13 ޑިސެމްބަރާއި ހަމައަށް 1.7 މިލިއަން ފަތުރުވެރިން ރާއްޖެ އައިސްފައިވޭ

މިހިނގާ ޑިސެމްބަރުގެ މަހުގެ 13 ވަނަ ދުވަހާއި ހަމައަށް 1.7 މިލިއަން ފަތުރުވެރިން ރާއްޖެ އައިސްފައިވާ ކަމަށް ފަތުރުވެރިކަމާއި ބެހޭ ވުޒާރާއިން ހާމަކުރި ތަފާސްހިސާބުތަކުން ބުނެފިއެވެ.

މިޢަދަދަކީ މިފާއިތިުވި އަހަރާއި އަޅައި ބަލާއިރު 12.6 އިންސައްތަ އިތުރު ޢަދަދެކެވެ.

ފަތުރުވެރިކަމާއި ބެހޭ ވުޒާރާއިން މިއަހަރުގެ އަމާޒު ހިފައިފައި އޮތީ ރައްޖެއަށް 1.8 މިލިއަން ފަތުރުވެރިން ގެނައުމަށެވެ. މިހާރު ފަތުރުވެރިން ޒިޔާރަތް ކުރަމުންދާ ޢަދަދަށް ބަލާއިރު އެއަމާޒަށް ވާސިލް ވުމަކީ އުނދަގޫ ކަމަކަށް ނުވާނެއެވެ.

މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެއައިސްފައިވަނީ ފެބްރުއަރީ މަހުއެވެ. އެއީ 177،915 ފަތުރުވެރިންނެވެ. އެމަހު ދުވާލަކަށް 6354 ފަތުުރުވެރިން ރާއްޖެ އައިސްފައިވެއެވެ.

މިއަަހަރުގެ މިހާތަނަށް ރާއްޖެއަށް އައި ފަތުުރުވެރިންގެ އެންމެ ބޮޑު ޢަދަދެއް ޚިއްސާކުރަނީ ރަޝިޔާއިންނެވެ. ރަޝިޔާއިން މިއަހަރުގެ މިހާތަނަށް 197،824 ފަތުުރުވެރިން ރާއްޖެ އައިސްފައިވެއެވެ. ދެވަނަ އަށް އެންމެ ގިނަ ފަތުރުވެރިން އައިސްފައިވަނީ އަވަށްޓެރި އިންޑިޔާއިންނެވެ.

މޯލްޑިވްސް އެސޯސިއޭޝަން ފޯ ޓްރެވަލް އެޖެންޓްސް އެންޑް ޓުއަ އޮޕަރޭޓާޒް (މަޓާޓޯ) އިން ލަފާކޮށްފައިވަނީ މިއަހަރު ރާއްޖެއަށް ދެ މިލިއަން ފަތުރުވެރިން އަންނާނެ ކަމަށެވެ.

13 ޑިސެމްބަރާއި ހަމައަށް ރާއްޖެއަށް ސީދާ ދަތުރު ކުރެވޭ 22 ޤައުމެއް އޮތް އިރު އެޢަދަދު އިތުރުކުރުމަށް މިސަރުކާރުން މިހާރު ވަނީ އަމާޒު ހިފައިފައެވެ.