރ މުއިއްޒު ވިދާޅުވި އެވެ.
ޑރ މުއިއްޒު ވިދާޅުވީ އެމަނިކުފާނު ވެ ވަޑައިގަންނަވާނީ ރައްޔިތުންގެ އަޑުއަހާ ރައްޔިތުންނާއި ގާތުން މަސައްކަތްކުރައްވާ ލީޑަރަކަށް ކަމަށެވެ. ތަރައްގީގެ މަޝްރޫއުތަކަކީ ރައްޔިތުންނަށްޓަކައި ހިންގާ މަޝްރޫއުތަކެއް ކަމުން، އެ މަޝްރޫއުތައް ހިންގާނީ ރައްޔިތުންގެ ތާއީދާއި އެކުގައި ކަމަށް ޑރ މުއިއްޒު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
