އިސްދޫ-ކަޅައިދޫ އެއާޕޯޓްގެ މަސައްކަތަށް ބަޖެޓުގައި 600 މިލިއަން ރުފިޔާ ހިމަނައިފި
ލ. އިސްދޫ-ކަޅައިދޫގައި އެއާޕޯޓެއް އެޅުމަށް ބޭނުންވާ 600 މިލިއަން ރުފިޔާ ދައުލަތުގެ ބަޖެޓުގައި ހިމަނާފައިވީ ނަމަވެސް، އެ މަޝްރޫޢުގެ ޢަމަލީ މަސައްކަތް އަދި ފެށިފައި ނުވާކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
މިނިސްޓަރު މިކަން ހާމަކުރެއްވީ، ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު، އެއާޕޯޓް މަޝްރޫޢުތަކުގެ އެންމެ ފަހުގެ މަޢުލޫމާތާއި އިތުރަށް ބޭނުންވާ ފައިސާގެ ތަފުސީލު ހޯއްދެވުމަށް ލިޔުމުން ކުރެއްވި ސުވާލަށް ޖަވާބުދެއްވަމުންނެވެ.
މެންބަރުގެ ސުވާލަށް ދެއްވި ޖަވާބުގައި މިނިސްޓަރު ވިދާޅުވީ، ރާއްޖޭގެ އެކި ސަރަޙައްދުތަކުގައި މިހާރު ވެސް ކުރިއަށްދާ ފަސް އެއާޕޯޓެއްގެ މަޝްރޫޢަށް ބޭނުންވާ ފައިސާ ހަމަޖެހިފައިވާ ކަމަށެވެ. ނަމަވެސް، އިސްދޫ-ކަޅައިދޫ އެއާޕޯޓުގެ ޢަމަލީ އެއްވެސް މަސައްކަތެއް އަދި ފެށިފައި ނުވަނީ، އެ މަސައްކަތް ބަޔަކާ ހަވާލުކޮށް ކޮންޓްރެކްޓް ކުރުމުގެ މަރުޙަލާ އަދި ނުނިމޭތީ ކަމަށް ފާހަގަކުރެއްވިއެވެ. އެހެންކަމުން، މި މަޝްރޫޢަށް ބޭނުންވާ 600 މިލިއަން ރުފިޔާ ދައުލަތުގެ ބަޖެޓުގައި ކަނޑައަޅާފައި ވަނީ އެ މަސައްކަތް ކުރިއަށް ގެންދިއުމަށްޓަކައެވެ.
ލ. އަތޮޅުގައި އިތުރު އެއާޕޯޓެއް ތަރައްޤީކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ފުރަތަމަ އިޢުލާނުކުރެއްވީ، އެ އަތޮޅު މާވަށަށް ކުރެއްވި ދަތުރުފުޅެއްގައި އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
އޭގެ ފަހުން، މިދިޔަ ޖޫން މަހުގެ 25 ވަނަ ދުވަހު ސަރުކާރުން ވަނީ އެ އެއާޕޯޓް ތަރައްޤީކުރުމަށް ނިންމާފައިވަނީ އިސްދޫ-ކަޅައިދޫގައި ކަން ހާމަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
