ޕީއެންއެފް ރެޖިސްޓަރ ކުރަން ހުށަހަޅާނީ ރައީސް ޔާމީން މިނިވަންވީމާ: މަލީހު

ކުރީގެ ރައީސް ޔާމީން އަބްދުލްގައްޔޫމްގެ އައު ޕާޓީ، ޕީއެންއެފް ރެޖިސްޓާ ކުރަން ހުށަހަޅާނީ އެމަނިކުފާނު ޖަލުން މިނިވަންވެވަޑައިގެންނެވުމުން ކަމަށް، ޕީއެންއެފް އުފެއްދެވުމުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލް ވިދާޅުވެއްޖެއެވެ.

ޕީއެންއެފް އުފައްދަން ހުއްދަ ދިން ދުވަހު ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން މަލީހު ވަނީ އެ ޕާޓީގެ އަމާޒަކީ 24 ގަޑިއިރުތެރޭގައި، ޕާޓީ ރެޖިސްޓަރ ކުރަން ބޭނުންވާ 3000 މެންބަރުންގެ ސޮއި ހަމަކޮށް ފޯމުތައް އީސީއަށް ހުށަހެޅުން ކަމަށް ވިދާޅުވެފައެވެ. އަދި ޕީއެންއެފް ވާނީ ރާއްޖޭގައި ސިޔާސީ ޕާޓީއެއް އުފެއްދުމުގެ ރިކޯޑް މުގުރާލާ ޕާޓީއަށް ކަމަށް އޭނާ އެދުވަހު ވިދާޅުވި އެވެ.

މަލީހު އެފަދައިން ވިދާޅުވިފަހުން މިހާރު ގާތްގަނޑަކަށް 3 ތިން ހަފްތާ ފާއިތުވެގެންދާން ކައިރިވެފައިވާއިރު، އަދިވެސް ޕާޓީ ރެޖިސްޓަރ ކުރަން ހުށަހަޅުއްވާފައިނުވާ ސަބަބާއި ގުޅިގެން 'ވޮއިސް' އިން ދެންނެވި ސުވާލަށް ޖަވާބު ދެއްވަމުން އޭނާ ވިދާޅުވީ، އެ މަސައްކަތް ދަނީ އެ ޕާޓީން ޕްލޭން ކުރި ގޮތާއި އެއްގޮތަށް ކަމަށެވެ.

އަދި 24 ގަޑިއިރުތެރޭގައި އެ ޕާޓީއަށް 3000 މެންބަރުންވެސް ހަމަ ކުރެއްވި ކަމަށާއި، އެހެން ނަމަވެސް، ޕާޓީ ރެޖިސްޓަރ ކުރަން ހަށަހަޅުއްވާފައިނުވަނީ މައިގަނޑު ހަތަރު ސަބަބަކާއި ހުރެކަމަށް އޭނާ ވިދާޅުވި އެވެ.

އެގޮތުން އެންމެ މުހިންމު ސަބަބެއް ކަމަށް އޭނާ ފާހަގަކުރެއްވީ ރައީސް ޔާމީން އަދިވެސް މިނިވަން ނުވުމެވެ.

"އަޅުގަނޑުމެން ކުރިންވެސް ދަންނަވާލާފައި ވާނެ, ޕާޓީ ރެޖިސްޓަރ ކުރާ ޖަލްސާގައި ރައީސް ޔާމީން ބައިވެރިވެވަޑައިގަންނަވާނެއޭ. އެމަނިކުފާނަށް އެ ޖަލްސާގައި ބައިވެރިވެވަޑައިގެންނެވޭނީ މިނިވަންވެވަޑައިގެންނެވުނީމާ. އެހެންވީމާ އެމަނިކުފާނު މިނިވަންވެ ވަޑައިގެންނެވީމާ ޕާޓީ ރެޖިސްޓަރ ކުރާނީ އަޅުގަނޑުމެން."

މުހައްމަދު މަލީހު ޖަމާލް

ދެވަނަ ކަމަކަށް މަލީހު ފާހަގަކުރެއްވީ, ޕާޓީ ރެޖިސްޓަރ ކުރަން ހުށަހަޅާއިރު، ހުރިހާ ރަށެއްގެ މެންބަރުން ވެސް އެ ޕާޓީގައި ހިމެނުމެވެ.

އެގޮތުން މަލީހު ވިދާޅުވީ، ޕާޓީގައި 3000 މެންބަރުން ހަމަވި ނަމަވެސް، ރެޖިސްޓަރ ކުރަން ލާ 3500 ފޯމުގައި ހުރިހާ ރަށެއްގެ މީހުން ވެސް ހިމަނުއްވަން ބޭނުންފުޅުވާ ކަމަށެވެ.

އަދި އެގޮތުން ފޯމުތައް ލާއިރު، ފޯމުގެ ސައްހަކަން ކަށަވަރު ކުރުމަށް އީސީން ޗެކު ކުރާ މަޢުލޫމާތުތައް، އެ ޕާޓީން ވެސް ޗެކު ކުރަން ބޭނުންވާ ކަމަށާއި، ފޯމު ލާނީ އެ މަސައްކަތް ވެސް ނިންމުމަށްފަހު ކަމަށް އޭނާ ވިދާޅުވި އެވެ.

"ހަތަރު ވަނަ ކަމަކަށް، އަޅުގަނޑުމެންގެ ޕާޓީއަށް ތާއީދު ކުރާ، ރައީސް ޔާމީނަށް ވަފާތެރި ވަރަށް ގިނަ ފަރާތްތައް އެބަތިބި ޕީޕީއެމް/ޕީއެންސީ މަޖިލިސް ޕްރައިމަރީގައި ބައިވެރިވެފައިވެސް. އެ ބޭފުޅުންނަށް ވެސް ބަލާފައި، ޕީއެންއެފް އަށް ސޮއިކުރުމުން އެ ފުރުސަތު ގެއްލޭނެތީ މި މަޑުޖައްސާލަނީ"

މުހައްމަދު މަލީހު ޖަމާލް

މަލީހު އިތުރަށް ވިދާޅުވީ ޕީޕީއެމް/ޕީއެންސީގެ ޕްރައިމަރީގައި ވާދަކުރައްވާ ރައީސް ޔާމީނަށް ތާއީދު ކުރައްވާ ކެންޑިޑޭޓުންގެ ތެރެއިން ބައެއް ފަރާތްތަކަށް ރައީސް ޔާމީންގެ ފޮޓޯފުޅު ބޭނުންކުރުމުގެ ހުއްދަ ދެމުންދާ ކަމަށާއި، ޕްރައިމަރީ އާއި އިންތިޚާބު ކާމިޔާބު ކުރައްވައި އޭގެ ފަހުން އެ ބޭފުޅުން ވެސް ޕީއެންއެފާއި ގުޅިވަޑައިގަންނަވާނެ ކަމަށް އޭނާ ވިދާޅުވި އެވެ.