މީޑިއާނެޓަށް މަންފާވާ ގަވައިދު ހަދާފައި އޮތީ ބްރޯޑްކޮމްއަށް ނުލިބޭ ބާރެއް ބޭނުންކޮށްގެން: ސިރާޖު

ވަކި ބަޔަކަށް މަންފާ ލިބޭ ގޮތަށް ރީބްރޯޑްކާސްޓު ކުރުމުގެ ގަވައިދެއް ބްރޯޑްކާސްޓިން ކޮމިޝަނުން ހަދާފައިވަނީ އެ ކޮމިޝަނަށް ނުލިބޭ ބާރެއް ބޭނުންކޮށްގެންކަމަށް މަޖިލީހުގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.

މޫސާ ސިރާޖު މިފަދައިން ވިދާޅުވެފައިވަނީ ގާނޫނާއި ޚިލާފަށް ބްރޯޑްކާސްޓިން ކޮމިޝަނުން ހަދާފައިވާ ރީބްރޯޑްކާސްޓުކުރުމުގެ ގަވައިދު އުވާލުމަށް ގޮވާލާ މަޖިލީހުގެ ނއިފަރު ދާއިރާގެ މެމްބަރު އަހުމަދު ޝިޔާމު ހުށައެޅުއްވި ގަރާރަށް މިއަދު މަޖިލީހުގއި ވާހަކަދައްކަވަމުންނެވެ.

ސިރާޖު ވިދާޅުވީ ރީ ބްރޯޑްކާސްޓުކުރުމުގެ ގާނޫނުގައި އެ ހުއްދަ ދެވޭނެ ޝަރުތުތައް ވަރަށް ސާފުކޮށް ބަޔާންކޮށްފައިވާކަމަށެވެ.

"މައިގަނޑު ދެ ކަމެއް ގާނޫނުގައި ރީބްރޯޑްކާސްޓުކުރުމަށް ހުއްދަ ދޭއިރުގައި ބަލަނީ. އެއްކަމަކީ އެ ޗެނަލްއަކީ އެ ގައުމެއްގައި ހުއްދަ ނަގައިގެން ހިންގާ ޗެނަލަކަށް ވުން. ދެވަނަ ކަމަކީ ރީބްރޯޑްކާސްޓު ކުރަން އެދޭ ފަރާތް އަތުގައި އެކަމުގެ އެ ޗެނަލްގެ ރައިޓްސް ގަނެފައި އޮތުން. އެ ދެ ޝަރުތު ހަމަވާނަމަ ރީބްރޯޑްކާސްޓު ކުރުމުގެ ލައިސެންސް ދޭން ޖެހޭނެ"

ފޮނަދޫ ދާއިރާގެ މެމްބަރު މޫސާ ސިރާޖު

ސިރާޖު ވިދާޅުވީ ކޮމިޝަނަށް ލިބެދޭ ބާރަކީ ގާނޫނާއި އެއްގޮތަށް އުސޫލުތައް ކަނޑައެޅުމުގެ ބާރު ކަމަށެވެ. އޭނާ އިތުރަށް ވިދާޅުވީ ރީބްރޯޑްކާސްޓު ކުރުމުގެ ހުއްދަ ހަމައެކަނި 100 އިންސައްތަ ދިވެހި ކުންފުންޏަކަށް ލިބޭގޮތަށް ގަވައިދެއް ހެދި ސަަބަބާއި ގުޅިގެން ބްރޯޑްކޮމްއާއި ސުވާލުކޮށްފައިވާކަމަށެވެ.

އެ ގަވައިދު އެކުލަވާލުމުގައި ބްރޯޑްކޮމް އިން ހަވާލާދެނީ ގާނޫނުގެ 36 ވަނަ މާއްދާއަށްކަމަށް ސިރާޖު ވިދާޅުވިއެވެ. އެހެން ނަމަވެސް އެ މާއްދާއަށް ބަލާއިރު، އެ މާއްދާއިންވެސް ހަގީގަތުގައި މިހާރު އޮތް ގޮތަށް އެ ގަވައިދު އެކުލަވާލުމުގެ ބާރު ބްރޯޑްކޮމްއަށް ލިއްބައި ނުދޭކަން އޭނާ ފާހަގަކުރެއްވިއެވެ.

" އެ ގާނޫނުގެ 36 ގައި މި އޮންނަނީ ބްރޯޑްކާސްޓު ކުރުމުގެ ސިޔާސަތު ފުޅާކުުރުމުގެ ބޭނުމުގައި ލައިސެންސްއެއް ދޫކުރުމުގައި ކަނޑައަޅާފައިވާ ޝަރުތުތައް ބަދަލުގެނައުމުގެ އިޚްތިޔާރު ކޮމިޝަނަށް ލިބިގެންވޭ، މީގައި މި އޮންނަނީ ބްރޯޑްކާސްޓުކުުރުމުގެ ވާހަކަ، ރީބްރޯޑްކާސްޓުކުރުމެއް ނޫން، އަދި މި މާއްދާގައި ބަޔާންކުރަނީ ފުޅާކުރުމުގެ ބޭނުމުގައިކަމަށް"

ފޮނަދޫ ދާއިރާގެ މެމްބަރު މޫސާ ސިރާޖު

ސިރާޖު ވިދާޅުވީ ފުޅާކުރުމުގެ ބޭނުމުގައި އެކުލަވާލާ ގަވައިދެއް ވާން ޖެހޭނީ އިތުރު ބަޔަކަށް ފުރުސަތު ލިބިގެންދާނެ ކަމެއްކަމުގައެވެ. އަދި މިހާރު އެ ގަވައިދު އޮގް ގޮތުން ޚިދުމަތް ދެމުން އަންނަ އެއްވެސް ފަރާތަކުން އެ ޚިދުމަތްދިނުން ހުއްޓާލަން ޖެހޭނެތޯ ބްރޯޑްކޮމްއާއި ސުވާލުކޮށްފައިވާނެކަމަށް އޭނާ ވިދާޅުވިއެވެ.

އެ ސުވާލަށް ޖަވާބުދެއްވަމުން، އެފަދައިން ޚިދުމަތް ދެމުން އައި ފަރާތެއް ހުއްޓާލަން ޖެހޭނެކަމަށް ބްރޯޑްކޮމް އިން ބުނެފައިވާކަމަށް ސިރާޖުގެ ވާހަކައިގައި ފާހަގަކުރެއްވިއެވެ. އެކަން ފާހަގަކުރައްވާ ސިރާޖު ވިދާޅުވީ، ހަމައެކަނި އެ ޖަވާބަށް ބަލާއިރުވެސް މިއީ 36 ވަނަ މާއްދާގައި އެ ބުނާ މަގްސަދާއިވެސް ޚިލާފު ގަވައިދެއްކަން އެނގޭކަމަށެވެ.

ބްރޯޑްކާސްޓިން ކޮމިޝަނުން އެކުލަވާލި ގަވައިދާއި ގުޅިގެން ނުރހުން ފާޅުކުރައްވާ ސިތާޖު ވިދާޅުވީ އެ ކޮމިޝަނުން ވަކި ބަޔަކަށް މަންފާވާ ގޮތަށް އެ ގަވައިދު ހަދާފައިވަނީ އެ ކޮމިޝަނަށް ލިބިދީފައި ނުވާ ބާރެއްގެ ބޭނުން ނަހަމަ ގޮތުގައި ހިފައިގެންކަމަށެވެ. އަދި އެ ގަވައިދަކީ ގާނޫނާއި ކަނޑައެޅިގެން ޚިލާފު ގަވައިދެއްކަމަށެވެ.