އަބަދު ބިސްކޯދު ނުގަނެ، މިގޮތަށް ޗޮކްލެޓް ޗިޕްސް ކޫކީސް ހަދާލަބަ!

މިއަދު "ވޮއިސް" ގެ ބަދިގެއިން ނި ގެނެސްދެނީ ޗޮކްލެޓް ޗިޕްސް ކޫކީސް ހަދާނެގޮތެވެ. ޗޮކްލެޓް ޗިޕްސް ކޫކީސް އަކީ ހުހާއި ކާންވެސް އަދި ސަޔާއި އެކީ ކާންވެސް މީރު، އަދި ހަދާލަންވެސް މާ ބޮޑު މަސައްކަތްތަކެއް ކުރަން ނުޖެހޭ އެއްޗެކެވެ. އަބަދު ފިހާރައިން ބިސްކޯދު ގަތުމުގެ ބަދަލު މިގޮތަށް ކޫކީސް ހަދާލާފައި ބެހެއްޓުމުން އަތުން ދާ ޚަރަދުވެސް މާ ކުޑަ ވާނެއެވެ.

ބޭނުންވާތަކެތި

1 ޖޯޑު އަން-ސޯލްޓެޑް ބަޓަރ (މަޑު ކޮށްފައި(ސޮފްޓެންޑް ބަޓަރ))

1/2 ޖޯޑު އާދައިގެ ހަކުރ

1 ޖޯޑު ބްރައުން ޝުގަރ

2 ބިސް

2 މޭޒުމަތީ ސަމުސާ ވެނީލާ އެސެންސް

3 ޖޯޑު ފުށް

1 މޭޒުމަތީ ސަމުސާ ބޭކިންގ ޕައުޑަރ

1 މޭޒުމަތީ ސަމުސާ ލޮނު

2 ޖޯޑު ޗޮކްލެޓް ޗިޕްސް

ތައްޔާރު ކުރާނެ ގޮތް

ތަށްޓެއްގެ ތެރޭގައި ބަޓަރާއި، ބްރައުން ޝުގަރ އާއި އާދައިގެ ހަކުރު، ހެންޑް މިކްސަރަކުން (މީޑިއަމް ނޫނީ ހައި ސްޕީޑްގައި) ގާތް ގަނޑަކަށް 5 މިނެޓް ވަންދެން ރަނގަޅަށް ގިރާލާށެވެ. ހުރިހާ ތަކެތި އެއްވެ ކްރީމީ މިކްސްޗަރ އެއް ހެދެންދެން އެކުލަވާލަން ވާނެ އެވެ. ދެން ފަހަރަކު ބިހެއް އޭގެ ތެރެއަށް ލަމުން ގިރަމުން ދާށެވެ. އެއަށްފަހު ވެނީލާ އެސެންސް އަޅައިގެންވެސް ރަނގަޅަށް ގިރާލާށެވެ.

ދެން އެހެން ތަށްޓެއްގައި ފުށާއި ލޮނާއި ބޭކިންގ ޕައުޑަރ އެކުލަވައިލުމަށްފަހު، ފުށް މިކްސްޗަރ ކުރިން ހެދި ކްރީމް މިކްސްޗަރ އަށް މަޑު މަޑުން އެކުލަވަމުން އަޅަމުންދާށެވެ. ދެ މިކްސްޗަރ ރަނގަޅަށް އެކުލެވުމުން ޗޮކްލެޓް ޗިޕްސް ކޮޅުވެސް އަޅާލާފައި ސަމުސަލަކުން ރަނގަޅަށް އެކުލާވާލާށެވެ.

ދެން، އެ މިކްސްޗަރ އިން ކުދި ބޯޅަ ހެދުމަށްފަހު ކުޑަކޮށް ދެއަތް ދޭތެރެއަށްލައި ފަތިކޮށްލުމަށްފަހު ބޭކިންގ ޝީޓްއެއްގެ މަތީގައި އަތުރާލާށެވެ.

ކޮންމެ ދެ ކޫކީ އެއް ދޭތެރޭގައި ހުސް ޖާގަ ބަހައްޓަންވާނެއެވެ. ހުރިހާ ކޫކީތައް އަތުރައި ނިމުމުން ޕްރީ ހީޓް ކޮށްފައި އިން އަވަނެއްގައި، 180 ޑިގްރީ ގައި 15-12 މިނެޓް ވަންދެން ފިހެލާށެވެ.