ގއ. ވިލިނގިލީގައި، ބަނދެ ނިމެންވެފައި އޮތް ސަފާރީއެއް ހުރި ހަރުގެއެއްގައި ރޯވެ އަނދައިފި!
ލިޔުންތެރިޔާ
ޚަދީޖާ އަރުފާ
ގއ. ވިލިނގިލީގައި ސަފާރީއެއް ބަނުމަށް ހަދާފައިވާ ހަރުގެއެއްގައި ރޯވެ އަނދައިފިއެވެ.
އެމްއެންޑީއެފުން ބުނީ، ރޭގެ މިހާދިސާގައި ރޯވެ އަނދާފައި ވަނީ ވިލިނގިލީގެ އުތުރު ފަރާތުން މީހުން ނޫޅޭ ސަރަހައްދުގައި ސަފާރީއެއް ބަނުމަށްޓަކައި ހަދާފައި ހުރި ހަރުގެއެއްގައި ކަމަށެވެ.
އަދި އަލިފާނުގެ ހާދިސާގެ ސަބަބުން ހަރުގޭގެ ފުރާޅު އަލިފާންގަނޑު މައްޗަށް ވެއްޓި އަލިފާނުގެ ބޮޑުބައި ނިވިފައިވާ ކަމުގެ މައުލޫމާތު ލިބިފައިވާ ކަމަށްވެސް ފަހުން އެމްއެންޑީއެފުން ބުނެފައިވެއެވެ.
މިކަމާއި ގުޅިގެން ވޮއިސް އަށް މައުލޫމާތު ދެއްވަމުން ވިލިނގިލީ ކައުންސިލްގެ މެންބަރު ޢާއިޝަތު ނަޒްދާ ވިދާޅުވީ، މިހާރު އަލިފާންގަނޑު ނިއްވާލެވިފައިވާ ކަމަށެވެ.
އަދި އެ ހާދިސާގައި އެއްވެސް މީހަކަށް އަނިޔާ ނުވި ނަމަވެސް ހަރުގެ އެއްކޮށް އަނދާފައިވާ ކަމަށާ، ހަރުގޭގައި ބަންނަން ފަށައިފައި އޮތް ސަފާރީވެސް އަނދާފައިވާ ކަމަށެވެ. އެ ސަފާރީ އަކީ ބަނުމުގެ މަސައްކަތް ނިމުމާއި ގާތް ވެފައި އޮތް ސަފާރީއެއް ކަންވެސް އޭނާ ފާހަގަކުރެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
