ހަސަނާއި ޝިފާޒް އެމްޑީޕީއަށް ސޮއިކުރައްވައިފި
ލިޔުންތެރިޔާ
އަބްދުﷲ ހުސައިން
ޑިމޮކްރެޓްސްގެ ރައީސަކަށް ހުންނެވި ހަސަން ލަތީފާއި، އެޕާޓީގެ ނައިބުރައީސްއަކަށް ހުންނެވި ޝިފާޒް އެމްޑީޕީއަށް ސޮއިކުރައްވައިފިއެވެ.
އެމްޑީޕީންވެސް ވަނީ އެ ދެ ބޭފުޅުން، އެޕާޓީއަށް ސޮއިކުރެއްވިކަން ޔަގީންކޮށްދީފައެވެ. މިކަމާ ގުޅިގެން އެމްޑީޕީން އެކްސްގައި ކުރި ޕޯސްޓެއްގައި ބުނެފައިވަނީ، ހަސަން ލަތީފާއި، މުހައްމަދު ޝިފާޒު އަލުން އެޕާޓީއާ ގުޅުމުން މަރުހަބާ ދަންނަވާކަމަށެވެ. ހަސަން ލަތީފް އާއި ޝިފާޒް އާ ދެ ބޭފުޅުން އެމްޑީޕީ ދޫކުރައްވައި ޑިމޮކްރެޓްސް އާ ގުޅި ވަޑައިގެންނެވީ އެމްޑީޕީތެރޭގައި އުފެދުނު ހިޔާލު ތަފާތުވުންތަކަށްފަހު، އެންމެފަހުން ބޭއްވި ރިޔާސީ އިންތިހާބަށް ތައްޔާރުވަމުންދަނިކޮށެވެ.
އޭރު ޝިފާޒް އެމްޑީޕީން ވަކިވެ ވަޑައިގެންނެވިއިރު ހުންނެވޯ ޕާޓީގެ ނައިބުރައީސް ކަމުގެ މަގާމުގައެވެ. ހަސަން ލަތީފް ވަނީ މީގެކުރިން އެމްޑީޕީގެ ޗެއާޕާސަންކަމުގެ މަގާމު އަދާކުރައްވާފައެވެ. ހަސަން ލަތީފާއި ޝިފާޒް އެމްޑީޕީއާ އަލުން ގުޅިވަޑައިގަންނަވާފައިވާއިރު، ޑިމޮކްރެޓްސްގެ ލީޑަރޝިޕްގައި ތިއްބެވި އިތުރު ބޭފުޅުންތަކެއްވެސް ވަނީ އެމްޑީޕީއާ ގުޅިވަޑައިގަންނަވާފައެވެ. މީގެ ތެރޭގައި ހުސައިން އަމްރް، އަލީ އާޒިމްގެ އިތުރުން މުހައްމަދު ރަޝާދުވެސް ވަނީ އެމްޑީޕީއާ ގުޅިވަޑައިގަންނަވާފައެވެ.
ޑިމޮކްރެޓްސްގެ ލިޑަރޝިޕްގައި ހިމެނި ވަޑައިގަންނަވާ ބައެއް މެމްބަރުން އެމްޑީޕީއަށް ސޮއިކުރެއްވިއިރު، އެމްޑީޕީން ވަނީ މީގެކުރިން އެޕާޓީން ފިޔަވަޅު އެޅި ބައެއް ފަރާތްތަކަށް މައާފްދީފައެވެ. މީގެ ތެރޭގައި ހިމެނެނީ އަލީ އާޒިމް އާއި ރީކޯ މޫސާމަނިކެވެ. އެމްޑީޕީން ރީކޯ މޫސަ ވަކިވީ ރައީސް ނަޝީދު އެމްޑީޕީގައި ހުންނެވިއިރު، އެމަނިކުފާނުގެ ބައެއް ސިޔާސަތުތަކާ ހިތްހަމަނުޖެހިގެންނެވެ.
އަދި އަލީ އާޒިމް އެމްޑީޕީން ވަކިވީ ރިޔާސީ އިންތިހާބުފެށުމުގެ ކުރިން ޕާޓީތެރޭގައި އުފެދުނު ހިޔާލުތަފާތުވުންތަކާ ގުޅިގެންނެވެ. އެ ހިޔާލުތަފާތުވުންތަކުގައި ރައީސް ނަޝީދަށް ބަޔަތު ހިއްޕެވި ބޭފުޅުން ވަނީ އެމްޑީޕީން ވަކިވެ، ފިކުރެއްގެ ދިރުން ނަމުގައި ވަކި ސިޔާސީ ހަރަކާތްތައް ފށައި އެންމެފަހުން ޑިމޮކްރެޓްސް ނަމުގައި ސިޔާސީ ޕާޓިއެއް އުފައްދާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
