ސަރުކާރުން ޑޮލަރު ހޯދުމަށް ގެނައި ހުރިހާ ސިޔާސަތެއް ފެއިލްވެއްޖެ: ރައީސް ނަޝީދު
ސަރުކާރުން އެމެރިކާ ޑޮލަރު ހޯދުމަށް ގެނައި ހުރިހާ ސިޔާސަތެއް ނާކާމިޔާބުވެ، ޑޮލަރުގެ އަގު ދެންވެސް ދާނީ ހައްތަހާ މައްޗަށް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ، މިއަދު ހެނދުނު އެކްސްގައި ކުރެއްވި ޕޯސްޓަކުންނެވެ.
ރައީސް ނަޝީދު ވިދާޅުވެފައިވާ ގޮތުގައި، މިހާރު ބޭންކު އެކައުންޓުގައި ރުފިޔާ ހުރިނަމަވެސް، އެ ފައިސާ ޑޮލަރަށް ބަދަލުކުރެވެން ނެތެވެ.
މި ދަތިކަމުގެ ސަބަބުން އެންމެ ބޮޑަށް އުނދަގޫތަކާ ކުރިމަތިލާން ޖެހިފައިވަނީ، ކުދިން ކިޔެވުމަށްޓަކައި ބޭރުގައި ދިރިއުޅޭ އާއިލާތަކާއި ވިޔަފާރިވެރިންނަށް ކަމަށް އެމަނިކުފާނު ފާހަގަކުރައްވާފައިވެއެވެ. އެ ފަރާތްތަކަށް ހާލަތު މިވަނީ އިންތިހާއަށް ދަތިވެފައި ކަމަށް ރައީސް ނަޝީދު ވިދާޅުވެފައިވެއެވެ.
ރާއްޖެ "ޑިފޯލްޓް" ނުވެ މި މަހު ސަލާމަތްވީ ހަމައެކަނި އިންޑިއާގެ ކަރަންސީ ސްވޮޕް އަނބުރާ ދައްކަން ޖެހޭ މުއްދަތު އިތުރުކޮށްދިނުމުން ކަމަށް ވެސް ރައީސް ނަޝީދު ވިދާޅުވެފައިވެއެވެ.
މީގެ އިތުރުން ރައީސް ނަޝީދު ވަނީ، ރައީސް ޑރ. މުޙައްމަދު މުޢިއްޒު ޕާކިސްތާނަށް މިދަނޑިވަޅުގައި ކުރައްވަވާ ރަސްމީ ދަތުރުފުޅަށް ވެސް ނުސީދާ ގޮތުން ފާޑުކިޔުން އަމާޒުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
