މެންބަރުންގެ ޚާއްސަ ހެލްތު އިންޝުއަރެންސް މައްސަލާގައި މަޢުރޫފް: އެހެން ރައްޔިތަކަށް ރަނގަޅު ގޮތެއް ވާނަމަ އެކަމާއި ދެކޮޅަށް ނުކުތުމަކީ އެއްވެސް ރައްޔިތަކު ކޮށްގެންވާނެ ކަމެއްނޫން

އެހެން ރައްޔިތަކަށް ރަނގަޅު ގޮތެއް ވާކަމުގަ ވާނަމަ އެކަމާއި ދެކޮޅަށް ނުކުތުމަކީ އެއްވެސް ރައްޔިތަކު ކޮށްގެންވާނެ ކަމެއްނޫން ކަމަށް ބ. ކެންދޫ ދާއިރާގެ މަޖިލިސް މެންބަރު މައުރޫފް ޒާކިރު ވިދާޅުވެއްޖެއެވެ.

މައުރޫފް މިހެން ވިދާޅުވެފައިވަނީ، ރައްޔިތުންގެ މަޖިލީހުގެ މެންބަރުންނާއި އެ ބޭފުޅުންގެ އާއިލާތަކަށް ދައުލަތުގެ ބަޖެޓުން ލިބެމުން އަންނަ ހާއްސަ ހެލްތު އިންޝުއަރެންސް އުވާލައި، އާންމު ރައްޔިތުންނެކޭ އެއްފަދައިން އާސަންދަ ހިދުމަތް ލިބޭ ބަޔަކަށް މެންބަރުން ބަދަލުކުރުމަށް ގޮވާލައި އާންމު ރައްޔިތަކު މަޖިލީހަށް ހުށަހެޅި އީ-ޕެޓިޝަނަކާއި ގުޅޭ ގޮތުން މިއަދުގެ ޖަލްސާގައި ވާހަކަދައްކަވަމުންނެވެ.

މަޖިލީހުގައި މިއަދު ވާހަކަދައްކަވަމުން މައުރޫފް ވިދާޅުވީ، އޭނާ ދެކޭ ގޮތުގައި އެހެން ރައްޔިތަކަށް ރަނގަޅު ގޮތެއް ވާކަމުގަ ވާނަމަ އެކަމާއި ދެކޮޅަށް ނުކުތުމަކީ އެއްވެސް ރައްޔިތަކު ކޮންގެންވާނެ ކަމެއްނޫން ކަމަށެވެ.

އަޅުގަނޑަކަށް ހިޔެއް ނުވޭ އެއްވެސް ރައްޔިތަކު ކޮށްގެންވާނެ ކަމެއްހެން އެއީކީ އެހެން ރައްޔިތަކަށް ރަނގަޅު ގޮތެއް ވާކަމުގަ ވާނަމަ އެކަމާއި ދެކޮޅަށް ނުކުތުމަކީ. މައުރޫފް ވިދާޅުވިއެވެ.

މީގެ އިތުރުން މައުރޫފް ވިދާޅުވީ، ހަގީގަތުގައި ރައްޔިތުން ތެދުވާން ޖެހޭނީ އެހެން ރައްޔިތަކަށް ލިބޭ މޮޅު ގޮތް އެ ރައްޔިތަކަށް ވެސް ހޯދުމަށްޓަކައި ކަމަށެވެ.

ހަގީގަތުގައި ރައްޔިތުން ތެދުވާން ޖެހޭނީ އެހެން ރައްޔިތަކަށް ލިބޭ މޮޅު ގޮތް އެ ރައްޔިތަކަށް ވެސް ހޯދުމަށްޓަކައި. މައުރޫފް ވިދާޅުވިއެވެ.

މައުރޫފް ވަނީ، މި މައްސަލަ އާއި ގުޅިގެން ބަހުސް ނުކުރުމަށް ނިންމަވާ މި މައްސަލައަކީ މަޖިލިސް މެންބަރުންނާ ސީދާ ގުޅުންހުރި މައްސަލައެއް ކަމުން، މި މައްސަލަ މިނިވަން މުއައްސަސާއަކުން ބަލައިދިނުމަށް އެދި ގޮވާލާފައެވެ.

ރައްޔިތުންގެ މަޖިލީހަށް ހުށަހަޅާފައިވާ އީ-ޕެޓިޝަނަކީ އެ މަޖިލީހުގެ އިމްތިޔާޒުތަކާއި ބާރުތަކުގެ ގާނުނުގެ ދަށުން މިހާރުގެ މަޖިލިސް މެންބަރުންނާއި ކުރީގެ މެންބަރުންގެ އިތުރުން އެ ބޭފުޅުންގެ އަނބިދަރިންނަށް ރާއްޖެއާއި ސާކް އަދި އާސިއާންގެ ގައުމުތައް ހިމެނޭހެން 19 ގައުމަކުން އުމުރުދުވަހަށް ލިބޭ ހާއްސަ އިންޝުއަރެންސް އުވާލުމަށް އެދި ހުށަހަޅާފައިވާ ޕެޓިޝަނެކެވެ.

އެ އީ-ޕެޓިޝަނުގައި ފާހަގަކޮށްފައިވާ ގޮތުން، 2015 ވަނަ އަހަރުން ފެށިގެން 2025 ވަނަ އަހަރާއި ހަމައަށް މެންބަރުންގެ އިންޝުއަރެންސް ޕްރީމިއަމަށް އެކަނިވެސް ދައުލަތުގެ ބަޖެޓުން 100 މިލިއަނެއްހާ ރުފިޔާ ވަނީ ހަރަދުކޮށްފައެވެ. އަދި އާންމު ރައްޔިތުންނަށް ނުލިބޭ މިފަދަ ހާއްސަ އިނާޔަތްތަކެއް ރައްޔިތުންގެ ޓެކްސް ފައިސާއިން މެންބަރުންނަށް ދިނުމަކީ ބަލައިގަނެވޭ ކަމެއް ނޫން ކަމަށާއި، މެންބަރުންނަކީ ވެސް އާންމުންނެކޭ އެއްފަދައިން އާސަންދަ އާއި އެންސްޕާގެ ނިޒާމުގެ ތެރެއިން ސިއްހީ ހިދުމަތް ހޯދާ ބަޔަކަށް ހެދުމަށް އެ އީ-ޕެޓިޝަނުގައި ވަނީ ގޮވާލާފައެވެ.

މި ގޮވާލުމުގެ ސަބަބެއްގެ ގޮތުގައި އީ-ޕެޓިޝަނުގައި ފާހަގަކޮށްފައިވަނީ، އެއީ ގައުމުގެ އަސާސީ ސިއްހީ ނިޒާމު ރަނގަޅުކުރުމަށް މަސައްކަތް ކުރެވޭނީ، އާންމު ރައްޔިތުން ތަހައްމަލުކުރާ ތަކުލީފުތައް މަޖިލިސް މެންބަރުންނަށް ވެސް ތަޖުރިބާ ކުރެވިގެން ކަމަށްވާތީއެވެ.