އަންނަ އަހަރުގެ ސެޕްޓެމްބަރުމަހު ހުވަދުއަތޮޅުގައި ސްޕީޑް ފެރީގެ ޚިދުމަތް ފެށޭނެ: އަސްލަމް

އަންނަ އަހަރުގެ ސެޕްޓެމްބަރު މަހުގެ ތެރޭގައި ހުވަދު އަތޮޅުގައި ހައި ސްޕީޑް ފެރީގެ ޚިދުމަތް ފަށާނެކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާރ ސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ، އެމްޓީސީސީގެ އައު ޑްރެޖަރ މަހާ ޖައްރާފް އިފްތިތާހު ކުރުމަށް ގއ. ދާންދޫގައި ބޭއްވި ޚާއްސަ ރަސްމިއްޔާތެއްގައި ވާހަކަ ދައްކަވަމުންނެވެ.

މިނިސްޓަރ ވިދާޅުވީ، މިސަރުކާރުގެ އަމާޒަކީ މުޅި ރާއްޖެ ދަތުރު ފަތުރުގެ ނިޒާމްމުން ގުޅާލުން ކަމަށާއި، އެމްޓީސީސީން މިހާޜުވެސް ދެމުންދާ އާރްޓީއެލް ފެރީގެ ޚިދުމަތް ގިނަ ބަޔަކު ބޭނުންކުރަމުންދާ ކަން ފާހަގަކުރެެއްވިއެވެ.

އެގޮތުން މި ޚިދުމަތް ފުޅާކުރުމަށްޓަކައި ގިނަ މަސައްކަތްތަކެއް ކުރައްވަމުންދާކަން ފާހަގަކުރައްވަމުން، މިނިސްޓަރ ވިދާޅުވީ، އަންނަ އަހަރުގެ ސެޕްޓެމްބަރު މަހުގެ ތެރޭގައި ހުވަދު އަތޮޅުގައި ހައި ސްޕޯޑް ފެރީގެ ޚިދުމަތް ފައްޓަވާނެ ކަމަށެވެ.

މިނިސްޓަރ އިތުރަށް ވިދާޅުވީ، މި ސަރުކާރުގެ ތަޞައްވަރަކީ ރަށްތައް އެއްފަސްކުރުން ނޫންކަން ކަމަށާއި، ސަރުކާރުގެ ވިސްނުމަކީ ރަށްތައް ތަރައްޤީކޮށް އެރަށަކުން ޚިދުމަތް ލިބި އެހެން ރަށްރަށުގެ މީހުންވެސް އެ ރަށްތަަކަށް ދެވޭނެ އިންތިޒާމް ހަމަޖެއްސުންކަމަށެވެ.

އެމްޓީސީސީގެ ބޮޑު ޖައްރާފުން އެންމެ ފުރަތަމަވެސް ހިއްކަނީ ދާންދޫ ބިން ހިއްކުމުގެ މަސައްކަތެވެ. ބޮޑު ޖައްރާފާ ބޭނުންކޮށްގެން ދާންދޫ ބިން ހިއްކުމުގެ މަޝްރޫޢު ނިމޭއިރު މިހާރު ދާންދޫގައި އޮތްވަރުގެ ޖާގައިގެ ބިމެއް އެރަށަށް އިތުރު ކުރެވިގެންދާނެއެވެ. އަދި ދާންދޫއާއި އަލަށް ހިއްކާ ބިން ގުޅާލެވިގެންދާނީ ބްރިޖަކުންނެވެ. މުޅި މި މަޝްރޫޢު ނިމިގެންދާއިރު ރައްޔިތުން މޫދަ އެރި ހިތް އުފާކޮށްލާނެ އަތިރިމަތިތައްވެސް ލެވިގެންދާނެކަމަށް އެމްޓީ.ސީ.ސީން ވިދާޅުވެއެވެ.

ދާންދޫ ބިން ހިއްކުމުގެ މަޝްރޫޢުގެ ދަށުން ޖުމްލަ 25 ހެކްޓަރު ހިއްކާނެއެވެ. އަދި އެސަރަޙައްދު ޙިމާޔަތްކުރުމަށް 1238 މީޓަރުގެ ބޮޑުހިލައިގެ ތޮއްޓަކާއި 240 މީޓަރުގެ ހުރަސްތޮއްޓެއްލުމަށްވަނީ ހަމަޖެހިފައެވެ.