ކައުންސިލް އިދާރާތައް ހުރީ ޢުމްރާނީ ގޮތުން ތަރައްގީނުވެ، އެކަން ހައްލުކުރަން މަސައްކަތް ކުރާނަން: ޝަރީފް

ގިނަ ރަށްރަށުގައި ހުރި ކައުންސިލް އިދާރާތައް ހިންގަމުން އަންނަ އިމާރާތްތައް ހުރީ "ވިރާނާ" ވާން ފަށާފައި ކަމަށާއި، އެކަން ހައްލުކުރުމަށް މަސައްކަތްކުރައްވާނެ ކަމަށް ސިޓީތަކާއީ، އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ސިޓީތަކާއީ، އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި، ކައުންސިލްތަކާއެކު މިހާތަނަށް ބޭއްވުނު ބައްދަލުވުންތަކުން އެ ކައުންސިލްތަކުން އެންމެ ބޮޑަށް ފާހަގަކޮށްފައިވާ ކަންބޮޑުވުންތައް އާދަމް ޝަރީފް ވަނީ ހިއްސާކުރައްވާފައެވެ.

އެގޮތުން، ޝަރީފު ވިދާޅުވީ، ލާމަރުކަޒީ ނިޒާމާއެކު ރަށު އޮފީސްތައް ކައުންސިލްތަކަށް ބަދަލު ވެގެން އައި އިރު، ކައުންސިލް އިދާރާތަކުގެ އުމްރާނީ ތަރައްގީއާ ކުރިއެރުމަށް ބަޖެޓް ކަނޑައަޅައިގެން އެ މަސައްކަތް ކުރުމަށް އެއްވެސް ސަރުކާރަކުން މަސައްކަތްކޮށްފައި ނުވާ ކަމަށެވެ.

ކުރީގައި ކަތީބަކާއި ކުޑަ ކަތީބެއް ތިއްބަވައިގެން ހިންގެވި އޮފީސްތަކަށް ފަސް ކައުންސިލަރުން، ނުވަތަ، ބައެއް ހާލަތްތަކުގައި އެއަށްވުރެ ގިނަ ކައުންސިލަރުން ވަދެ. އަދި ހަމަ އެއާއެކުގައި މި ތަހުޒީބު ވަމުންދާ ޒަމާނެއްގައި އެތަނަށް ބޭނުންވާ އެހެން ވަސީލަތްތަކެއްވެސް. އިންސާނީ ވަސީލަތްތައް އިތުރުވެގެން ދިޔައިރު، އުމްރާނީގޮތުން ކުރިއެރުންތަކެއް ނުލިބި އޮތީ. އަނެއްކާ މީގެ 30-40 އަހަރު ކުރީގެ އިމާރާތްތަކުގައި ކައުންސިލްތައް ހިންގަންވީމާ ދިމާވާ ގޮންޖެހުންތައް އެއީ އެންމެ ބޮޑު ޝަކުވާ އަކީ.

އާދަމް ޝަރީފް ޢުމަރު

ޝަރީފް ވިދާޅުވީ، މިހާތަނަށް ރަށް ރަށަށް ކުރެވުނު ދަތުރުތަކުން، ރަށްރަށުން ފެނުނު ތަންތަނުން އެންމެ ބޮޑަށް ވީރާނާވަމުންދާ އޮފީސް އިމާރާތަކަށް ފެނުނީ ކައުންސިލް އިދާރާތައް ކަމަށެވެ.

އެހެންކަމުން އެތަންތަން އާބާތުރަ ފިލުވުމާއި އައު އިމާރާތްތައް ބިނާ ކުރުމަކީ ކައުންސިލްތަކުން އެދެމުން އަންނަ އެންމެ ބޮޑު ކަންތައްކަމުގައި ޝަރީފު ފާހަގަކުރެއްވިއެވެ.

އަޅުގަނޑުމެން އިރާދަކުރެއްވިޔާ، ރައީސުލްޖުމުހޫރިއްޔާގެ އަރިހަށް އެންމެ މުހިންމު އެއް ކަމެއްގެ ގޮތުގައި އަޅުގަނޑުމެން ހުށައަޅާނަން ކައުންސިލްތަކުގެ އިދާރާތައް ހަރުދަނާ ކުރުމާއި ރަނގަޅު ކުރުމުގެ މަސައްކަތް

އާދަމް ޝަރީފް ޢުމަރު

މީގެ އިތުރުން، ކައުންސިލްތަކުގެ އިދާރީ މުވައްޒަފުންގެ މުސާރައަށް ކުރިއެރުން ނުލިބުމާއި، އަދި އިދާރީ މުވައްޒަފުންގެ މުސާރައިގެ ހަމަހަމަ ކަން ނެތް މައްސަލައަކީވެސް އެ ތަނުގައި މަސައްކަތް ކުރާ ފަރާތްތަކުގެ ވަރަށް ބޮޑު ކަންބޮޑުވުމެއް ކަން ޝަރީފް ފާހަގަކުރެއްވި އެވެ.

އެހެންކަމުން، އެފަރާތްތަކުގެ މުސާރަ ހާމަނައިޒް ކުރުމުގެ މަސައްކަތަކީ ކޮންމެހެންވެސް ކުރަންޖެހިފައިވާ މަސައްކަތެއްކަމަށް ޝަރީފް ވިދާޅުވި އެވެ.