ވޯލްޑް ކަޕް ކުރިއަށްދާއިރު އެމެރިކާއަށް ނުރައްކާތެރި ހޫނުގެ ރާޅެއް

ވޯލްޑް ކަޕް ނޮކްއައުޓް ބުރުގެ މެޗުތައް ކުރިއަށްދާ ދަނޑިވަޅެއްގައި އެމެރިކާގެ މެދުތެރެއާއި އިރުމަތީ ސަރަޙައްދުތަކަށް "ހީޓް ޑޯމް" ގެ ނަމުން މަޝްހޫރު ނުރައްކާތެރި ހީޓް ވޭވްއެއް ފެތުރެމުން އެބަ ދެއެވެ. މި ހީޓް ޑޯމަކީ ހޫނާއި ތެތްކަން ހިފެހެއްޓޭ ގޮތަށް އުފެދޭ ބޮޑު ހައި ޕްރެޝަރު ޑޯމް އެކެވެ.

އެމެރިކާގެ ނެޝަނަލް ވެދާ ސާވިސް އިން ބުނީ މިޑްވެސްޓާއި އީސްޓް ކޯސްޓުގެ ބައެއް ސަރަޙައްދުތަކުގައި ހީޓް އިންޑެކްސް 105 އާއި 115 ޑިގްރީ ފެރެންހައިޓާ ދެމެދަށް އަރާނެ ކަމަށެވެ. މި ހޫނުގެ ރާޅު ކެނެޑާގެ ބައެއް ސަރަޙައްދުތަކަށް ވެސް ފެތުރޭނެ ކަމަށް ބެލެވެއެވެ. ޓޮރޮންޓޯއިން ކެންސަސް ސިޓީއާއި ނިއު ޖާޒީގެ އީސްޓް ރަދަފޯޑާއި ފިލެޑެލްފިއާގައި ކުޅޭ މެޗުތަކަށް ވެސް މި ހޫނުގެ އަސަރު ކުރާނެއެވެ.

"އިރު އޮއްސުމަށް ފަހު ވެސް ވަރަށް ހޫނުގަދަވާނެ. މި ޕެޓާނުގެ ސަބަބުން މެންދުރު ފަހުން ފެށިގެން ރޭގަނޑާ ހަމައަށް ވެސް ވަރަށް ހޫނުވާނެ" ކަމަށް އެކިއުވެދާގެ ސީނިއާ މީޓިއޮރޮލޮޖިސްޓް އެލަން ރެޕާޓް ބުންޏެވެ. ނިއު ޔޯކުގައި 2013 ވަނަ އަހަރަށް ފަހު ފެންނާނެ އެންމެ މަތީ ފިނިހޫނުމިން މި ހަފުތާގައި ރެކޯޑު ކުރެވޭނެ ކަމަށް ވެސް ރެޕާޓް ލަފާކުރެއެވެ.

ފީފާއިން ވަނީ މި ވޯލްޑް ކަޕުގެ ކޮންމެ މެޗެއްގެ ކޮންމެ ހާފެއްގައި ތިން މިނެޓުގެ ލާޒިމު ހައިޑްރޭޝަން ބްރޭކެއް ކަނޑައަޅައިފައެވެ. ނަމަވެސް ކުޅުންތެރިންގެ ސަލާމަތާ ގުޅޭ ގޮތުން އިތުރު ފިޔަވަޅެއް އެޅުމާ ބެހޭ ގޮތުން ފީފާއިން ވަކި އެއްޗެއް ނުބުނެއެވެ.

ޓޮރޮންޓޯއިން ވަނީ ހޫނާ ގުޅިގެން "ހީޓް ރިލީފް ސްޓްރެޓެޖީ" ތަންފީޒުކޮށްފައެވެ. އެޓްލާންޓާ ޑެލަސް އަދި ހިއުސްޓަންގެ ސްޓޭޑިއަމްތަކުގައި ރިޓްރެކްޓެބަލް ފުރާޅާއި އެއާ ކޮންޑިޝަނިން ހުރުމުން ބޮޑު ލުޔެއް ލިބޭނެއެވެ. ނިއު ޖާޒީގެ ހެކެންސެކް ޔުނިވާސިޓީ މެޑިކަލް ސެންޓަރުގެ އިމަޖެންސީ ޑިޕާޓްމެންޓް ޑޮކްޓަރު އެލީނާ މިޓީނާ ބުނީ ހިޔާ ހޯދުމާއި ފެން ލިބޭނެ ގޮތް ހެދުމަކީ ފުރާނަ ސަލާމަތްކޮށްދޭނެ ކަމެއް ކަމަށެވެ.