މަސައްކަތް ނުފަށާތީ ކުރީ ސަރުކާރު ހަވާލުކުރި 16 މަޝްރޫޢެއް ބާތިލުކުރަންޖެހުނު: ވަޒީރު ޤީލާ

ކުރީގެ ސަރުކާރުން ސިއްޙީ ދާއިރާގެ ތަރައްޤީއަށް ހަވާލުކުރި މަޝްރޫޢުތަކުގެ ތެރެއިން ޢަމަލީ މަސައްކަތް ނުފެށި ހުރި 16 މަޝްރޫޢެއް ބާތިލުކޮށް، އެ މަޝްރޫޢުތަކަށް އެޑްވާންސް ފައިސާގެ ގޮތުގައި ދޫކުރި 60 މިލިއަނަށްވުރެ ގިނަ ރުފިޔާ އަނބުރާ ހޯދުމުގެ މަސައްކަތް ފަށާފައިވާކަމަށް ސިއްޙަތާއި އާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ޤީލާ ޢަލީ ވިދާޅުވީ، ކުރީ ސަރުކާރުން ގިނަ ޢަދަދެއްގެ މަޝްރޫޢުތައް ކޮންޓްރެކްޓަރުންނާ ހަވާލުކޮށް ފައިސާ ދޫކުރި ނަމަވެސް، ދިގު މުއްދަތެއް ފާއިތުވެދިޔައިރުވެސް އެ މަސައްކަތްތައް ނުފެށި ލަސްވުމުގެ ސަބަބުން ދައުލަތަށް ބޮޑެތި ގެއްލުންތަކެއް ލިބިފައިވާ ކަމަށެވެ.

އަދި މަސައްކަތް ނުފެށޭތީ ސަބަބުން 16 މަޝްރޫޢުއެއް ބާތިލު ކުރަންޖެހުނު ކަމަށާ، ބާތިލުކުރި މަޝްރޫޢުތަކުގެ ތެރޭގައި ހއ. އިހަވަންދޫ ހޮސްޕިޓަލުގެ މަސައްކަތް ހިމެނޭކަން ވަޒީރު ފާހަގަކުރެއްވިއެވެ. އެ މަޝްރޫޢަށްވެސް ފައިސާ ދޫކޮށްފައިވާ ކަމަށާއި، ނަމަވެސް މަސައްކަތް ކުރިއަށް ނުގެންދެވުމުގެ ސަބަބުން މިދިޔަ މާޗު މަހު އެ މަޝްރޫޢު ޓާމިނޭޓްކޮށްފައިވާ ކަމަށެވެ.

"ސިއްޙީ ޚިދުމަތުގެ ގިނަ އަދަދެއްގެ ޕްރޮޖެކްޓުތަކެއް ވަނީ ބާތިލުކުރަންޖެހިފައި. 60 މިލިޔަނަށްވުރެ ގިނަ ފައިސާ އިސްރާފުވެފައިވަނީ މިގޮތަށް އެތައް ބަޔަކާ ހަވާލުކުރެވިފައި. އެހެންނަމަވެސް އަޅުގަނޑުމެން މިހާރު މި މަސައްކަތް ކުރަނީ ޤާނޫނީގޮތުން އެ ފައިސާ ހޯދުމަށާއި އަދި ޤާނޫނީގޮތުން ފުރިހަމަކުރަންޖެހޭ ކަންކަން ފުރިހަމަ ކުރުމަށް،"

ވަޒީރު ޤީލާ ވިދާޅުވިއެވެ.

މި މައްސަލައާ ގުޅިގެން ރައްޔިތުންގެ މަޖިލީހުގެ ރިޔާސަތުގައި އިންނެވި، މަޖިލީހުގެ ނައިބު ރައީސް އަޙްމަދު ސަލީމް ވިދާޅުވީ، އެޑްވާންސްކޮށް ފައިސާ ދޫކޮށްފައި ހުރި މިފަދަ މައްސަލަތައް މިހާރު މަޖިލީހުގެ މާލިއްޔަތު ކޮމިޓީއަށް ހުށަހަޅަމުންދާ ކަމަށާއި، ކޮމިޓީން އެ ކަންކަން ތަޙުޤީޤު ކުރަމުންދާނެ ކަމަށެވެ.

ވަޒީރު އިތުރަށް ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރުން މަޝްރޫޢުތައް ކުރިއަށް ގެންދަނީ ބޭނުންވާ ބަޖެޓު ކަށަވަރުކުރުމަށްފަހު ކަމަށެވެ. އެގޮތުން ރަށްރަށުގެ ސިއްޙީ މަރުކަޒުތައް އަޕްގްރޭޑް ކުރުމާއި ލެބޯޓްރީތައް ޤާއިމުކުރުމުގެ މަސައްކަތްތައް ހަރުދަނާ ނިޒާމެއްގެ ދަށުން ކުރިއަށްދާކަން ވަޒީރު ފާހަގަކުރެއްވިއެވެ.