ރާއްޖޭގައި ތިބި އިންޑިއާ ސިފައިންގެ އަދަދު ހާމަކޮށްފި!

ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވަޢުދާއި އެއްގޮތަށް، ދިވެހިރާއްޖޭގައި ގާއިމްވެތިބި އިންޑިއާ ސިފައިންގެ އަދަދު ސަރުކާރުން ހާމަކޮށްފި އެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ، ސަރުކާރަށް މިހާތަނަށް ލިބުނު މައުލޫމާތު ތަކުން އެނގޭ ގޮތުން ރާއްޖޭގައި ގާއިމްވެ ތިބި އިންޑިއާ ސިފައިންގެ އަދަދަކީ 77 ކަމަށެވެ.

އޭގެ ތެރެއިން 24 ސިފައިން ތިބީ އިންޑިޔާއިން ހަދިޔާކުރި އެއް ހެލިކޮޕްޓަރު ބަލަހަށްޓައި ދުއްވުމަށް ކަމަށާ އަދި އަނެއް ހެލިކޮޕްޓަރ ދުއްވުމަށް 26 ސިފައިންތިބި އިރު، ޑޯނިއާ މަތިންދާބޯޓު ދުއްވުމަށް 25 ސިފައިން ތިބި ކަމަށް ފިރުޒުލް ވިދާޅުވި އެވެ. މީގެ އިތުރުން މެއިންޓަނަންސް އާއި އިންޖީނިއަރިން ފަދަ ކަންކަން ކުރުމަށް އިތުރު ދެ ސިފައިން ތިބި ކަމަށްވެސް ފިރުޒުލް ވިދާޅުވި އެވެ.

"އަޅުގަނޑުމެންނަށް އެއްކުރެވިފައި އެބަވޭ، އިންޑިޔާ ސިފައިން ގާއިމްވެތިބެ، ދެ ހެލިކޮޕްޓަރ އާއި ޑޯނިއާ މަތިންދާ ބޯޓުން، ކޮށްފައިވާ އެކިއެކި މަސައްކަތް ތަކުގެ މައުލޫމާތު. އެގޮތުން، އެކިއެކި މެޑިކަލް އިވަކުއޭޝަން ތަކުގެ 661 އިވަކުއޭޝަން، ސަވައިލަންސް ގެ 220 މަސައްކަތް ނުވަތަ އޮޕަރޭޝަން، ސާޗް މިޝަންގެ 100 އޮޕަރޭޝަން. މީގެ އިތުރުން އަދި، އެއާކުރޫ ޓްރާންސްފާރ، ކޮވިޑް ސާމްޕަލް ކަލެކްޝަން، ވީއައިޕީ އެކިއެކި މަސައްކަތް އަދި ހަމައެހެންމެ، ޑިފެންސްއާ ގުޅޭ އެކިއެކި ތަމްރީނު ތަކުގެ މަސައްކަތް ކުރިއަށް ގެންދަވާފައިވޭ. މި މަސައްކަތް ތަކުގެ ސަބަބުން ދިވެހި ރައްޔިތުންނަށް ފައިދާ ތަކެއް ވެފައިވޭ. އެހެން ނަމަވެސް ދިވެހި ރައްޔިތުން އެއްވެސް ވަރަކަށް ބޭނުންވާ ކަމެއް ނޫން އެއްވެސް ގައުމެއްގެ ބޭރު ސިފައިން ދިވެހި ރާއްޖޭގައި ގާއިމްވެ ތިބުމެއް."

ރައީސް އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް

ފިރުޒުލް ވިދާޅުވީ، ބޭރުގެ ސިފައިން ރާއްޖޭގައި ގާއިމްވެ ތިބުމަކީ ދިވެހިން ބޭނުން ނުވާ ކަމެއް ކަމަށް، ދިވެހި ރައްޔިތުން ނިންމާފައިވާއިރު، އައުސަރުކާރުގެ މަސައްކަތް ބައްޓަން ވެފައިވަނީ އެ ނިންމުމާ އެއްގޮތަށް އަމަލު ކުރުމަށް ކަމަށެވެ. އަދި މިހާރުވެސް އެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.

ރާއްޖޭގައި ތިބި އިންޑިއާ ސިފައިންގެ އަދަދު ހާމަ ކުރުމާއި، ރާއްޖޭގެ ސަލާމަތަށް ނުރައްކާވާގޮތަށް ހަދާފައި ހުރި އެއްބަސްވުންތައް ހާމަ ކުރުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދެކެވެ. އަދި އިންޑިޔާ އާއި ވާހަކަ ދައްކައިގެން އެ ގައުމުގެ ސިފައިން ރާއްޖެއިން ފޮނުވާލުމަށްވެސް އެމަނިކުފާނު ވަޢުދުވެވަޑައިގެންފައިވާއިރު އެ މަސައްކަތް މިހާރު ވަނީ ފަށްޓަވާފައެވެ.

އެގޮތުން ރައީސުލްޖުމްހޫރިއްޔާ ޑރ. މުޢިއްޒު ވަނީ އިންޑިއާގެ މިނިސްޓރަ އޮފް އަރތް ސައިންސެސް، ހިޒް އެކްސެލެންސީ މިސްޓަރ ކިރެން ރިޖިޖޫ އާއެކު އިއްޔެ ބޭއްވެވި ބައްދަލުކުރެއްވުމުގެ ތެރެއިން، އިންޑިޔާ ސިފައިން ރާއްޖެއިން ބޭލުމަށް ރަސްމީކޮށް އެދިވަޑައިގެންފަ އެވެ.