އިސްރާއީލުގެ ރައްޔިތުން ރާއްޖެ ނައުމަށް އިސްރާއީލު ސަރުކާރުން އަންގައިފި

ރާއްޖޭގައި ތިބި އިސްރާއީލުގެ ރައްޔިތުން އެނބުރި ދިއުމަށާއި ރާއްޖެއަށް ދަތުރު ނުކުރުމަށް އިސްރާއީލުގެ ސަރުކާރުން އަންގައިފިއެވެ.

މިފަދައިން އަންގައި އިސްރާއީލުގެ ފޮރިން މިނިސްޓްރީން ނެރުނު ބަޔާނަކާ ހަވާލާދީ އެ ގައުމުގެ ނޫސް މަޖައްލާއެއް ކަަމަށްވާ އިސްރާއީލްޓައިމްސްގައި މިއަދު ބުނެފައިވަނީ، މިފަދައިން އެންގީ ރާއްޖޭގައި އިސްރާއީލާ ދެކޮޅަށް ހިންގާ ހިޔާލުތަކާއި ހަރަކާތްތައް އިތުރުވަމުން ދިއުމާ ގުޅިގެން ކަމަށެވެ.

އެގޮތުން މީޑިއާ ރިޕޯޓުތައް ބުނާގޮތުން އިސްރާއީލާ ދެކޮޅު ރާއްޖޭގައި ހިންގާ ހަރަކާތްތަކާއި ހިޔާލުތައް ފާޅުކުރާ މީހުންގެ ތެރޭގައި ދިވެހި ސަރުކާރުގެ އޮފިޝަލުން ވެސް ހިމެނޭތީ މިވަގުތު ރާއްޖެއަށް ޒިޔާރަތް ނުކުރުމަށާއި އަދި ރާއްޖޭގައި ތިބި އިސްރާއީލުގެ ރައްޔިތުން ވެސް ވީހާވެސް އަވަހަކަށް ރާއްޖެ ދޫކޮށް ދިއުމަށް ވެސް އެ އިސްރާއީލުގެ ފޮރިން މިނިސްޓްރީން ވަނީ އަންގައިފައެވެ.

އެގޮތުން ރާއްޖެއަކީ އިސްލާމީ ގައުމަކަށް ވާތީ، ރާއްޖޭގައި ތިބި އިސްރާއީލުގެ ރައްޔިތުންނަށް އެހީތެރިކަން ފޯރުކޮށްދޭން އެ ގައުމުގެ ސަރުކާރަށް އުނދަގޫ ވާނެ ކަމަށް ވެސް އެ ގައުމުގެ ނޫސްތަކުގައި ރިޕޯޓުކޮށްފައިވެއެވެ.

މިއީ އިސްރާއީލުގެ ރައްޔިތުން ރާއްޖެ ދަތުރު ނުކުރުމަށް އިސްރާއީލު ސަރުކާރުން އެންގި ދެވަނަ ފަހަރެވެ.

ދިވެހި ސަރުކާރުން އަބަދުވެސް އަންނަނީ ފަލަސްތީނުގެ މީހުންގެ ދިފާއުގައި އަޑު އުފުލައި، ބައިނަލްއަގްވާމީ މައިދާނުގައި ވެސް އެ މީހުންގެ ހައްގުތައް ދިފާއު ކުރަމުންނެވެ. އަދި އިސްރާއީލް ރައްޔިތުން ރާއްޖެ އެތެރެވުން މަނާކުރަން ގޮވާލާ ގަރާރެއް ވެސް ވަނީ މަޖިލީހަށް ހުށަހަޅައިފައެވެ.

މީގެ އިތުރުން ހައްދުފަހަނަ އެޅި އިސްރާއީލުގެ ސިފައިން ފަލަސްތީނުގެ ރައްޔިތުންނަށް ދެމުން ގެންދާ އަނިޔާތަކާއި ގުޅިގެން އެކަމާއި ދެކޮޅަށް ރާއްޖޭގައި އަންނަނީ މެދުނުކެނޑި ހަރަކާތައް ހިންގަމުންނެވެ.