އަމާން ދޯދި ދެކޮޓަރީގެ ޔުނިޓް ބަލާލުމަށް އާންމުންނަށް ހުޅުވާލައިފި

އަމާން ދޯދި އެކްސްޕީރިއަންސްގެ ދެ ކޮޓަރީގެ ޔުނިޓްތައް ބަލާލުމަށް ފަހި ދިރިއުޅުން ކޯޕަރޭޝަން (އެފްޑީސީ) އިން އާންމުންނަށް ހުޅުވާލައިފިއެވެ.

އެފްޑީސީން ބުނީ މި ޔުނިޓްތައް ބަލާލުމަށް ޒިޔާރަތް ކުރެވޭނީ ބުކިން އުސޫލުން ކަމަށެވެ.

އެގޮތުން މި ޔުނިޓްތައް ބަލާލުމަށް ޒިޔާރަތް ކުރުމަށް ހަމަޖެހިފައިވާ ގަޑިތަކަކީ ކޮންމެ ދުވަހަކު ވެސް 14:00-18:00 އަށް ކަމަށާއި ޒިޔާރަތް ކުރަން ރަޖިސްޓަރ ކުރުމަށް ބޭނުންވާ ޕޯޓަލް އެފްޑީސީގެ ސައިޓުން ފެންނާނެ ކަމަށް އެފްޑީސީން ބުނެއެވެ.

މި އެކްސްޕީރިއަންސް ޔުނިޓްތައް އާންމުންނަށް ހުޅުވާލުމުގެ މަޤްސަދަކީ، ފްލެޓްތައް ހަވާލުކުރުމުގެ ކުރިން، ޒަމާނީ ގެތައް ފަރުމާކުރެވޭނެ ތަފާތު ގޮތްތައް އާންމުންނަށް ދައްކުވައިދިނުން ކަމަށް އެ ކުންފުނިން ބުނެއެވެ.

އަމާން ދޯދި އެކްޕީރިއަންސް 2 ކޮޓަރީގެ ޔުނިޓްތައް ރަސްމީކޮށް މިމަހުގެ 14 ވަނަ ދުވަހު އިފްތިތާހުކޮށްފައިވާއިރު، އަމާން ދޯދީގެ ހައުސިން ޔުނިޓްތައް ތަރައްގީކުރުމަށް ހަމަޖެހިފައި ވަނީ 16 ޓަވަރަށް ބަހާލައިގެންނެވެ. މި ޓަވަރުތަކުގައި ހިމެނެނީ ދެ ކޮޓަރީގެ 600 ޔުނިޓާއި ތިން ކޮޓަރީގެ 1400 ހައުސިން ޔުނިޓެވެ.