އީރާނުގެ އިންޒާރު މަސްކުއަށް: ސްޓާލިންކް ސެޓެލައިޓް އިންޓަނެޓަކީ އަސްކަރީ އަމާޒެއް
ލިޔުންތެރިޔާ
ޚަދީޖާ އަރުފާ
މަހުޖަނު އީލޮން މަސްކުގެ ސްޓާލިންކް ސެޓެލައިޓް އިންޓަނެޓް ނިޒާމަކީ "ޝަރުޢީ އަސްކަރީ އަމާޒެއް" ކަމަށް އީރާނުން ބުނެފިއެވެ. މިކަން ހާމަކޮށްފައިވަނީ އީރާނުގެ މީޑިއާތަކާ ހަވާލާދީ 'ދަ ކާބުލް ޓްރިބިއުން' ނޫހުންނެވެ.
އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ބަހްރޭން، ކުވެއިތު އަދި އެކުވެރި އަރަބި އިމާރާތް ހިމެނޭގޮތަށް ސަރަހައްދުގެ ބައެއް ގައުމުތަކުގައި މިހާރުވެސް ސްޓާލިންކްގެ ހިދުމަތް ދަނީ ދެމުންނެވެ. އީރާނުގެ އޮފިޝަލުން ސިފަކުރައްވާ ގޮތުގައި މި ސަރަހައްދުގައި މި ނެޓްވޯކް އޮތުމަކީ، ހާއްސަކޮށް ހަނގުރާމައިގެ ހާލަތެއްގައި ސަލާމަތީ ގޮތުން އޮތް ބޮޑު ނުރައްކަލެކެވެ.
މި ހަމަނުޖެހުންތައް ފެށުނީއްސުރެ އީރާނުން ދަނީ އެ ގައުމުގެ ރައްޔިތުންނަށް ދުނިޔޭގެ އިންޓަނެޓްގެ ހިދުމަތްތައް ލިބުން ހަނިކޮށް ނުވަތަ މެދުކަނޑާލަމުންނެވެ. މުރާސިލުން ބުނާ ގޮތުގައި މި ފިޔަވަޅަކީ މައުލޫމާތު ފެތުރުން ކޮންޓްރޯލް ކުރުމަށާއި، އަސްކަރީ އަދި ދާހިލީ ކަންކަމާ ގުޅޭ ހަބަރުތަކާއި ފޮޓޯތައް އާންމުވުން ހުއްޓުވުމަށް އަޅާފައިވާ ފިޔަވަޅެކެވެ.
މީގެ އިތުރުން، އީރާނުގެ ދާހިލީ ވުޒާރާ ހިމެނޭ ގޮތަށް އެ ގައުމުގެ ސަލާމަތީ މުއައްސަސާތަކުން ވަނީ އާންމުން ސްޓާލިންކް ބޭނުންކުރުމަކީ މަނާކަމެއް ކަމަށް ކަނޑައަޅާފައެވެ. އަދި ސެޓެލައިޓް އިންޓަނެޓް ބޭނުންކުރާ ފަރާތްތަކަށް ޖަލަށްލުން ފަދަ ހަރުކަށި އަދަބުތައް ދޭނެ ކަމުގެ އިންޒާރު ވެސް ކަމާބެހޭ ފަރާތްތަކުން ވަނީ ދީފައެވެ.
މާހިރުން ފާހަގަކުރާ ގޮތުގައި ހަނގުރާމައިގެ ވަގުތެއްގައި މުވާސަލާތީ އުމްރާނީ ވަސީލަތްތަކަށް އަމާޒުކުރުމަކީ އާންމުންނަށް މައުލޫމާތާއި މުވާސަލާތީ ހިދުމަތްތައް ލިބުމަށް ބޮޑެތި ހުރަސްތަކެއް ކުރިމަތިވާނެ ކަމެކެވެ. މި ނިންމުމާއެކު ސައިބަރ ސެކިއުރިޓީއާއި ހިޔާލު ފާޅުކުރުމުގެ މިނިވަންކަމާ މެދު ސަރަހައްދީ ފެންވަރުގައި ބޮޑެތި ކަންބޮޑުވުންތަކެއް ވަނީ އުފެދިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
