މޮނޮޕިލައިޒް ކުރުމުގެ ފުރުސަތު ދީފި ނަމަ މީޑިއާނެޓުން ކޮންމެ ގެސްޓު ހައުސް ރޫމަކުން 25 ޑޮލަރު ނަގަން ފަށާނެ: ފަޒުލް

ކޭބަލް ޓީވީގެ ޚިދުމަތް މޮނޮޕޮލައިޒް ކުރުމުގެ ފުރުސަތު މިހާރު އެ ޚިދުމަތް ފުޅާދާއިރާއެއްގައި ދެމުން ގެންދާ މީޑިއާނެޓަކަށް ދީފިކަމަށް ވާނަމަ، ރަށްރަށުގެ ގެސްޓު ހައުސްތަކުގައި ހުރި ކޮންމެ ކޮޓަރިއަކުން އެ ޚިދުމަތަށް 25 ޑޮލަރު ނަގަން ފަށާނެކަމަށް މަޖިލީހުގެ ފެލިދޫ ދާއިރާގެ މެމްބަރު އިބްރާހިމް ފަޒުލް ރަޝީދު ވިދާޅުވެއްޖެއެވެ.

ފަޒުލް މިފަދައިން ވިދާޅުވެފައިވަނީ ވަކި ބަޔަކަށް މަންފާ ލިބޭގޮތަށް ބްރޯޑްކާސްޓިން ކޮމިޝަނުން އެކުލަވާލާފައިވާ ގަވައިދު ބާތިލްކުރުމަށް ގޮވާލާ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ހުށައެޅުއްވި ގަރާރަށް ވާހަކަދައްކަވަމުންނެވެ.

ފަޒުލްގެ ވާހަކަ ފައްޓަވަމުން ވިދާޅުވީ، ބްރޯޑްކާސްޓިން ކޮމިޝަންގެ ގަވައިދަކުން ކުރަން އުޅޭ ކަމަކީ، މޮނޮޕޮލީއެއް އުފެއްދުމުގެ މަސައްކަތްކަމަށެވެ. އަދި އެއީ މިހާރު އެ ޚިދުމަތް ދެމުންދާ ފަރާތްތަކުގެ މެދުގައި އުފެދިފައިވާ ވާދަވެރިކަން ނައްތާލާ، މުޅި އެ ޚިދުމަތް ދިނުން އެއްބައެއްގެ ބާރުގެ ދަށަށް ގެންދިއުމަށް ހީލަތްތެރިކަމާއެކު ކުރެވެމުންދާ މަސައްކަތްތަކެއްކަމަށެވެ.

ކޭބަލްޓީވީ ޚިދުމަތް މޮނޮޕޮލައިޒް ކުރުމުގެ ފުރުސަތު ދީފިކަމަށް ވާނަމަ، މީޑިއާ ނެޓުން އެކަމުގެ މަންފާ ނަގާ، އެއީ ރައްޔިތުންނަށް ބޮޑު ތަކުލީފެއް އުފުލަންޖެހޭ ވިޔަފާރިއަކަށް ހަދާނެކަމަށް ފަޒުލް ވިދާޅުވިއެވެ.

"މި ޚިދުމަތް އަނެއްކާ މޮނޮޕޮލީއަށް އައިސްފިކަމަށް ވާނަމަ، ތިބޭފުޅުންގެ ކޮންމެ ރޫމަކުން އަދި މާފުށީގެ ކޮންމެ ގެސްޓު ހައުސްއެއްގެ ރޫމަކުން 25 ޑޮލަރު 30 ޑޮލަރު މިބޭފުޅުން ނަންގަވާނެ މީޑިއާނެޓުގެ ޚިދުމަތް ދެނީއޭ ކިޔާފަ. މިއީ ބޮޑު ޖަރީމާއެއް ހިންގާ، މޮނޮޕޮލީ އަނބުރާ އިޔާދަކުރުމަށްޓަކައި ކުރެވޭ ކަމެއް. ރިސޯޓުތަކުގެ ކޮންމެ ރޫމަކުން 250 ޑޮލަރު 300 ޑޮލަރު ނަގާނެ"

ފެލިދޫ ދާއިރާގެ މެމްބަރު އިބްރާހިމް ފަޒުލް ރަޝީދު

ފަޒުލް ވިދާޅުވީ، ހުރިހާ ގޭބީސީތަކަށް ކޭބަލް ޓީވީ ޚިދުމަތް ދިނުމުގެ ބާރު އެއްބައެއްގެ އަތްމައްޗަށް ދޫކޮށް، މުޅި ޚިދުމަތުގެ ކޮންޓްރޯލު އެއްބަޔަކު ނަގާ ގޮތަށް އުސޫލު ހެދުމަށްވުރެ ރައްޔިތުންނަށް ފައިދާ ވާނީ، ވީހާވެސް ގިނަ ބަޔަކަށް މި ޚިދުމަތް ދިނުމުގެ ފުރުސަތު ހުުޅުވާލެވިގެންކަމަށެވެ.

މި ސަރުކާރުން މި އުސޫލު ދަމަހައްޓާ މީޑިއާނެޓަށް މޮނޮޕޮލީ ހިބޭގޮތަށް ހެދިކަމުގައި ވީނަމަވެސް، މި ސަރުކާރު ބަދަލުވުމާއެކު، އެކަންކަން ބަދަލުކުރާނެކަމަށް ފަޒުލްގެ ވާހަކައިގައި ވަނީ ވިދާޅުވެފައެވެ.