ވުޒާރާގެ މަޝްރޫޢުތައް ނިންމުމަށް 58 ބިލިއަނަށްވުރެ ގިނަ ރުފިޔާ ބޭނުންވާނެ: ޑރ. މުއްޠަލިބު
ގެދޮރުވެރިކަމާ ބިނާރާ ބެހޭ ވުޒާރާއިން ކުރިއަށް ގެންދާ މަޝްރޫޢުތައް ނިންމުމަށް ޖުމުލަ 58 ބިލިއަނަށްވުރެ ގިނަ ރުފިޔާ ބޭނުންވާނެ ކަމަށް އެ ވުޒާރާގެ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.
ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދު، ގެދޮރުވެރިކަމާ ބިނާރާ ބެހޭ ވުޒާރާއިން ފަށާފައިވާ މަޝްރޫޢުތައް ނިންމުމަށް ލަފާކުރެވޭ ޖުމްލަ ބަޖެޓާއި، އެ މަޝްރޫޢުތައް ކުރިއަށް ގެންދިޔުމަށް މި އަހަރު ބަޖެޓުގައި ކަނޑައަޅާފައިވާ ފައިސާގެ އަދަދު ހޯދުމަށް ވަޒީރު މުއްޠަލިބާ ކުރެއްވި ސުވާލުގެ ޖަވާބު މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ.
”މަޝްރޫޢުތައް ނިންމުމަށް ލަފާކުރެވޭ ބަޖެޓު 58,831,473,267 ރުފިޔާ. 2026 ވަނަ އަހަރުގެ މަޝްރޫޢުތައް ހިންގުމަށް ހަމަޖައްސާފައިވަނީ ޕްރޮގްރާމް ބަޖެޓެއް. މިގޮތުން މަޝްރޫޢުތައް ކުރިއަށް ގެންދިޔުމަށް ރާވާފައިވާ ޕްލޭނާއެއްގޮތަށް މަޝްރޫޢުތަކަށް ބަޖެޓް ހަމަޖައްސަވަނީ މިނިސްޓްރީ އޮފް ފިނޭންސްއިން. ވުނާއެކު 2026 ވަނަ އަހަރުގެ ބަޖެޓުގައި ވަކި މަޝްރޫޢުއަކަށް ވަކި ވަރެއް ކަނޑައެޅިފައެއް ނުވޭ.“ވަޒީރުގެ ޖަވާބުގައި ވިދާޅުވިއެވެ
މީގެ އިތުރުން ޝަމްހީދު ވަނީ މިވަގުތު ކުރިއަށްދާ އެއާޕޯޓް އެޅުމުގެ މަޝްރޫޢު ތަކުގެ އަދަދާއި އެ މަޝްރޫޢުތައް ނިންމުމަށް އިތުރަށް ބޭނުންވާނެ ފައިސާގެ އަދަދާ ގުޅޭގޮތުންވެސް ވަޒީރާ ސުވާލު ކުރައްވާފައެވެ.
އެ ސުވާލުގެ ޖަވާބުގައި ވަޒީރު ވިދާޅުވީ، އެ ވުޒާރާގެ ބެލުމުގެ ދަށުން ކޮންޓްރެކްޓް ކުރެވިގެން މިހާރު ކުރިއަށްދަނީ ޖުމްލަ ފަސް އެއާޕޯޓްގެ މަސައްކަތް ކަމަށް ވިދާޅުވެފައެވެ. އަދި މަޝްރޫޢުތައް ނިންމުމަށް، ކަނޑައެޅިފައިވާ ބަޖެޓަށްވުރެ އިތުރަށް ބޭނުންވާނެ ކަމަށް ލަފާނުކުރެވޭ ކަމަށްވެސް ވިދާޅުވިއެވެ.
ނަމަވެސް ލ. އިސްދޫ ކަލައިދޫ އެއާޕޯޓްގެ މަސައްކަތް އަދި ކޮންޓްރެކްޓް ނުކުރެވޭތީ އެއަށް ބޭނުންވާ 600 މިލިއަން ބަޖެޓްގައި ހިމަނާފައިވާ ކަމަށް ވަޒީރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
