ޗައިނާއިން މާލެއަށް 3،000 މަގުބައްތި ހަދިޔާކޮށްފި

ޗައިނާ ސަރުކާރުން މާލޭ ސިޓީ ކައުންސިލަށް 3000 މަގުބައްތި (ޒަމާނީ ލެޑް ކައިޓް) މިއަދު ހަދިޔާކޮށްފި އެވެ.

މިތަކެތި ސިޓީ ކައުންސިލާއި ހަވާލު ކޮށްފައިވަނީ މިއަދު ހެނދުނު 11:00 ގައި މާލެ ސިޓީ ކައުންސިލްގެ މީޑިއާ ސެންޓަރުގައި ބޭއްވި ހާއްސަ ހަފްލާއެއްގައެވެ.

މާލޭ ސިޓީ ކައުންސިލުގައި ބޭއްވި ރަސްމިއްޔާތެއްގައި އެތަކެތި ކައުންސިލާ ހަވާލުކުރެއްވީ ޗައިނާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވާންގް ލިޖިން އެވެ. މި ލައިޓް ތަކަކީ ދެގައުމުގެ ގުޅުމަށް 50 އަހަރު ފުރުމުގެ މުނާސަބަތާއި ގުޅުވައި ހަދިޔާކުރި ލައިޓްތަކެއް ކަމަށް ޗައިނާ ސަފީރު ވިދާޅުވިއެވެ.

ސަފީރު ވިދާޅުވި ގޮތުގައި އަންނަ މަހު، ރާއްޖެ އާއި ޗައިނާގެ ހާރިޖީ ގުޅުމަށް 50 އަހަރު ފުރޭއިރު ދެ ގައުމުން އަބަދުވެސް ވަނީ އެއް ގައުމު އަނެއް ގައުމަށް އިހުތިރާމުކޮށް ހަމަހަމަ ކަމާއެކު އެ ގުޅުން ދެމެހެއްޓުމަށާއި އެހީތެރިކަން ފޯރުކޮށްދީފައި ކަމަށެވެ. އެ ގުޅުމުގެ ސަބަބުން މާލެ ސަރަހައްދަށް ގިނަ ފައިދާތަކެއް ލިބިފައިވާކަން ވެސް ސަފީރު ފާހަގަކުރެއްވި އެވެ.

އެ ރަސްމިއްޔާތުގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ މާލޭގައި އުޅޭ މީހުންގެ ރައްކާތެރިކަމާއި ފަސޭހައަކަށް ޗައިނާ އެމްބަސީ މެދުވެރިކޮށް ލިބުނު ހަދިޔާގެ ސަބަބުން މާލޭ އާއި ވިލިމާލޭގެ ހުރިހާ ބައްތިތަކެއް ޒަމާނަށް ފެތޭ ބައްތިތަކަކަށް ބަދަލުކުރެވޭނެ ކަމަށެވެ.

މޭޔަރުގެ ވާހަކަފުޅުގައި މާލޭގެ އުމްރާނީ ތަރައްޤީއަށް އަދި ރައްޔިތުންގެ ދިރިއުޅުމުގެ ކުރިއެރުމަށް އަބަދުވެސް ޗައިނާއިން ވެދެމުންދާ ދީލަތި އެހީތެރިކަމަށް ޗައިނާ ސަރުކާރަށް ވަނީ އިޚްލާސްތެރި ޝުކުރެއް ދަންނަވާފައެވެ.

ޗައިނާއިން ރާއްޖޭގެ ތަރައްޤީއަށް ކޮށްދެއްވާ މަސައްކަތްތައް ފާހަގަކުރައްވާ ދެއްކެވި ވާހަކަފުޅުގައި މޭޔަރު މުޢިއްޒު ވަނީ ކުރީގެ ރައީސް ޔާމީން އަބްދުލްޤައްޔޫމްގެ ވެރިކަމުގައި ޗައިނާ ސަރުކާރުގެ އެހީގައި އެޅި ސިނަމާލެ ބްރިޖްގެ މަޝްރޫއުއަށް އަލި އަޅުއްވާލައްވާފައެވެ.